କେନ୍ଦ୍ରାପଡ଼ା: ସ୍ବାଧିନତାର 72 ବର୍ଷ ପରେ କେନ୍ଦ୍ରପଡ଼ାକୁ ଗଡ଼ିଛି ପ୍ରଥମ ରେଳ ଇଞ୍ଜିନ୍ । 1997 ମସିହାରେ ହରିଦାସପୁର-ପାରାଦ୍ବୀପ ରେଳପଥ ପ୍ରକଳ୍ପକୁ ମଳିଥିଲା ମଞ୍ଜୁରୀ । ଆଉ ଏହା କାର୍ଯ୍ୟକାରୀ ହେବାକୁ ଲାଗିଯାଇଛି ଦୀର୍ଘ 22 ବର୍ଷ । ଡେରିରେ ହେଉ ପଛେ ଟ୍ରାକରେ ପ୍ରଥମକରି ଟ୍ରେନ ଇଞ୍ଜିନ ଗଡ଼ୁଥିବାର ଦେଖି ଜିଲ୍ଲାବାସୀଙ୍କ ମନରେ ସଞ୍ଚାର ହୋଇଛି ନୂଆ ଆଶା ।
ସମୟ ଅପରାହ୍ନ ସାଢେ ଗୋଟେ । ପ୍ରଥମେ ବାଜିପଡ଼ା ନିକଟରେ ଅଟକିଥିଲା ରେଳ ଇଞ୍ଜିନ । ପରେ ସେଠାରୁ ଗୋପ ଛକରେ ଥିବା ପ୍ଲାଟଫର୍ମକୁ ପରୀକ୍ଷାମୂଳକ ଭାବେ ଆରମ୍ଭ କରିଥିଲା ଯାତ୍ରା । ଜିଲ୍ଲାରେ ରେଳପଥ ନିର୍ମାଣ କାର୍ଯ୍ୟ କରୁଥିବା ଦୁଇଟି କମ୍ପାନୀ ମଧ୍ୟରୁ ଗୋଟିଏ କମ୍ପାନୀର କାମ ଶେଷ ହୋଇଥିବାରୁ ଶନିବାର ପରୀକ୍ଷାମୂଳକ ଭାବେ ଗଡ଼ିଛି ଟ୍ରେନ । ରେଳପଥ ନିର୍ମାଣ ପରେ ଜିଲ୍ଲାର ଭିତ୍ତିଭୂମି ବିକାଶ ହେବା ସହ 12 ଲକ୍ଷରୁ ଊର୍ଦ୍ଧ୍ବ ଜନସାଧାରଣ ଓ ବ୍ୟବସାୟୀ ଉପକୃତ ହେବା ନେଇ ଆଶା ବାନ୍ଧି ବସିଛନ୍ତି ସ୍ଥାନୀୟ ଲୋକେ ।
ଟ୍ରାକରେ ପରୀକ୍ଷାମୂଳକ ଇଞ୍ଜିନ ଗଡ଼ିସାରିଥିବାବେଳେ ଏବେ ଅପେକ୍ଷା କେବେ ଗଡିବ ଟ୍ରେନ ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
