କେନ୍ଦ୍ରାପଡା: ମଦ ନିଶାରେ ଉବୁଟୁବୁ ନାଉରିଆ । ଗୋଟିଏ ହାତରେ କାତ ଧରି ଡଙ୍ଗା ଚଲାଇବା ସମୟରେ ଅନ୍ୟହାତରେ ମଦ ବୋତଲ ଧରିଛନ୍ତି ନାଉରିଆ ଜଣକ । ଆଉ ଭାଗ୍ୟକୁ ଆଦରି ଡଙ୍ଗାରେ ଯାତ୍ରୀମାନେ ପାଟି ଚୁପ କରି ବସିଛନ୍ତି। ସାମାଜିକ ଗଣମାଧ୍ୟମରେ ଭାଇରାଲ ହେଉଥିବା ଏହି ଦୃଶ୍ୟଟି ହେଉଛି କେନ୍ଦ୍ରାପଡ଼ା ଆଳି ଥାନା ଅନ୍ତର୍ଗତ ନଳପାହି ଗ୍ରାମର ।
ଗତ ଶନିବାର ଦିନ ଖରସ୍ରୋତା ଓ ବ୍ରାହ୍ମଣୀ ନଦୀ ଘେରରେ ଥିବା ଏକମାଣିଆ ପଞ୍ଚାୟତର ନଳପାହି, ଦକ୍ଷିଣଡ଼ିହା ଓ ଏକମାଣିଆ ଗ୍ରାମର ଲେକଙ୍କୁ ଡଙ୍ଗାରେ ବସାଇ ନେଉଥିବା ବେଳେ ନାଉରିଆ ଜଣଙ୍କ ମଦ ପିଇ ମାତାଲ ଅବସ୍ଥାରେ ବିଭିନ୍ନ ପ୍ରକାର ଅଙ୍ଗଭଙ୍ଗୀ ପ୍ରଦର୍ଶନ କରୁଥିବା ଏହି ଭିଡିଓରୁ ବେଶ୍ ଜଣା ପଡୁଛି । ଭୟରେ ଡଙ୍ଗାରେ ଥିବା ଯାତ୍ରୀମାନେ ଏହା ବିରୁଦ୍ଧରେ କୌଣସି ପ୍ରତିକ୍ରିୟା ଦେଇନଥିଲେ କାରଣ ଏଠାରେ ମୁହଁ ଖୋଲିଲେ ଡଙ୍ଗା ଚାଳକ ଜଣଙ୍କ ସେମାନଙ୍କୁ ଆଉ ଡଙ୍ଗାରେ ପାର ନକରିଦେବାର ଭୟ ମଧ୍ୟ ରହିଛି ।
ତେବେ ଚଳିତବର୍ଷ ଜାନୁଆରୀ ମାସରେ ମହାକାଳପଡା ନିପାଣିଆ ଡଙ୍ଗାବୁଡି ଘଟଣାରୁ ଜିଲ୍ଲା ପ୍ରଶାସନ ଯେତିକି ଶିକ୍ଷାଲାଭ କରିଥିଲା ତାହା ଏହି ନାଉରିଆର କାର୍ଯ୍ୟକଳାପ ପାଖରେ ଫଳଶୁନ୍ୟ ବୋଲି ମନେ ହେଉଛି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
