କେନ୍ଦ୍ରାପଡା: ଆଜି (ଶନିବାର) ସାରା ଦେଶରେ ସମ୍ବାଦପତ୍ର ଓ ସାମ୍ବାଦିକ ମାନଙ୍କ ପାଇଁ ପାଳିତ ହେଉଛି ଜାତୀୟ ପ୍ରେସ୍ ଦିବସ । ବର୍ତ୍ତମାନ ସମୟରେ ଗଣତନ୍ତ୍ରର ଚତୁର୍ଥ ସ୍ତମ୍ଭ ଭାବରେ ପରିଚିତ ଗଣମାଧ୍ୟମ ବାସ୍ତବିକ କେତେ ସୁରକ୍ଷିତ ସେକଥା ସମସ୍ତେ ଜାଣନ୍ତି । ତେବେ କେନ୍ଦ୍ରାପଡ଼ା ଜିଲ୍ଲାରେ ଚଳିତବର୍ଷ ସାମ୍ବାଦିକ ମାନଙ୍କ ଉପରେ ଘଟିଥିବା ତିନୋଟି ଘଟଣା ଜଣାଇଦେଉଛି କେନ୍ଦ୍ରାପଡ଼ାରେ କେତେ ସୁରକ୍ଷିତ ସାମ୍ବାଦିକ ? ଏନେଇ ଦେଖନ୍ତୁ ETV BHARATର ସ୍ପେଶାଲ ରିପୋର୍ଟ ।
କେନ୍ଦ୍ରାପଡ଼ା ଜିଲ୍ଲା ଗ୍ରାମ୍ୟ ଉନ୍ନୟନ ବିଭାଗ କକ୍ଷରେ ପାଳିତ ହୋଇଛି ଜାତୀୟ ପ୍ରେସ ଦିବସ । କିନ୍ତୁ କେନ୍ଦ୍ରାପଡ଼ା ଜିଲ୍ଲାରେ ସାମ୍ବାଦିକ ମାନଙ୍କ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । 2019 ମସିହା ଜୁଲାଇ ମାସ 17 ତାରିଖ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପାଟକୁରା ନିର୍ବାଚନ ମଣ୍ଡଳୀକୁ ପ୍ରଚାର ସମୟରେ ଜନୈକ ଗଣମାଧ୍ୟମ ପ୍ରତିନିଧିଙ୍କୁ କେନ୍ଦ୍ରାପଡ଼ା ଆରକ୍ଷୀ ଅଧିକ୍ଷକ ନୀତିଶେଖର ଦୁଃର୍ବ୍ୟବହାର କରିଥିବା ନେଇ ସାରା ରାଜ୍ୟରେ ପ୍ରତିକ୍ରିୟା ପ୍ରକାଶ ପାଇଥିଲା ।
ଏହାର ମାତ୍ର କିଛିଦିନ ପରେ ପୁଣି ଜଣେ ମହିଳା ସାମ୍ବାଦିକାଙ୍କୁ ଏକ ନିର୍ଦ୍ଧିଷ୍ଟ ରାଜନୈତିକ ଦଳର ସମର୍ଥକମାନେ ଆକ୍ରମଣ କରିଥିଲେ ଏବଂ ଏହାକୁ ନେଇ ପାଟକୁରା ଥାନାରେ ଏକ ମାମଲା ଦାଏର କରାଯାଇଥିଲା । ହେଲେ ଏହାର ଫଳାଫଳ ଏପର୍ଯ୍ୟନ୍ତ ଫାଇଲ ତଳେ ଚାପି ହୋଇରହିଥିବା ଦେଖାଯାଇଛି।
ତେବେ ଜୁଲାଇ ମାସରେ ଜିଲ୍ଲାରେ ଦୁଇଜଣ ସାମ୍ବାଦିକଙ୍କୁ କେନ୍ଦ୍ରାପଡ଼ାରେ ଆକ୍ରମଣ ସୂଚାଉଛି କେନ୍ଦ୍ରାପଡ଼ାରେ ସାମ୍ବାଦିକ କେତେ ସୁରକ୍ଷିତ? ସାମ୍ବାଦିକ ମାନେ ବିଭିନ୍ନ ସମୟରେ ଘଟୁଥିବା ଆକ୍ରମଣ ଓ ଆକ୍ରୋଶ ପ୍ରତିବାଦରେ ଦାବିପତ୍ର ପ୍ରଦାନ କରିଛନ୍ତି କିନ୍ତୁ ଫଳାଫଳ କଣ ?
ବହୁଚର୍ଚ୍ଚିତ କେନ୍ଦ୍ରାପଡ଼ା କୋ ଅପରେଟିଭ ସୋସାଇଟିର ସଭାପତି ପ୍ରମୋଦ ସାହୁଙ୍କ ବିରୋଧରେ ଖବର ପରିବେଷଣ କରିବାରୁ ଜନୈକ ବୈଦ୍ୟୁତିକ ଗଣମାଧ୍ୟମଙ୍କୁ ପ୍ରକାଶ ଜେନା ନାମକ ଜଣେ ବ୍ୟକ୍ତି ଫୋନ ଯୋଗେ ହତ୍ୟା ଧମକ ଦେଇଥିଲେ । ଏହା ସହ କିଛି ଅସହିଷ୍ଣୁ ବ୍ୟକ୍ତି ମାନଙ୍କ ଦ୍ବାରା ସାମାଜିକ ଗଣମାଧ୍ୟମରେ ତାଙ୍କର ଚରିତ୍ର ସଂହାର କରିବା ନେଇ ଉକ୍ତ ସାମ୍ବାଦିକ କେନ୍ଦ୍ରାପଡ଼ା ସଦର ଥାନାରେ ଏତଲା ଦିଆଯାଇଥିଲେ ମଧ୍ୟ ଫଳ ଶୂନ ।
ସେହିପରି ଗତ କିଛିଦିନ ତଳେ କେନ୍ଦ୍ରାପଡ଼ା ସାଂସଦ ଅନୁଭବ ମହାନ୍ତି ପୁଣି ଜଣେ ସାମ୍ବାଦିକଙ୍କୁ ଦୁର୍ବ୍ୟବହାର କରିବା ଘଟଣା ସମ୍ପର୍କରେ ସାରା ରାଜ୍ୟରେ ସାମ୍ବାଦିକଙ୍କ ପ୍ରତିକ୍ରିୟା ପ୍ରକାଶ ପାଇବା ପରେ ସାଂସଦ ଏହି ଘଟଣାକୁ ନେଇ ଦୁଃଖ ପ୍ରକାଶ କରିଥିଲେ । ଗୋଟିଏ ପଟେ ସାମ୍ବାଦିକଟିଏ ନିଚ୍ଛକ ଖବର ପରିବେଷଣ କରିବା ପାଇଁ ନିଜକୁ ଜଳାଞ୍ଜଳି ଦେଉଥିବା ବେଳେ ଅନ୍ୟପଟେ ସାଧାରଣ ଜନତାଙ୍କ ଠାରୁ ଆରମ୍ଭ କରି ଆରକ୍ଷୀ ଅଧିକାରୀ, ଲୋକ ପ୍ରତିନିଧି, ସମର୍ଥକଙ୍କ ଆକ୍ରୋଶର ଶିକାର ହେବାକୁ ପଡିଥାଏ ।
ବର୍ଷକରେ ଥରୁଟିଏ ଜାତୀୟ ପ୍ରେସ ଦିବସ ପାଳନ କରି ରାଜ୍ୟ ସରକାର ନିଜର ଦାୟିତ୍ବ ଶେଷ କରୁଥିବା ବେଳେ ସାମ୍ବାଦିକ ମାନଙ୍କ ସୁରକ୍ଷା ପାଇଁ କୌଣସି ଖାସ ପଦକ୍ଷେପ ନେଉ ନଥିବା ବେଶ ଦୁଃଖର ବିଷୟ । ତେଣୁ ଶନିବାର ଜାତୀୟ ପ୍ରେସ ଦିବସକୁ କେବଳ ପାଳନ କରିବାରେ ସୀମିତ ନରଖି ସାମ୍ବାଦିକ ମାନଙ୍କ ସୁରକ୍ଷା ଦିଗରେ ଏକ କଡା ଆଇନ ପ୍ରଣୟନ ନେଇ ଦାବି ହୋଇଛି।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
