କେନ୍ଦ୍ରାପଡା: ଜାତିର ପିତା ମହାତ୍ମା ଗାନ୍ଧୀଙ୍କ ଓଡିଶା ଆଗମନକୁ ପୁରିଛି ୧୦୦ ବର୍ଷ । ଅବିଭକ୍ତ କଟକ ଜିଲ୍ଲାର ବିଭିନ୍ନ ସ୍ଥାନରେ ବର୍ଣ୍ଣବୈଷମ୍ୟ ବିରୋଧରେ ପଦଯାତ୍ରା ହେଉ ଅବା ସତ୍ୟାଗ୍ରହ । ସବୁଥିରେ ବାପୁଙ୍କ ସାଥିରେ ରହିଥିଲା ଏ ଓଡ଼ିଆ ଜାତି । 1921 ରେ ବାପୁ ପ୍ରଥମେ ଓଡିଶା ଆସି ଥିବାବେଳେ 1934 ରେ ଜାତିଭେଦ ଦୂର କରିବା ପାଇଁ ପ୍ରଥମେ କେନ୍ଦ୍ରାପଡାରେ ପାଦ ଥାପିଥିଲେ । ଏହି ସମୟରେ କୁଶିଆପାଳର ଏକ ବିଦ୍ୟାଳୟରେ ସମାବେଶ କରି ଲୋକଙ୍କୁ ‘କାଟି ପିନ୍ଧ, କୁଟି ଖାଅ’ ବାର୍ତ୍ତା ଦେଇଥିଲେ ।
ଗାନ୍ଧୀଜୀଙ୍କ ପ୍ରେରଣାରେ ଅନୁପ୍ରାଣିତ ହୋଇ ସେତେବେଳେ 100 ରୁ ଊର୍ଦ୍ଧ୍ବ ଲୋକେ ତନ୍ତ ସାହାଯ୍ୟରେ ଲୁଗା ବୁଣିବା ଆରମ୍ଭ କରିଥିଲେ । ମାତ୍ର 1999 ମହାବାତ୍ୟା ପରେ ପରେ ଏସବୁ ନଷ୍ଟ ହୋଇଯାଇଛି । ପରବର୍ତ୍ତି ସମୟରେ ଏସବୁକୁ ଉଦ୍ଧାର କରି ରଖାଯାଇଥିଲେ ମଧ୍ୟ କାମରେ ଆସୁନାହିଁ । ଏସବୁକୁ ଥଇଥାନ କରିବା ପାଇଁ ପ୍ରଶାସନ ନିକଟରେ ଦାବି କରିଛନ୍ତି ସ୍ଥାନୀୟ ଲୋକେ ।
ସେହିପରି ବାରିମୂଳ ପଞ୍ଚାୟତରେ ଥିବା ଗୋବରୀ ନଦୀ ପଠାରେ ମହାତ୍ମା ଗାନ୍ଧୀ ଏକ ବିରାଟ ସାଧାରଣ ସଭାରେ ସ୍ୱାଧୀନତା ସଂଗ୍ରାମରେ ଝାସ ଦେଇ ଅହିଂସା ଉପାୟରେ ମୁକ୍ତି ଆନ୍ଦୋଳନ ପାଇଁ ଉଦବୋଧନ ଦେଇଥିଲେ । ଏହାକୁ ସ୍ମରଣୀୟ କରିବା ପାଇଁ ପ୍ରତ୍ୟେକ ବର୍ଷ ଏଠାରେ ଶହୀଦ ଦିବସ ଅବସରରେ ରାମଧୂନ କରାଯାଉ ଥିବାବେଳେ ଏହି ସ୍ଥାନର ପୁନଃରୁଦ୍ଧର ପାଇଁ ପୂର୍ବତନ ଜିଲ୍ଲାପାଳ ପ୍ରୟାସ ଆରମ୍ଭ କରିଥିଲେ । ଏହାର ସୌନ୍ଦର୍ଯ୍ୟକରଣ ପାଇଁ CFC ଫଣ୍ଡରୁ ୬ ଲକ୍ଷ ଟଙ୍କା ଓ ମନରେଗା ଯୋଜନାରେ ୧୦ଲକ୍ଷ ଟଙ୍କା ଖର୍ଚ୍ଚ ହୋଇଥିଲେ ମଧ୍ୟ ଏପର୍ଯ୍ୟନ୍ତ କାମ ଶେଷ ହୋଇପାରିନାହିଁ । ଜିଲ୍ଲାପାଳଙ୍କ ବଦଳି ପରେ ଏହି କାର୍ଯ୍ୟ ଅଧପନ୍ତରିଆ ହୋଇ ପଡିରହିଛି ।
ତେବେ ସାରା ଦେଶ ଏବେ ବାପୁଜୀଙ୍କ ଯାତ୍ରାକୁ ସ୍ମରଣୀୟ କରିବା ଉଦ୍ଦେଶ୍ୟରେ ଉତ୍ସବ ପାଳନ କରୁ ଥିବାବେଳେ କେନ୍ଦ୍ରାପଡ଼ାରେ ଏହାର ବ୍ୟତିକ୍ରମ ବାସ୍ତବିକ ଚିନ୍ତାଜନକ ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
