କେନ୍ଦ୍ରାପଡା: ଆଳି ଥାନାର ପାଟ୍ରୋଲିଂ ଗାଡିକୁ ସଂଘବଦ୍ଧ ଆକ୍ରମଣ ଘଟଣାରେ ଏପର୍ଯ୍ୟନ୍ତ ପୋଲିସ ହାତ ଖାଲି । ଘଟଣାକୁ ୨୪ଘଣ୍ଟା ପୁରିବାକୁ ବସିଥିଲେ ମଧ୍ୟ ପୋଲିସ ଆକ୍ରମଣକାରୀଙ୍କୁ ଧରିବାରେ ସଫଳ ହୋଇନାହିଁ।
ସୂଚନା ଅନୁଯାୟୀ, କେନ୍ଦ୍ରାପଡା ଜିଲ୍ଲା ଆଳି ଥାନା ଗୌଡପାଟଣା ଗାଁ ନିକଟରେ ଗୁରୁବାର ସନ୍ଧ୍ୟାରେ ପୋଲିସ ପାଟ୍ରୋଲିଂ ଗାଡି ଉପରକୁ ସଙ୍ଘବଦ୍ଧ ଆକ୍ରମଣ ହୋଇଥିଲା। ଫଳରେ ପୋଲିସ ଗାଡିର କାଚ ଭାଙ୍ଗି ପୋଲିସ କର୍ମଚାରୀ ଆହତ ହୋଇଥିଲେ । ଗାଡିରେ ଥିବା ୪ ଜଣ ଆହତ ପୋଲିସ କର୍ମଚାରୀଙ୍କୁ ଆଳି ଡାକ୍ତରଖାନାରେ ଭର୍ତ୍ତି କରାଯିବା ପରେ କେନ୍ଦ୍ରାପଡା ଜିଲ୍ଲା ମୁଖ୍ୟ ଚିକିତ୍ସାଳୟକୁ ଅଧିକ ଚିକିତ୍ସା ନିମନ୍ତେ ପଠାଯାଇଥିଲା ।
ଗୁରୁବାର ସକାଳେ ପୋଲିସ ଗୌଡପାଟଣା ଗାଁରେ ପୂଜା ହେଉଥିବା ଗଣେଶଙ୍କ ମେଢ ନିକଟରୁ ଏକ ମାଇକ୍ ସେଟ୍ ଉଠାଇ ଆଣିଥିଲା । ବିନା ପ୍ରଶାସନିକ ଅନୁମତିରେ ମାଇକ ବଜାଇବା ଅଭିଯୋଗ କରିଥିଲା ପୋଲିସ। ସମ୍ଭବତଃ ଏହି ମାଇକ ଜବତ ଘଟଣାକୁ କେନ୍ଦ୍ରକରି ପୋଲିସ ଉପରେ ଆକ୍ରମଣ ହୋଇଥାଇପାରେ ବୋଲି କୁହାଯାଉଛି । ଘଟଣାସ୍ଥଳରେ ଉତ୍ତେଜନା ଥିବା ଅନୁଭବ କରି ପଟ୍ଟାମୁଣ୍ଡାଇ ଏସଡିପିଓ ରଞ୍ଜନ ଦେ ଘଟଣା ସ୍ଥଳରେ ପହଞ୍ଚି ପରିସ୍ଥିତି ଅନୁଧ୍ୟାନ କରି ଫେରି ଆସିଥିବାବେଳେ ଘଟଣାସ୍ଥଳରେ ଏକ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
