କେନ୍ଦ୍ରାପଡ଼ା: ଟାଉନ ଥାନା ଅନ୍ତର୍ଗତ ଅଙ୍ଗୁଳାଇ ଠାରେ ଖୋଲିଥିବା ମଦ ଦୋକାନକୁ ବନ୍ଦ କରିବା ପାଇଁ ଆନ୍ଦୋଳନ କଲେ ମହିଳା । ଗତବର୍ଷ ଜୁନ ମାସରେ ଏହି ଦୋକାନଟିକୁ ବନ୍ଦ କରିବା ପାଇଁ ବିଭିନ୍ନ ମହିଳା ଗୋଷ୍ଠୀ, ବୁଦ୍ଧିଜୀବି ଚେଷ୍ଟା କରିଥିଲେ । ହେଲେ ଏହି ଆନ୍ଦୋଳନର ନେତୃତ୍ବ ନେଉଥିବା ଅଙ୍ଗୁଳାଇ ସରପଞ୍ଚଙ୍କ ସ୍ବାମୀ ମଦ ବ୍ୟବସାୟୀଙ୍କ ଆକ୍ରମଣର ଶିକାର ହୋଇଥିଲେ ।
ଏହାପରେ ପ୍ରଶାସନ ସହିତ ଆଲୋଚନା ସହ ଉକ୍ତ ମଦ ଦୋକାନକୁ ବନ୍ଦ କରାଯାଇଥିଲା । ଯାହାକି ସ୍ଥାନୀୟ ଜନସାଧାରଣଙ୍କୁ ସନ୍ତୋଷ ଦେଇଥିଲା । ହେଲେ ପୁଣି ଥରେ ସେହି ମଦଦୋକାନ ଖୋଲିବାରୁ ଏହାର ପ୍ରତିବାଦ କରିଛନ୍ତି ସରପଞ୍ଚ ଦୁର୍ଗାବତୀ ପ୍ରଧାନ । ପୂର୍ବରୁ ଏକ ସାମ୍ବାଦିକ ସମ୍ମିଳନୀରେ ଅନଶନ ଓ ଆତ୍ମାହୁତି କରିବା ପାଇଁ ଚେତାବନୀ ମଧ୍ୟ ଦେଇଥିଲେ ।
ପୁର୍ବରୁ ପ୍ରଶାସନ ଜନସାଧାରଣଙ୍କ ଦାବିକୁ କର୍ଣ୍ଣପାତ କରିନଥିଲା। ଅପରପକ୍ଷରେ ଜିଲ୍ଲା ଅବକାରୀ ଅଧିକାରୀ ଏହି ମଦ ଦୋକାନ ଖୋଲିବା ପାଇଁ ମାନ୍ୟବର ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶ ଥିବାରୁ ଏଠାରେ ମଦ ଦୋକାନ ପୁନର୍ବାର ଖୋଲାଯାଇଛି ବୋଲି କହିଛନ୍ତି ।
ତେବେ ମଦ ଦୋକାନ ପ୍ରତି ଅନୁକମ୍ପା ସ୍ଥାନୀୟ ଲୋକଙ୍କ ମନରେ ଏକ ଆନ୍ଦୋଳନ ରୂପ ନେଇଛି । ପ୍ରଶାସନ ଏହାକୁ ସଠିକ ଭାବରେ ମୁକାବିଲା କରୁଛି ନା ନାହିଁ ଦେଖିବାକୁ ବାକି ରହିଲା।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
