କେନ୍ଦ୍ରାପଡା: ଆଗକୁ ଆସିଲା ଗଣଶିକ୍ଷା ବିଭାଗର ଦାରୁଣ ଚିତ୍ର । ପାଠ ପଢା ନହୋଇ ପରୀକ୍ଷା ଦେବେ ଛାତ୍ରଛାତ୍ରୀ । ଆଗକୁ ଅର୍ଦ୍ଧବାର୍ଷିକ ପରୀକ୍ଷା ଥିବା ବେଳେ ପାଠ ପଢା ନହେବା ଅଭିଭାବକ ମାନଙ୍କୁ ଯେତିକି ଅସନ୍ତୁଷ୍ଟ କରିଛି ସେତିକି କ୍ଷୁବ୍ଧ ମଧ୍ୟ କରିଛି।
ସଭିଏଁ ପଢନ୍ତୁ, ସଭିଏଁ ବଢ଼ନ୍ତୁ ସ୍ଲୋଗାନ ଫେଲ ମାରିଛି କେନ୍ଦ୍ରାପଡ଼ା ଜିଲ୍ଲା ଡେରାବିଶ ବ୍ଲକ ଶିକ୍ଷା କ୍ଷେତ୍ରରେ । ପ୍ରଥମରୁ ଅଷ୍ଟମ ଶ୍ରେଣୀ ପାଇଁ ନିଯୁକ୍ତ ଅଛନ୍ତି 4ଜଣ ଶିକ୍ଷକ ଓ ଶିକ୍ଷୟିତ୍ରୀ । କିନ୍ତୁ ବାସ୍ତବରେ କେହି ବି ଶିକ୍ଷକ ଓ ଶିକ୍ଷୟିତ୍ରୀ ଠିକ ଭାବେ ଆସୁନଥିବାରୁ ଛାତ୍ରଛାତ୍ରୀ ମାନଙ୍କ ଭବିଷ୍ୟତ ଏବେ ଅନ୍ଧକାର ମୁହାଁ । ଡେରାବିଶ୍ ବ୍ଲକ ହଳଦିଆ ଉର୍ଦ୍ଦୁ ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟରେ ସଂଖ୍ୟାଲଘୁ ସମ୍ପ୍ରଦାୟର ପ୍ରାୟ 80ଜଣ ଛାତ୍ରଛାତ୍ରୀ ପାଠ ପଢ଼ୁଥିବା ବେଳେ ମାତ୍ର ତିନିଜଣ ଶିକ୍ଷକ ପାଠ ପଢାଉଥିବା ଦୃଶ୍ୟ କଏଦ ହୋଇଛି ଆମ କ୍ୟାମେରାରେ । 28ତାରିଖରୁ ଆରମ୍ଭ ହେଉଛି ଅର୍ଦ୍ଧବାର୍ଷିକ ପରୀକ୍ଷା । ହେଲେ ପାଠ ପଢାଯାଇନଥିବା ଅଭିଯୋଗ ହୋଇଛି ।
ସେପଟେ ଅନ୍ୟଜଣେ ଶିକ୍ଷୟିତ୍ରୀ ଲଳିତା ବେଉରା ପ୍ରଧାନ ଶିକ୍ଷୟତ୍ରୀଙ୍କୁ ନଜଣାଇ ଦୀର୍ଘଦିନ ଧରି ବିଦ୍ୟାଳୟକୁ ଆସୁନଥିବାରୁ ପାଠପଢ଼ା ବ୍ୟାହତ ହୋଇଛି । ଅପରପକ୍ଷରେ ଗତ 14 ତାରିଖରେ ଡେରାବିଶ୍ ବିଇଓ ପ୍ରଧାନଶିକ୍ଷୟତ୍ରୀଙ୍କୁ ଚିଠି ଲେଖି ଉକ୍ତ ଶିକ୍ଷୟିତ୍ରୀ ଲଳିତା ବେଉରାଙ୍କୁ ଗ୍ରାଉଣ୍ଡ ଫ୍ଲୋର ରେ କ୍ଳାସ ନେବା ପାଇଁ କହିଛନ୍ତି । ତେବେ ବିନା ଛୁଟି ଦରଖାସ୍ତରେ ଛୁଟିରେ ଥିବା ବେଳେ ଦରମା କିନ୍ତୁ ପାଇଛନ୍ତି ଶିକ୍ଷୟିତ୍ରୀ । ଶିକ୍ଷା ବିଭାଗର ଗାଇଡ଼ଲାଇନକୁ ପାଦରେ ଆଡେଇ ବିନା ଅନୁମତିରେ ଛୁଟିରେ ଥିବା ଶିକ୍ଷୟିତ୍ରୀଙ୍କୁ ବିଇଓ କିପରି ଦରମା ପ୍ରଦାନ କଲେ ତାହା ଆଶ୍ଚର୍ଯ୍ୟ କରିଛି । ଏନେଇ ବିଇଓଙ୍କୁ ପଚାରିବାରୁ ସେ କ୍ୟାମେରା ସାମ୍ନାରେ କୌଣସି ମନ୍ତବ୍ୟ ଦେବାକୁ ସିଧା ମନା କରି ଦେଇଛନ୍ତି ।
ଶିକ୍ଷକ, ଶିକ୍ଷୟିତ୍ରୀ ଓ ବ୍ଲକଶିକ୍ଷା ବିଭାଗ ମଧ୍ୟରେ ସମନ୍ବୟ ଠିକ ଭାବେ ରହୁନଥିବାରୁ ଛାତ୍ରଛାତ୍ରୀ ମାନଙ୍କର ଭବିଷ୍ୟତ ଅନ୍ଧାର ଆଡକୁ ଚାଲିଯାଉଥିବା ବେଳେ ପ୍ରଶାସନର ଏହି ଘଟଣାରେ ହସ୍ତକ୍ଷେପ ଏକାନ୍ତ ଆବଶ୍ୟକ ହୋଇପଡିଛି।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
