କେନ୍ଦ୍ରାପଡା: ଭୁଲ ଅସ୍ତ୍ରୋପଚାର ନେଲା ମହିଳାଙ୍କ ଜୀବନ । କେନ୍ଦ୍ରାପଡା ମୁଖ୍ୟ ଚିକିତ୍ସାୟଳ ଡାକ୍ତରଙ୍କ ଭୁଲ ପାଇଁ ଜଣେ ପ୍ରସୂତୀଙ୍କ ଜୀବନ ଯାଇଛି । ଯାହାକୁ ନେଇ ସ୍ବୟଂ ସହାୟକ ଗୋଷ୍ଠୀ ପ୍ରଥମେ ଡାକ୍ତରଙ୍କ ବିରୁଦ୍ଧ ଟାଉନ ଥାନାରେ ଅଭିଯୋଗ କରିଥିଲେ । ଏହା ପରେ ଆଜି ଡାକ୍ତରଙ୍କ ନିଲମ୍ବନ ଦାବି କରି ଅତିରିକ୍ତ ଜିଲ୍ଲାପାଳଙ୍କୁ ଏକ ଲିଖିତ ଦାବି ପତ୍ରରେ ଜଣାଇଛନ୍ତି ।
ସୂଚନାଯୋଗ୍ୟ, ଗତ ଅକ୍ଟୋବର 22ରେ ଟାଉନ ଥାନା ଅନ୍ତର୍ଗତ ଚାଟଣାପଟାଣା ଗାଁର ରଞ୍ଜନ ସାହୁଙ୍କ ପତ୍ନୀ ମଧୁସ୍ମିତା ଦ୍ବିତୀୟ ସନ୍ତାନ ପାଇଁ ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲେ । ତେବେ ଅସ୍ତ୍ରୋପଚାର କରାଯାଇ ସନ୍ତାନ ପ୍ରସବ କରାଯାଇଥିଲା । ହେଲେ ଅପରେସନ ପରେ ପ୍ରସୂତି ଜଣକର ବାରମ୍ବାର ବାନ୍ତି ହେବାକୁ ଲାଗିଥିଲା । ଯାହାକୁ ନେଇ ପରିବାର ଲୋକେ ଡାକ୍ତରଙ୍କୁ ଜଣାଇଥିଲେ । କିନ୍ତୁ ଏହା କିଛି ନୁହେଁ କହି ଡାକ୍ତର କଥାକୁ ଏଡାଇଥିଲେ । କିନ୍ତୁ ପିଲା ଜନ୍ମ ହେବାର 11 ଦିନ ପରେ କଟକ ମେଡିକାଲକୁ ପଠାଇ ଦେଇଥିଲେ ଡାକ୍ତର ।
ସେଠାରେ ଡାକ୍ତରମାନେ ମଧୁସ୍ମିତାଙ୍କ ଖାଦ୍ୟନଳୀ କଟାଯାଇଥିବାର କହିଥିଲେ । ଏହା ପରେ ପରିବାରଲୋକେ ତୁରନ୍ତ ଏକ ଘରୋଇ ହସ୍ପିଟାଲରେ ଭର୍ତ୍ତି କରିଥିଲେ ମଧ୍ୟ ଗତ ଦୁଇ ଦିନ ତଳେ ତାଙ୍କର ମୃତ୍ୟୁ ହୋଇଛି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
