କେନ୍ଦ୍ରାପଡା: ପ୍ରବାସୀ ଓଡିଆ ରହୁଥିବା ସଙ୍ଗରୋଧ କେନ୍ଦ୍ରର ଖାଦ୍ୟରେ ମଲା ଝିଟିପିଟି । ଏଭଳି ଏକ ଦୁର୍ଭାଗ୍ୟଜନକ ଦୃଶ୍ୟ ଦେଖିବାକୁ ମିଳିଛି କେନ୍ଦ୍ରାପଡା ଗରଦପୁର ବ୍ଲକ ଏକ ଶିଶୁ ମନ୍ଦିରରେ ହୋଇଥିବା ସରକାରୀ ସଙ୍ଗରୋଧ କେନ୍ଦ୍ରରୁ । ପ୍ରବାସୀ ଓଡିଆମାନଙ୍କ ପାଇଁ ରାଜ୍ୟ ସରକାର ସମସ୍ତ ସୁବିଧା ସୁଯୋଗ ଯୋଗାଇ ଦିଆଯାଇଥିଲେ ମଧ୍ୟ ବଡବଡ ବାବୁମାନଙ୍କ ଦାୟିତ୍ବହୀନତା ମନୋଭାବ ଯୋଗୁଁ ଏଭଳି ଦୃଶ୍ୟ ସାମ୍ନାକୁ ଆସିଛି ।
ସୂଚନାଯୋଗ୍ୟ, ପ୍ରବାସୀ ଓଡିଆମାନେ ରହୁଥିବା ସରକାରୀ ସଙ୍ଗରୋଧ କେନ୍ଦ୍ର ଗୁଡିକରେ ଗୁରୁବାର ସକାଳ ଜଳଖିଆରେ ଥିବା ତାଲିକା ଅନୁଯାୟୀ ଉପମା ତରକାରୀ ଦିଆଯାଇଥିଲା । ସେହି ତରକାରୀରୁ ଏକ ମଲା ଝିଟିପିଟି ବାହାରିବାରୁ କେନ୍ଦ୍ରରେ ଥିବା ପ୍ରବାସୀ ଓଡିଆମାନେ ପାଟିତୁଣ୍ଡ କରିଥିଲେ । ଏନେଇ ଗରଦପୁର ବିଡିଓ ରଶ୍ମିରଞ୍ଜନ ମଲ୍ଲିକଙ୍କୁ ଫୋନ ଯୋଗେ ଯୋଗାଯୋଗ କରିବାରୁ ସେ ଏହି ଘଟଣା ସମ୍ପର୍କରେ ଅବଗତ ଥିବା ଓ ଉକ୍ତ ସଙ୍ଗରୋଧ କେନ୍ଦ୍ରକୁ ନିଜେ ପରିଦର୍ଶନରେ ଯାଇ ଘଟଣା ସମ୍ପର୍କରେ ତଦନ୍ତ କରିଥିବା କହିଥିଲେ । ତେବେ ଏହି ଜଳଖିଆକୁ କେହି ଖାଇନଥିବା ସୂଚନା ଦେଇଛନ୍ତି ଗରଦପୁର ବିଡିଓ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
