କେନ୍ଦ୍ରାପଡ଼ା: ସମୁଦ୍ର ଗର୍ଭରେ ଲୀନ ହୋଇଛି ଉପକୂଳବର୍ତ୍ତୀ ସାତଭାୟା ପଞ୍ଚାୟତର ବିସ୍ତୀର୍ଣ୍ଣ ଅଞ୍ଚଳ । ଜୀବଜଗତରେ ବୃକ୍ଷ ଅଭାବ ଯୋଗୁଁ ଅମ୍ଳଜାନର ଅଭାବ ଏବଂ ଅଙ୍ଗାରକାମ୍ଳ ବୃଦ୍ଧି ସମଗ୍ର ବିଶ୍ବକୁ ସ୍ତବ୍ଧ କରୁଥିବାବେଳେ ସମୁଦ୍ରର କରାଳ ରୂପରୁ ବର୍ତ୍ତିବାକୁ ଜୀବନ ଧରି ସ୍ଥାନାନ୍ତର ହେଉଛନ୍ତି ଲୋକେ । ତେବେ କେନ୍ଦ୍ରାପଡ଼ା ସାତଭାୟା ପଞ୍ଚାୟତରେ ସ୍ଥାନାନ୍ତର ହୋଇଥିବା ୬୦୦ରୁ ଊର୍ଦ୍ଧ୍ବ ପରିବାର ଗାଁ ଛାଡି ବଗପାଟିଆରେ ବିସ୍ଥାପିତ ଜୀବନ ବିତାଉଥିବାବେଳେ ଅନେକ ପରିବାର ମୁଣ୍ଡ ଗୁଞ୍ଜିବା ପାଇଁ ଖୋଜୁଛନ୍ତି ଭିଟାମାଟି ।
ମାଡ଼ି ଆସୁଛି ଜଳ ରାକ୍ଷସ
ଗତ ୫୦ ବର୍ଷ ମଧ୍ୟରେ କେନ୍ଦ୍ରାପଡ଼ା ରାଜନଗର ବ୍ଲକ ଅନ୍ତର୍ଗତ ସାତଭାୟା ନିକଟରେ ଥିବା ସମୁଦ୍ର ଡେଇଁଛି ୧୫ କିଲୋମିଟରରୁ ଉର୍ଦ୍ଧ୍ବ ବାଟ । ୧୯୭୧ ମସିହାରେ ପ୍ରଥମଥର ପାଇଁ ସମୁଦ୍ର ଏହାର କୂଳ ଲଙ୍ଘନ କରି ନେଇଥିଲା ଶତାଧିକ ଜୀବନ । ସେହିଦିନ ଠାରୁ ଆଜିଯାଏଁ ପଛକୁ ଫେରିନି ଜଳ ରାକ୍ଷସ । ଏପରିକି ଦରିଆ ରାଣୀ ମା' ପଞ୍ଚୁବରାହୀଙ୍କ ମନ୍ଦିରର ଆଉ ମାତ୍ର କିଛି ଅଂଶ ବଞ୍ଚିଯାଇଥିବା ଗତ କିଛିଦିନ ତଳେ ଦେଖିବାକୁ ମିଳିଛି । ୧୯୯୦ ମସିହାରୁ ୨୦୧୬ ମସିହା ପର୍ଯ୍ୟନ୍ତ ଓଡିଶା ଏହାର ୨୮% ଭୂମି ସମୁଦ୍ର ବୁକୁରେ ହରାଇଥିବା ବେଳେ କେବଳ କେନ୍ଦ୍ରାପଡ଼ା ଜିଲ୍ଲାର ୩୧ କିଲୋମିଟର ଭୂଭାଗ ସମୁଦ୍ର ଗର୍ଭରେ ଲୀନ ହୋଇଥିବା National Center for Coastal Research, Chennai ର ଏକ ଅଧ୍ୟୟନରୁ ଜଣାପଡିଛି ।
ବିସ୍ଥାପିତଙ୍କୁ ମିଳୁନି ଘର
୨୦୦୮ରୁ ୨୦୧୭ ମସିହା ମଧ୍ୟରେ ୫୭୧ ପରିବାରକୁ କେନ୍ଦ୍ରାପଡ଼ା ଜିଲ୍ଲା ପ୍ରଶାସନ ରାଜ୍ୟ ସରକାରଙ୍କ ନିର୍ଦ୍ଦେଶରେ ସାତଭାୟା ଠାରୁ ୧୦ କିଲୋମିଟର ଦୂର ବଗପାଟିଆକୁ ସ୍ଥାନାନ୍ତର କରାଇଛି । କାନପୁର, ଚାରିଘରିଆ ଭଳି ସମୁଦ୍ରରେ ମିଶି ଯାଇଥିବା ସ୍ଥାନରେ ଥିବା ଭିଟାମାଟି ଛାଡି ଜୀବନକୁ ବଞ୍ଚାଇ ମଗରକନ୍ଦାରେ ବସବାସ କରୁଛନ୍ତି ପ୍ରାୟ ୪୦ ଦଳିତ ପରିବାର । ତେବେ ଏମାନଙ୍କୁ ଭିଟାମାଟି ଖଣ୍ଡେ ଯୋଗାଇ ଦେବାକୁ ପ୍ରଶାସନ ଭୁଲିଯାଇଥିବା ଅଭିଯୋଗ କରିଛନ୍ତି ସ୍ଥାନୀୟ ବାସିନ୍ଦା । ଯେଉଁମାନେ ପୂର୍ବରୁ ଜାଗା ପାଇଛନ୍ତି ସେମାନଙ୍କ ପରିବାରକୁ ପୁନଃ ଜାଗା ଦିଆଯାଉଥିବା ନେଇ ବିକ୍ଷୋଭ ପ୍ରଦର୍ଶନ ସହ ଧାରଣା ଦେଇଥିଲେ ବଳକା ରହିଥିବା ପରିବାର ।
ଜମି ଆବଣ୍ଟନ ପ୍ରକ୍ରିୟାରେ ମନମାନୀ
ଚଳିତ ବର୍ଷ ହାଇକୋର୍ଟଙ୍କ ନିର୍ଦ୍ଦେଶରେ ଜିଲ୍ଲା ପ୍ରଶାସନ ପକ୍ଷରୁ ଜମି ଚିହ୍ନଟ କରାଯାଇ ସାତଭାୟା ଓ କାହ୍ନୁପୁର ଅଞ୍ଚଳରେ ବସବାସ କରୁଥିବା ୧୪୮ ପରିବାର ଓ ଚାରିଘରିଆର ୯୯ ପରିବାରକୁ ପ୍ରଦାନ କରାଯାଇଛି । ତେବେ ଏହି ଆବଣ୍ଟନ ପ୍ରକ୍ରିୟାରେ ସମ୍ପୂର୍ଣ୍ଣ ମନମାନୀ ହୋଇଥିବା ଓ ଚାରିଘରିଆରେ ଜମି ପାଇଥିବା ୯୯ ପରିବାର ମଧ୍ୟରୁ ଅନେକ ବାଂଲାଦେଶୀ ବୋଲି ଅଭିଯୋଗ ହୋଇଛି । ପ୍ରତ୍ୟେକ ପରିବାରକୁ ୧୦ ଡିସିମଲ ଅର୍ଥାତ ଅଢେଇ ଗୁଣ୍ଠ ଜମି ଯୋଗାଇ ଦିଆଯାଇଥିବା ବେଳେ ଜୀବିକା ନିର୍ବାହ ପାଇଁ କୌଣସି ବ୍ୟବସ୍ଥା ହୋଇନଥିବାରୁ ଏବେ ଅନେକ ବିସ୍ଥାପିତ ପରିବାରର ଲୋକେ ବାହାର ରାଜ୍ୟରେ ଦାଦନ ଖଟୁଥିବା କହିଛନ୍ତି ଲୋକେ ।
'ସର୍ବସମ୍ମତି କ୍ରମେ ହୋଇଛି ଆବଣ୍ଟନ'
ଉପ ଜିଲ୍ଲାପାଳଙ୍କୁ ଏହି ସମସ୍ୟା ସମ୍ପର୍କରେ ପଚାରିବାରୁ ସେ କହିଛନ୍ତି, "ମାନ୍ୟବର ହାଇକୋର୍ଟଙ୍କ ନିର୍ଦ୍ଦେଶ ମୁତାବକ ସମସ୍ତ କାର୍ଯ୍ୟ କରାଯାଇଛି । ଜମି ଆବଣ୍ଟନ ବେଳେ ସ୍ଥାନୀୟ ଲୋକଙ୍କ ସହ ସରକାରୀ ଅଧିକାରୀମାନେ ଉପସ୍ଥିତ ରହିଥିଲେ । ତେବେ ଯେଉଁ କାର୍ଯ୍ୟ ରହିଯାଇଛି, ସରକାରଙ୍କ ନିର୍ଦ୍ଦେଶ ପରେ ସେ ସବୁ କରାଯିବ ।" ଗୋଟିଏ ପଟେ ସମୁଦ୍ରର କରାଳ ରୂପ ଆଉ ଅନ୍ୟପଟେ ଜୀବନ ପାଇଁ ପ୍ରଶାସନ ନିକଟରେ ଲୋକଙ୍କ ଗୁହାରି । କେବେ ଲୋକଙ୍କ ସମସ୍ୟା ଦୂର ହେବ ତାହା ସମୟ ହିଁ କହିବ ।
ଇଟିଭି ଭାରତ, କେନ୍ଦ୍ରାପଡ଼ା
