କେନ୍ଦ୍ରାପଡା: କେନ୍ଦ୍ରାପଡା ନିକିରାଇ ପୋଲିସର ଜୁଲୁମ। ବିନା କାରଣରେ ଘରୁ ଟେକି ନେଇ କୋରୋ ଗାଁର ନିରଞ୍ଜନ ନାୟକଙ୍କୁ ମାଡମାରିଥିବା ଅଭିଯୋଗ । ନିଜ ଝିଅକୁ ପାଇବା ପାଇଁ ପଠାଇଥିବା ସମନରେ ପୋଲିସ ତାଙ୍କୁ ହିଁ ଉଠାଇନେଇଥିବା ଜଣାପଡିଛି।
ଘଟଣା ଅନୁଯାୟୀ, ନିକିରାଇ ଥାନା କୋରୋ ଗ୍ରାମର ଯୁବକ ନିରଞ୍ଜନ ନାୟକ କିଛିବର୍ଷ ତଳେ ବିବାହ କରିଥିଲେ । ପରେ ତାଙ୍କର ଝିଅ ଟିଏ ମଧ୍ୟ ହୋଇଥିଲା । ହେଲେ ତାପରେ ତାଙ୍କ ପତ୍ନୀଙ୍କର ମୃତ୍ୟୁ ଘଟିଥିଲା । ତେବେ ଝିଅର ମୃତ୍ୟୁ ପରେ ନିଜ ନାତୁଣୀଙ୍କୁ ପାଖରେ ରଖିବା ପାଇଁ କହିଥିଲେ ନିରଞ୍ଜନଙ୍କ ଶଶୁର ଘର ଲୋକେ । ଏହାପରେ ବାଦବିବାଦ ଆରମ୍ଭ ହୋଇଥିଲା । ଝିଅକୁ ଆଠ ବର୍ଷ ହେବା ପର୍ଯ୍ୟନ୍ତ ସେ ତାର ଅଜା ଓ ଆଇଙ୍କ ପାଖରେ ରହିବ ବୋଲି କୋର୍ଟ ନିର୍ଦ୍ଦେଶ ଦେଇଥିଲେ ।
ତେବେ ଝିଅକୁ ଆଠ ବର୍ଷ ହେବା ପରେ ବାରମ୍ବାର ଝିଅକୁ ଆଣିବାକୁ ଯାଇ ନିରାଶ ହୋଇ ଶେଷରେ ନିରଞ୍ଜନ ଉପଜିଲ୍ଲାପାଳଙ୍କ ନିକଟରେ ଫେରାଦ ହୋଇଥିଲେ । ପରେ ଉପଜିଲ୍ଲାପାଳ ଝିଅକୁ କୋର୍ଟରେ ହାଜର କରାଇବା ପାଇଁ ଏକ ସମନ(ୱାରେଣ୍ଟ) ନିକିରାଇ ପୋଲିସକୁ ପଠାଇଥିଲେ । ହେଲେ ଗତକାଲି ନିକିରାଇ ଥାନା ଏଏସଆଇ ନିକୁଞ୍ଜ ବିହାରୀ ପ୍ରଧାନ କୋରୋ ଗାଁକୁ ଯାଇ ନିରଞ୍ଜନଙ୍କୁ ତାଙ୍କ ନାମରେ ୱାରେଣ୍ଟ ଥିବା କହିଥିଲେ । ନିରଞ୍ଜନ ନିଜ ନାମରେ କଣ ୱାରେଣ୍ଟ ଅଛି ବୋଲି ପଚାରିବାରୁ ଉତକ୍ଷିପ୍ତ ହୋଇ ଉକ୍ତ ପୋଲିସ ଅଧିକାରୀ ତାଙ୍କୁ ଧକ୍କା ମାରିବା ସହ ଥାନାକୁ ଆଣି ସମ୍ପୂର୍ଣ୍ଣ ଉଲଗ୍ନ କରି ମାଡ ମାରିଥିବା ଅଭିଯୋଗ ହୋଇଛି ।
ଏହାସହ ନିରଞ୍ଜନକୁ ଇନ୍ଦୁପୁର ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ନେଇ ସ୍ବାସ୍ଥ୍ୟପରୀକ୍ଷା କରାଇ ଉପ ଜିଲ୍ଲାପାଳଙ୍କ ନିକଟରେ ହାଜର କରାଇଥିଲା ପୋଲିସ । ଏହାପରେ କାହା ନାମରେ ୱାରେଣ୍ଟ ଏବଂ କାହାକୁ ଧରି ଆଣିଛ ବୋଲି ପ୍ରଶ୍ନ କରିଥିଲେ ଉପଜିଲ୍ଲାପାଳ ।
ସେପଟେ ଉପଜିଲ୍ଲାପାଳଙ୍କ ପାଖରୁ ତାଗିଦ୍ ପରେ ସନ୍ଧ୍ୟାରେ ନିରଞ୍ଜନଙ୍କୁ ପୋଲିସ ଗାଡିରେ ଆଣି ଛାଡିବାକୁ ଆସିଥିଲା । ସେଠାରେ ନିରଞ୍ଜନ ଗାଡିରୁ ଓହ୍ଲାଇ ନଥିଲେ । ନିରଞ୍ଜନ ଅପରାଧୀ ହୋଇନଥିବା ବେଳେ ତାଙ୍କୁ କାହିଁକି ପୋଲିସ ବାନ୍ଧି ନେଇଥିଲା ଏବଂ ଶାରୀରିକ ନିର୍ଯ୍ୟାତନା ଦେଇଥିଲା । ତାହାକୁ ନେଇ ଦୀର୍ଘ ପାଞ୍ଚ ଘଣ୍ଟା ଧରି ପୋଲିସ ଗାଡିକୁ ଅଟକାଇ ଥିଲେ ଗ୍ରାମବାସୀ ।
ଅନ୍ୟପକ୍ଷରେ ରାଜ୍ୟ ସରକାର ‘5ଟି’ ମାଧ୍ୟମରେ ଲୋକଙ୍କ ସେବା କରୁଥିବା କହୁଥିବା ବେଳେ କଣ ପାଇଁ ଏଭଳି ନିରୀହ ଲୋକଙ୍କୁ ପୋଲିସ ବାନ୍ଧି ନେଉଛି ତାହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ନିରଞ୍ଜନଙ୍କ ବାପା । ସେପଟେ ତା ନାମରେ ସର୍ଚ୍ଚ ୱାରେଣ୍ଟ ଥିଲା ପରେ ତାକୁ ଛାଡିଦିଆଯାଇଥିବା କହି ଘଟଣାକୁ ଘଣ୍ଟ ଘୋଡାଇଛନ୍ତି କେନ୍ଦ୍ରାପଡା ଏସପି । ତେବେ ସୁରକ୍ଷା ପାଇଁ ଥିବା ପୋଲିସ ବିଭାଗ ଯଦି ଏଭଳି ସୁରକ୍ଷା ଦିଏ ତେବେ ଜନସାଧାରଣ କହିବେ କାହାକୁ ତାକୁ ନେଇ ପ୍ରଶ୍ନ ଉଠିଛି।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
