କେନ୍ଦ୍ରାପଡା: ଜିଲ୍ଲାର ଲୋକସଭା ନିର୍ବାଚନମଣ୍ଡଳୀ ଅନ୍ତର୍ଗତ ରାଜନଗର ନିର୍ବାଚନମଣ୍ଡଳୀ ଏହାର ରାଜନୈତିକ ଦବଦବା ଯୋଗୁଁ ଗୁରୁତ୍ୱ ବହନ କରିଥାଏ । ଏହି ଆସନରୁ ୧୯୭୧ ଓ ୧୯୭୪ ମସିହାରେ ବିଜୟୀ ହୋଇଥିଲେ ପ୍ରବାଦ ପୁରୁଷ ବିଜୁ ପଟ୍ଟନାୟକ । ୧୯୭୧ ମସିହାରେ ରାଜ୍ୟର ୬ଟି ସ୍ଥାନରୁ ବିଜୁବାବୁ ଲଢି ପରାସ୍ତ ହୋଇଥିଲେ ମଧ୍ୟ ରାଜନଗରବାସୀ ନିରାଶ କରିନଥିଲେ ।
ତେବେ ୧୯୭୭ଠାରୁ ୨୦୦୪ ପର୍ଯ୍ୟନ୍ତ ବିଜୁଙ୍କ ଅନୁଗତ ନଳିନୀକାନ୍ତ ମହାନ୍ତି ଏହି ଆସନରୁ ବିଜୟୀ ହୋଇ ଆସୁଥିଲେ । ୨୦୦୯ ମସିହାରେ ସୀମା ନିର୍ଦ୍ଧାରଣ ପରେ ମହାକାଳପଡା ବ୍ଲକ ଏହି ନିର୍ବାଚନମଣ୍ଡଳୀରୁ ଭାଗ ହୋଇଥିଲା । ଏହାପରେ ପଟ୍ଟାମୁଣ୍ଡାଇ ବ୍ଲକ, ପଟ୍ଟାମୁଣ୍ଡାଇ ମ୍ୟୁନିସିପାଲିଟି ଓ ରାଜନଗର ବ୍ଲକକୁ ନେଇ ଗଠନ କରାଯାଇଥିବା ଏହି ନିର୍ବାଚନମଣ୍ଡଳୀର ବର୍ତ୍ତମାନ ବିଧାୟକ ଅଛନ୍ତି ନଳିନୀଙ୍କ ସୁପୁତ୍ର ଅଂଶୁମାନ ମହାନ୍ତି ।
ଇଟିଭି ଭାରତ ସହ ଏକ ସ୍ବତନ୍ତ୍ର ସାକ୍ଷାତକାରରେ ଅଂଶୁମାନ କହିଛନ୍ତି ଯେ ଶିକ୍ଷା ଓ କୃଷି କ୍ଷେତ୍ରରେ ସରକାରୀ ଦଳ ଏବଂ ପ୍ରଶାସନିକ ଅଧିକାରୀଙ୍କ ବୈମାତୃକ ମନୋଭାବ ଯୋଗୁଁ ଏହି ନିର୍ବାଚନମଣ୍ଡଳୀ ଆଜି ଆଗେଇ ପାରିନାହିଁ । ରଙ୍ଗଣି, ତାଳଚୁଆ ଏବଂ ଡାଙ୍ଗମାଳ ଅଞ୍ଚଳରେ ପିଲାଙ୍କର ପାଠପଢିବା ପାଇଁ ଭଲ ବିଦ୍ୟାଳୟଟିଏ ନଥିବାବେଳେ ଏଠାରେ ପାନୀୟ ଜଳର ଘୋର ସମସ୍ୟା ଦେଖାଦେଇଛି । ଏହି ସମସ୍ୟାର ସମାଧାନ ପାଇଁ ସରକାରୀ ସ୍ତରରେ ଉଦ୍ୟମ ହେଉନାହିଁ ।
ଆଗାମୀ ନିର୍ବାଚନରେ ବିଜୟୀ ହେଲେ ସେ ଏହି ସମସ୍ୟାର ସମାଧାନ ଦିଗରେ କାର୍ଯ୍ୟ କରିବେ ବୋଲି ଅଂଶୁମାନ କହିଛନ୍ତି । ଅହଙ୍କାର ଓ ଦୁର୍ନୀତି ବିରୋଧରେ ସ୍ଲୋଗାନ ଦେଇ ନିର୍ବାଚନରେ ଉତ୍ତୀର୍ଣ୍ଣ ହେବା ପାଇଁ ଆଶାବାଦୀ ଅଛନ୍ତି ଅଂଶୁମାନ । ଅବହେଳିତ ଓ ନିଷ୍ପେସିତ ଅବସ୍ଥାରେ ଥିବା ଏହି ନିର୍ବାଚନମଣ୍ଡଳୀର ଦୀର୍ଘସ୍ଥାୟୀ ସମସ୍ୟା ଉପରେ ସେ ଅବଗତ ଅଛନ୍ତି । ଏହିସବୁ ସମସ୍ୟାର ସମାଧାନ ପାଇଁ ସେ ପଦକ୍ଷେପ ନେବେ ବୋଲି କହିଛନ୍ତି ।
ଗତ ୨୦୧୪ ମସିହାରୁ ନିର୍ବାଚିତ ହେବାପରେ ବିଧାୟକ ହାତପାଣ୍ଠିର ସୁବିନିଯୋଗ କରିଥିବା ଓ ସରକାରୀ କଳର ସହଯୋଗ ନପାଇ ପ୍ରାୟ ୧୨ ଲକ୍ଷ ଟଙ୍କାର ପ୍ରକଳ୍ପ ପାଣ୍ଠି ଆଜି ମଧ୍ୟ ପଡିରହିଥିବା ଅଭିଯୋଗ ଆଣିଛନ୍ତି କଂଗ୍ରେସ ବିଧାୟକ ପ୍ରାର୍ଥୀ । ଜିଲ୍ଲାରେ ଚଳିତ ନିର୍ବାଚନ ପାଇଁ ଆଦର୍ଶ ଆଚରଣ ବିଧି ଲାଗୁ ହେବା ପରେ ଅଂଶୁମାନଙ୍କ ବିରୋଧରେ ଆଚରଣ ବିଧି ଉଲ୍ଲଂଘନ ନେଇ ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀଙ୍କ ନିକଟରେ ଦୁଇ ଥର ଅଭିଯୋଗ ହୋଇଛି ।
ଏହା ଉପରେ ସେ କହିଛନ୍ତି ଯେ ତାଙ୍କ ନଜରରେ ସେ ସେଭଳି କୌଣସି କାର୍ଯ୍ୟ କରିନାହାନ୍ତି । ଏହାସହ ଏପରି ଅଭିଯୋଗ ବିଷୟରେ ସେ ଜାଣିନାହାନ୍ତି ବୋଲି କହିଛନ୍ତି । ଆଗାମୀ ନିର୍ବାଚନରେ ନିଜ ବିଜୟ ନେଇ ସେ ଦୃଢ ନିଶ୍ଚିତ ବୋଲି ପ୍ରତିକ୍ରିୟା ଦେଇଛନ୍ତି ରାଜନଗରର ଏହି ଯୁବ ବିଧାୟକ ତଥା କଂଗ୍ରେସର ବିଧାୟକ ପ୍ରାର୍ଥୀ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
