କେନ୍ଦ୍ରାପଡା: ମହାକାଳପଡା ଥାନାରେ ହାଜତ ମୃତ୍ୟୁ ଘଟଣାରେ କେନ୍ଦ୍ରାପଡା ଏସଡିଜେଏମଙ୍କ କୋର୍ଟରେ ଆତ୍ମ ସମର୍ପଣ କଲେ ତତ୍କାଳୀନ ମହାକାଳପଡା ଆଇଆଇସି ଶ୍ୟାମଘନ ବେହେରା । ଜାମିନ ନାମଞ୍ଜୁର କରିଛନ୍ତି କୋର୍ଟ ।
ସୂଚନା ଅନୁଯାୟୀ 2018 ମସିହା ଅଗଷ୍ଟ 25 ତାରିଖରେ ମାର୍ଶାଘାଇ ଆଦମପୁର ଗାଁର ଅବିନାଶ ପାଇଟାଲ ଓରଫ ମୂଷାଙ୍କୁ ତତ୍କାଳୀନ ମହାକାଳପଡ଼ା ଆଇଆଇସି ଶ୍ୟାମଘନ ବେହେରା ପିଟିପିଟି ହତ୍ୟା କରିଥିବା ଅଭିଯୋଗ ହୋଇଥିଲା । ଅଭିଯୁକ୍ତ ଶ୍ୟାମଘନ ସେହିଦିନ ଠାରୁ ପୋଲିସ ଆଖିରେ ଧୂଳିଦେଇ ଲୁଚି ରହିଥିବାବେଳେ ବାରମ୍ବାର ଉଚ୍ଚ ନ୍ୟାୟାଳୟ ଜାମିନ ଆବେଦନ କରିଥିଲେ ।
ତେବେ ଉଚ୍ଚ ନ୍ୟାୟାଳୟ ଶ୍ୟାମଘନର ଜାମିନ ଆବେଦନ ତଳ କୋର୍ଟରେ ଶୁଣାଣି ହେବ ବୋଲି ନିର୍ଦ୍ଦେଶ ଦେବାପରେ ମଙ୍ଗଳବାର ଶ୍ୟାମଘନ ଆତ୍ମସମର୍ପଣ କରିଥିବା ସୂଚନା ଦେଇଛନ୍ତି ମୃତକଙ୍କ ପକ୍ଷରୁ କେସ ଲଢ଼ୁଥିବା ଓକିଲ । କୋର୍ଟରେ ହାଜର ହେବାକୁ ବାରମ୍ବାର ନୋଟିସ ଯାଉଥିଲେ ମଧ୍ୟ ଶ୍ୟାମଘନ କୋର୍ଟରେ ହାଜର ହେଉନଥିବାରୁ ସିଆରପିସି 83, 84 ଅନୁଯାୟୀ ଚଳିତଥର କୋର୍ଟରେ ହାଜର ନହେଲେ ତାଙ୍କ ସମ୍ପତ୍ତି ବାଜ୍ୟାପ୍ତି କରାଯିବା ପାଇଁ ନିର୍ଦ୍ଦେଶ ହୋଇଥିଲା । ପରେ ବାଧ୍ୟହୋଇ ମଙ୍ଗଳବାର କୋର୍ଟରେ ଆତ୍ମସମର୍ପଣ କରିଛନ୍ତି ଶ୍ୟାମଘନ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
