କେନ୍ଦ୍ରାପଡା: ଲଗାଣ ବର୍ଷା ଓ ପ୍ରଶାସନିକ ଉଦାସୀନତା ପାଇଁ ଚଳିତ ବର୍ଷ ଜିଲ୍ଲାରେ ବାଣ ବ୍ୟବସାୟ ମାନ୍ଦା ପରିଲକ୍ଷିତ ହୋଇଛି । ଦୀର୍ଘ ଏକମାସ ଧରି ପ୍ରଶାସନ ପାଖକୁ ଦୌଡ଼ିଦୌଡ଼ି ନୟାନ୍ତ ହେବା ପରେ ପ୍ରଶାସନ ପକ୍ଷରୁ ଶୁକ୍ରବାର ରାତିରେ ବ୍ୟବସାୟୀମାନଙ୍କୁ ଲାଇସେନ୍ସ ପ୍ରଦାନ କରାଯାଇଥିଲା । ତେବେ ଗିରଫ ଓ ବାଣ ଜବତ ଭୟରେ ପୂର୍ବରୁ କୌଣସି ବ୍ୟବସାୟୀ ବାଣ ଆଣି ନଥିଲେ । ତେବେ ବର୍ତ୍ତମାନ ବଜାରରେ ଯେଉଁ ବାଣ ମିଳୁଛି ତାହାର ଦର ଅଧିକ ରହିଛି । ଦର ଶୁଣି ବାଣ କିଣିବାକୁ ଇଚ୍ଛା ହେଉ ନଥିଲେ ମଧ୍ୟ ବାଧ୍ୟ ହୋଇ କିଣିବାକୁ ପଡୁଛି ବୋଲି ଗ୍ରାହକ କହିଛନ୍ତି । ଅନ୍ୟପଟରେ ବଜାରରେ ବିଭିନ୍ନ ପ୍ରକାରର ବାଣ ଉପଲବ୍ଧ ହୋଇଥିଲେ ମଧ୍ୟ ଦର ଟିକିଏ ଅଧିକ ଥିବା କହିଛନ୍ତି ବ୍ୟବସାୟୀ କହିଛନ୍ତି ।
ଚଳିତବର୍ଷ ଜିଲ୍ଲାରେ ମୋଟ 151ଜଣ ଓ କେନ୍ଦ୍ରାପଡ଼ା ସହରରେ ମୋଟ 80ଜଣ ବ୍ୟବସାୟୀ ଅଗ୍ନିଶମ ବିଭାଗ ପାଖରୁ ବ୍ୟବସାୟ ପାଇଁ ଅନୁମତି ନେଇଥିଲେ । ହେଲେ ପ୍ରଶାସନିକ ଉଦାସୀନତା ଓ ଧାଁ ଧଉଡ଼ ପାଇଁ ମାତ୍ର 19ଜଣ ବ୍ୟବସାୟୀ ସହରର ନୂଆ ବସଷ୍ଟାଣ୍ଡ ନିକଟସ୍ଥ ପଡ଼ିଆରେ ବାଣ ବ୍ୟବସାୟ ପାଇଁ ଆଜି ସକାଳୁ ଅସ୍ଥାୟୀ ଦୋକାନ ଖୋଲିଛନ୍ତି । ତେବେ କୌଣସି ପ୍ରକାର ଦୁର୍ଘଟଣାକୁ ରୋକିବା ପାଇଁ ସମସ୍ତ ସରକାରୀ ଗାଇଡ଼ଲାଇନ ଅନୁସାରେ ନିଆଁ ଲିଭା ଗ୍ୟାସ, ବାଲିବସ୍ତା, ପାଣି ବାଲଟି ଇତ୍ୟାଦି ପାଖରେ ରଖିଥିବା ଦେଖାଯାଇଛି । ଅଗ୍ନିଶମ ବାହିନୀର ଗୋଟିଏ ଗାଡି ମଧ୍ୟ ଉକ୍ତ ସ୍ଥାନରେ ରଖିବାପାଇଁ ଅଗ୍ନିଶମ ଅଧିକାରୀ ପ୍ରତିଶ୍ରୁତି ଦେଇଛନ୍ତି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
