କେନ୍ଦ୍ରାପଡା: ପୂର୍ବତନ ମନ୍ତ୍ରୀ ତଥା ବରିଷ୍ଠ ବିଜେପି ନେତା ବିଜୟ ମହାପାତ୍ରଙ୍କ ଘରେ ଅଗ୍ନିକାଣ୍ଡ । କେନ୍ଦ୍ରାପଡା ଜିଲ୍ଲା ଗରଦପୁର ବ୍ଲକ ତଳକୁସୁମାରେ ଥିବା ପୈତୃକ ଘରେ ଭୟଙ୍କର ଅଗ୍ନିକାଣ୍ଡ ହୋଇଛି । ଘର ସହ ଆସବାବପତ୍ର ଜଳି ଯାଇଛି । ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଛି । ସର୍ଟ ସର୍କିଟ କାରଣରୁ ଅଗ୍ନିକାଣ୍ଡ ହୋଇଥିବା ଅନୁମାନ କରାଯାଉଛି ।
ହଠାତ୍ ନିଆଁ ଲାଗିବା ଦେଖି ଆଖି ଖୋଲିବା ବେଳକୁ ସବୁ କିଛି ଛାରଖାର ହୋଇଯାଇଥିଲା । ବାପ ଅଜା ଅମଳର ଘର ପୋଡି ପାଉଁଶ ହୋଇଛି । ଓଡିଶା ରାଜନୀତିର ଚିହ୍ନାମୁହଁ ତଥା ପୂର୍ବତନ ମନ୍ତ୍ରୀ ଓ ବରିଷ୍ଠ ବିଜେପି ନେତା ବିଜୟ ମହାପ୍ରାତ୍ରଙ୍କ କେନ୍ଦ୍ରାପଡା ଜିଲ୍ଲା ଗରଦପୁର ବ୍ଲକ ଅନ୍ତର୍ଗତ ତଳକୁସୁମା ପଞ୍ଚାୟତରେ ପୈତୃକ ଘର ରହିଛି । ସୋମବାର ଦିନ ପ୍ରାୟ ୧୨ଟା ସମୟରେ ବାସଭବନରେ ଅଗ୍ନିକାଣ୍ଡ ଘଟିଥିଲା । ଏହି ଅଗ୍ନିକାଣ୍ଡରେ ବିଜୟ ମହାପାତ୍ରଙ୍କ ରହିଥିବା ଚାଳ ଛପର ଘରଟି ଜଳି ଯାଉଥିବା ସ୍ଥାନୀୟ ଲୋକ ଦେଖିବା ପରେ ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ । ଏହା ସହ କୋରୁଆ ଅଗ୍ନିଶମ ବାହୀନିକୁ ଖବର ଦେଇଥିଲେ।
ଏହା ବି ପଢନ୍ତୁ...ଦଇବ ସାଧିଲା ଦାଉ, କୁନି କାନ୍ଧରେ ପରିବାର ଭାର
ଗ୍ରାମବାସୀ ଅଗ୍ନିକାଣ୍ଡ ଘଟିଥିବା ଘରୁ ଅନେକ ସାମଗ୍ରୀ ବାହାର କରି ଦେଇଥିବାବେଳେ, ବହୁ ସାମଗ୍ରୀ ନଷ୍ଟ ହୋଇଯାଇଛି । ଖବରପାଇ ଘଟଣା ସ୍ଥଳରେ କୋରୁଆ ଅଗ୍ନିଶମ ବାହୀନି ପହଞ୍ଚି ନିଆଁକୁ ଆୟତ କରିଥିଲା । ପରେ ଖବର ପାଇ ବିଜୟ ମହାପାତ୍ର ତାଙ୍କ ତାଳକୁସୁମା ସ୍ଥିତ ବାସଭବନରେ ପହଞ୍ଚିଥିବା ବେଳେ ଜଳି ଯାଇଥିବା ପୈତୃକ ଘରୁ ଅତୀତର ସ୍ମୃତି ସାଉଁଟିଥିଲେ । ତେବେ ବିଦ୍ୟୁତ୍ ସର୍ଟ ସର୍କିଟ ଯୋଗୁଁ ଏହି ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଥିବାବେଳେ ବିଜୟଙ୍କ ସମର୍ଥକଙ୍କ ବିଭିନ୍ନ ସାମାଜିକ ଗଣମାଧ୍ୟମରେ ଭାଇରାଲ ହେଉଥିବା ପୋଷ୍ଟ ଅନ୍ୟ ଦିଗକୁ ଅଙ୍ଗୁଳି ନିର୍ଦ୍ଦେଶ କରୁଛି । ବିଜୟ ମହାପାତ୍ରଙ୍କ ଗାଁ ତଳକୁସୁମା ପଞ୍ଚାୟତରେ 4 ବଖରା ଚାଳ ଛପର ଓ 4 ବଖରା କୋଠା ଘର ରହିଛି । ଘରେ କେହି ରହୁ ନଥିବାକୁ ଅଧିକାଂଶ ସମୟ ଘର ତାଲା ପଡୁଥିଲା ।
ଇଟିଭି ଭାରତ, କେନ୍ଦ୍ରାପଡା
