କେନ୍ଦ୍ରାପଡ଼ା: ଜିଲ୍ଲାର ନିକିରାଇ ଥାନା ଅନ୍ତର୍ଗତ ପାଳକଣା ଗାଁ ପୋଖରୀରୁ ଜଣେ ମହିଳାଙ୍କ ମୃତଦେହ ଠାବ ହୋଇଛି l ମୃତ ମହିଳା ଜଣଙ୍କ ପାଳକଣା ଗାଁର ଉମା ମଲ୍ଲିକ ବୋଲି ଜଣାପଡିଛି l ଗତମାସ ୩୦ ତାରିଖ ମଧ୍ୟରାତ୍ରିରୁ ଉମା ନିଜ ଶାଶୁଘରୁ ନିଖୋଜ ହୋଇଯାଇଥିବା ନେଇ ଉଭୟ ଶାଶୁଘର ଓ ବାପ ଘର ପକ୍ଷରୁ ସ୍ଥାନୀୟ ନିକିରାଇ ଥାନାରେ ଅଭିଯୋଗ ହୋଇଥିଲା l ଆଜି ଗାଁ ପୋଖରୀରେ ଉମାଙ୍କର ମୃତଦେହ ଭାସୁଥିବାର ଦେଖିବାକୁ ମିଳିଥିଲା l ଉମାଙ୍କ ପରିବାର ପକ୍ଷରୁ ଏହା ଏକ ହତ୍ୟା ବୋଲି ଅଭିଯୋଗ ହୋଇଛି l
୨୦୦୭ ମସିହାରେ ଉମା ନିଜ ପଡ଼ୋଶୀ ଯୁବକ ସୁରେଶ୍ ମଲ୍ଲୀକଙ୍କୁ ବିବାହ କରିଥିଲେ l ତାଙ୍କର ୩ଟି ଝିଅ ଏବଂ ଗୋଟିଏ ପୁଅ ଅଛନ୍ତି l ଜାନୁଆରୀ ୩୦ ତାରିଖରେ ଉମା ଅସୁସ୍ଥ ହୋଇ ପଡିବାରୁ ତାଙ୍କ ଭାଇ ଉମାଙ୍କୁ ହସ୍ପିଟାଲ ନେଇଥିଲେ । ପରେ ରାତି ୧୦ଟାରେ ଭଉଣୀକୁ ଶାଶୁଘରେ ଛାଡି ଦେଇ ଯାଇଥିଲେ l ରାତି ୧୨ଟାରେ ଉମା ଘରେ ନଥିବା ନେଇ ଶାଶୁଘର ଲୋକେ ଅଭିଯୋଗ କରିଥିଲେ l ତେବେ ଉମାଙ୍କ ମୃତ୍ୟୁର କାରଣ ଅସ୍ପଷ୍ଟ ରହିଛି l ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି l
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
