କେନ୍ଦ୍ରାପଡା: ସାମାଜିକ ଗଣମାଧ୍ୟମ ଏବେ ବିଭିନ୍ନ ପ୍ରସଙ୍ଗକୁ ନେଇ ବିବାଦୀୟ ହେଉଥିବା ବେଳେ ଏହି ସାମାଜିକ ଗଣମାଧ୍ୟମ ହିଁ ଜଣେ ଦିବ୍ୟାଙ୍ଗ ବ୍ୟକ୍ତିଙ୍କ ମୁହଁରେ ହସ ଫୁଟାଇ ପାରିଛି । ସାମାଜିକ ଗଣମାଧ୍ୟମରୁ ଖବର ପାଇ ସୁଦୂର କଟକ ଜିଲ୍ଲା କଣ୍ଟପଡା ବ୍ଲକର ତଣ୍ଡିକଣା ଗାଁର ବୋହୁ କେନ୍ଦ୍ରାପଡ଼ା ଜିଲ୍ଲା ରଘୁଦେଇପୁର ବେଲାରପୁରରେ ପହଞ୍ଚି ମାସକର ରାସନ ସାମଗ୍ରୀ ସହ ଆର୍ଥିକ ସହାୟତା ମଧ୍ୟ କରିଛନ୍ତି । ସୂଚନାନୁଯାୟୀ, ବେଲାରପୁର ଗାଁର ଦିବ୍ୟାଙ୍ଗ ଜଟାଧାରୀ ଦାସ ଓ ତାଙ୍କ ଭାଇଙ୍କ ଉପରେ ମୋଟ 9 ପ୍ରାଣୀ କୁଟୁମ୍ବ ନିର୍ଭର କରନ୍ତି । ଦୁଇଭାଇ ପୂର୍ବରୁ ମୂଲ ମଜୁରୀ ଲାଗି ପରିବାର ପ୍ରତିପୋଷଣ କରୁଥିବା ବେଳେ ଗତ କିଛି ବର୍ଷ ହେବ ଦୁଇଭାଇ ଧିରେଧିରେ ଦୃଷ୍ଟିଶକ୍ତି ହରାଇବାରେ ଲାଗିଛନ୍ତି ।
ଏଭଳି ସ୍ଥିତିରେ ସେମାନଙ୍କ ପରିବାରକୁ ସହଯୋଗ କରିବା ପାଇଁ ସାମାଜିକ ଗଣମାଧ୍ୟମରେ ପୋଷ୍ଟ ଭାଇରାଲ ହେବା ପରେ ଏହି ପରିବାରକୁ ସହଯୋଗ କରିବା ଉଦ୍ଦେଶ୍ୟରେ ତଣ୍ଡିକଣା ଗାଁର ଝିଅ ମଧୁସ୍ମିତା ସ୍ବାଇଁ ସଙ୍ଗେସଙ୍ଗେ ତାଙ୍କ ସାନ ଭଉଣୀ ଅକସ୍ମିତା ସ୍ବାଇଁ ଓ ବାପା ନାରାୟଣ ସ୍ବାଇଁଙ୍କୁ ଧରି ମାସକର ରାସନ ସାମଗ୍ରୀ ସହ ଶାଢ଼ୀ, ଛତା ପ୍ରଦାନ କରିବା ସହ ଆର୍ଥିକ ସହାୟତା କରିଥିବା ସୂଚନା ମିଳିଛି । ତେବେ ସମ୍ପ୍ରତି ସମୟରେ ସାମାଜିକ ଗଣମାଧ୍ୟମରେ ବିଭିନ୍ନ ଅପ୍ରସଙ୍ଗ ଭାଇରାଲ ହେଉଥିବା ବେଳେ ଏହି ସାମାଜିକ ଗଣମାଧ୍ୟମରୁ ଖବର ପାଇ ମଧୁସ୍ମିତାଙ୍କ ଭଳି ହୃଦୟବାନ ମଣିଷ ଜଟାଧାରୀଙ୍କ ପରିବାର ନିକଟରେ ପହଞ୍ଚି ସହଯୋଗ କରିଥିବା ଘଟଣାକୁ ଅଞ୍ଚଳବାସୀ ଖୁବ ପ୍ରଶଂସା କରିଛନ୍ତି ।
ଇଟିଭି ଭାରତ, କେନ୍ଦ୍ରାପଡ଼ା
