କେନ୍ଦ୍ରାପଡା: ଜିଲ୍ଲାପାଳଙ୍କ ନିର୍ଦ୍ଦେଶରେ ପଟ୍ଟାମୁଣ୍ଡାଇ ପୌରପରିଷଦ ଅଧୀନରେ ଥିବା ବେଆଇନ ଉଠା ଦୋକାନୀଙ୍କୁ ହଟାଇଛି ପ୍ରଶାସନ । ଦୀର୍ଘ ଦିନର ଟ୍ରାଫିକ ସମସ୍ୟା ପାଇଁ ଏହି ଉଠା ଦୋକାନୀ ମାନଙ୍କୁ ମୁଖ୍ୟତଃ ଦାୟୀ କରାଯାଉଥିବା ବେଳେ ଥଇଥାନ ବିନା ଏଭଳି ଉଠାଇବାକୁ ନେଇ ଅସନ୍ତୋଷ ଜାହିର କରିଛି ପଟ୍ଟାମୁଣ୍ଡାଇ ଉଠାଦୋକାନୀ ସଂଘ ।
ଶୁକ୍ରବାର ଅପରାହ୍ଣରେ ପଟ୍ଟାମୁଣ୍ଡାଇ ତହସିଲଦାର, ପୌରପରିଷଦ କାର୍ଯ୍ୟନିର୍ବାହୀ ଅଧିକାରୀ ଏବଂ ଥାନାଧିକାରୀଙ୍କ ଉପସ୍ଥିତିରେ ଏହି ବେଆଇନ ଉଠାଦୋକାନ ଗୁଡିକୁ ହଟାଯାଇଛି । ବେଆଇନ ଉଠା ବ୍ୟବସାୟୀଙ୍କୁ ଉଠାଇବା ବେଳେ ଉତ୍ତେଜନା ଦେଖାଯିବାରୁ ପୋଲିସ ପକ୍ଷରୁ ଦୁଇ ପ୍ଲାଟୁନ ଫୋର୍ସ ମୁତୟନ କରାଯାଇଥିଲା ।
ଉଠାଦୋକାନୀମାନଙ୍କୁ ଭେଣ୍ଡିଂ ଜୋନ୍ ମାଧ୍ୟମରେ ଦୋକାନ ଗୃହ ଯୋଗାଇ ଦିଆଯିବ ବୋଲି ପୌରପରିଷଦ କାର୍ଯ୍ୟନିର୍ବାହୀ ଅଧିକାରୀ ପ୍ରତିଶୃତି ଦେଇଛନ୍ତି । ତେବେ ଏହି ଜବରଦଖଲ ଉଚ୍ଛେଦ ପରେ ଟ୍ରାଫିକ ସମସ୍ୟାର ସମାଧାନ ହୋଇପାରିବ ବୋଲି ଆଶା ରଖିଛନ୍ତି ସ୍ଥାନୀୟ ଜନସାଧାରଣ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
