କେନ୍ଦ୍ରାପଡା: ଜବରଦଖଲକାରୀଙ୍କ କବଳରୁ ମୁକ୍ତ ହେଲା ସରକାରୀ ଜମି । କେନ୍ଦ୍ରାପଡା ଜିଲ୍ଲା ଡେରାବିଶ ତହସିଲ ଅଧୀନ ଚାଟରାଚକଡା ଅଞ୍ଚଳରେ ହୋଇଛି ଜବରଦଖଲ ଉଚ୍ଛେଦ । ହାଇକୋର୍ଟଙ୍କ ନିର୍ଦ୍ଦେଶନାମା ପରେ ସରକାରୀ ଜାଗାକୁ ବେଆଇନ ଭାବେ ଜବରଦଖଲ କରି ଦୋକାନ ଓ ଘର କରିଥିବା ଲୋକଙ୍କୁ ନୋଟିସ କରାଯାଇଥିଲା ।
ଦୁଇ ଥର ନୋଟିସ ପରେ ଡେରାବିଶ ଅତିରିକ୍ତ ତହସିଲଦାର ତଥା ଏକଜେକ୍ୟୁଟିଭ ମାଜିଷ୍ଟ୍ରେଟଙ୍କ ଉପସ୍ଥିତିରେ ଜବରଦଖଲ ହୋଇଥିବା ଘର ଓ ଦୋକାନକୁ ଜେସିବି ଲଗାଇ ଭଙ୍ଗାଯାଇଛି l ଚାଟରାଚକଡା ଅଞ୍ଚଳର ତହସିଲ ଅଫିସ ସାମ୍ନା ଓ ନିକଟବର୍ତ୍ତୀ ଅଞ୍ଚଳ ଗୁଡିକରେ ଜବରଦଖଲ ହୋଇଥିବା ଜାଗାକୁ ଖାଲି କରାଯାଇଛି । ପ୍ରଥମେ ଜବରଦଖଲକାରୀଙ୍କୁ ତହସିଲଦାର ଉଚ୍ଛେଦ ପାଇଁ ନୋଟିସ କରିଥିଲେ l
ତେବେ ଜବରଦଖଲକାରୀମାନେ ତହସିଲଦାରଙ୍କ ନିର୍ଦ୍ଦେଶକୁ ଅବମାନନା କରି ହାଇକୋର୍ଟରେ ମାମଲା ପହଞ୍ଚାଇ ଥିଲେ । ତେବେ ହାଇକୋର୍ଟଙ୍କ ହସ୍ତକ୍ଷେପ ପରେ ଏବେ ଉଚ୍ଛେଦ କାର୍ଯ୍ୟ କରାଯାଇଛି । ଆଇନଶୃଙ୍ଖଳା ଦୃଷ୍ଟିକୋଣରୁ ଡେରାବିଶ ପୋଲିସ ଓ ଏକ ପ୍ଲାଟୁନ ଫୋର୍ସର ଉପସ୍ଥିତିରେ ଉଚ୍ଛେଦ କାର୍ଯ୍ୟ କରାଯାଇଥିବା ବେଳେ ଏନେଇ ଅତିରିକ୍ତ ତହସିଲଦାର କୌଣସି ପ୍ରତିକ୍ରିୟା ଦେଇନାହାନ୍ତି ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
