କେନ୍ଦ୍ରାପଡା: ଭିତରକନିକା ଜାତୀୟ ଉଦ୍ୟାନକୁ ଦିନିକିଆ ଗସ୍ତ କରି ଏହାର ପ୍ରାକୃତିକ ସୌନ୍ଦର୍ଯ୍ୟ ଓ ବିଶ୍ବର ଦ୍ଵିତୀୟ ସର୍ବବୃହତ ହେନ୍ତାଳ ବଣରୁ ଶିକ୍ଷା ନେଲେ ତେଲେଙ୍ଗାନା ରାଜ୍ୟ ବନବିଭାଗ ଏକାଡେମୀର ୩୫ ଜଣ ରେଞ୍ଜର ଶିକ୍ଷାର୍ଥୀ । ଏହି ଶିକ୍ଷାର୍ଥୀ ଦଳ ଭିତରକନିକା ଜାତୀୟ ଉଦ୍ୟାନରେ ପହଞ୍ଚିବା ପରେ ପ୍ରତିନିଧି ଦଳ ପ୍ରଥମେ ଗୋରୀ କୁମ୍ଭୀରକୁ ଦେଖିଥିଲେ । ପରେ ହେନ୍ତାଳ ଜଙ୍ଗଲ କିପରି ଜୈବ ବିବିଧତାକୁ ରକ୍ଷା କରୁଛି ସେ ସମ୍ପର୍କରେ ଜ୍ଞାନ ଆହରଣ କରିଥିଲେ ।
ବର୍ତ୍ତମାନ ସମୟରେ ବଙ୍ଗୋପସାଗର କୂଳରେ ଥିବା ରାଜନଗର ଓ ମହାକାଳପଡା ଅଞ୍ଚଳର ବିଭିନ୍ନ ସ୍ଥାନରେ ଗଢି ଉଠିଥିବା ବେଆଇନ ଚିଙ୍ଗୁଡ଼ି ଘେରି ଉଚ୍ଛେଦ ହେବା ନେଇ ହାଇକୋର୍ଟ ନିର୍ଦ୍ଦେଶ ଦେଇଥିଲା । ଏହା ପରେ ଏଗୁଡ଼ିକୁ ଉଚ୍ଛେଦ କରାଯାଇ ସେହି ସ୍ଥାନ ମାନଙ୍କରେ ନୂତନ ହେନ୍ତାଳ ବଣ ସୃଷ୍ଟି କରାଯାଉଥିବା ସମ୍ପର୍କରେ ଅବଗତ ହୋଇଥିଲେ ଏହି ଶିକ୍ଷାର୍ଥୀ । ସେହିପରି ହେନ୍ତାଳ ଜଙ୍ଗଲ ସୃଷ୍ଟି ହେବା ପାଇଁ ଉଭୟ ଲୁଣି ଓ ମଧୁର ଜଳର ଆବଶ୍ୟକତା ରହିଥିବାବେଳେ ଏହି ଜଙ୍ଗଲ ବାତ୍ୟା ପ୍ରତିରୋଧକାରୀ ହୋଇଥିବା ସମ୍ପର୍କରେ ପ୍ରଶିକ୍ଷାର୍ଥୀଙ୍କୁ ଅବଗତ କରାଇଥିଲେ ଫରେଷ୍ଟ ଗାର୍ଡ ସୁନୀଲ ରଞ୍ଜନ ରାଉତରାୟ ଓ ବୈଜ୍ଞାନିକ ତଥା ଗବେଷଣା ସହାୟକ ପ୍ରସନ୍ନ କୁମାର ନାୟକ ।
ଏଥିସହ ନିରାକାର ବେହେରା ଓ ଯଶୋବନ୍ତ ବେହେରା ପ୍ରଶିକ୍ଷାର୍ଥୀ ମାନଙ୍କୁ ଭିତରକନିକା ସମ୍ପର୍କରେ ଯଥେଷ୍ଟ ଗବେଷଣାତ୍ମକ ତଥ୍ୟ ପ୍ରଦାନ କରିଥିଲେ । ତେବେ ସନ୍ଧ୍ୟାରେ ଏହି ପ୍ରଶିକ୍ଷାର୍ଥୀ ଦଳ ଫେରିଥିବାବେଳେ, ଭିତରକନିକା ଜାତୀୟ ଉଦ୍ୟାନ ସମ୍ପର୍କରେ ଦେଶ ଓ ବିଦେଶର ଛାତ୍ରଛାତ୍ରୀମାନଙ୍କ ବିଷୟରେ ଜିଜ୍ଞାସା ବଢୁଥିବା ଦେଖି ବେଶ ଖୁସି ହୋଇଛନ୍ତି ଜିଲ୍ଲାବାସୀ ।
ଇଟିଭି ଭାରତ, କେନ୍ଦ୍ରାପଡା
