କେନ୍ଦ୍ରାପଡା: ବାତ୍ୟା 'ବୁଲବୁଲ' ପ୍ରଭାବରେ ଜିଲ୍ଲାର କେତେକ ଅଞ୍ଚଳରେ ଗଛପଡି ରାସ୍ତା ଅବରୋଧ ହୋଇଥିବା ଦେଖିବାକୁ ମିଳିଛି । ଅଗ୍ନିଶମ ବିଭାଗ ଦ୍ବାରା ବିଭିନ୍ନ ସ୍ଥାନରେ ଗଛ କାଟି ରାସ୍ତା ଅବରୋଧ ହଟାଯାଇଥିବା ଦେଖିବାକୁ ମିଳିଛି । ଏପରିକି ରାଜକନିକା ଅଞ୍ଚଳରେ ରାସ୍ତାରେ ପଡିଥିବା ଗଛ କଟାଯାଇ ଜଣେ ଗର୍ଭବତୀଙ୍କୁ ଅଗ୍ନିଶମ ଗାଡିରେ ଡାକ୍ତରଖାନାକୁ ପଠାଯାଇଛି । ସରକାରୀ କର୍ମଚାରୀମାନେ ଲଗାଣ ବର୍ଷା ଓ ପବନକୁ ଖାତିର ନକରି ଉଦ୍ଧାର କାର୍ଯ୍ୟ ଜାରି ରଖିଥିବା ଦେଖିବାକୁ ମିଳିଛି ।
ରାଜକନିକା ଥାନା ଅନ୍ତର୍ଗତ ଗିରିଆ ଗ୍ରାମର ଦିବାକର ଲେଙ୍କାଙ୍କ ପତ୍ନୀ ସୁଶ୍ରୀ ସଂଗୀତା ବଳ ଗର୍ଭବତୀ ଥିବାବେଳେ ତାଙ୍କୁ ସୁରକ୍ଷିତ ଭାବରେ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ବାତ୍ୟାର ପ୍ରଭାବରେ ଗଛ ପଡି ରାସ୍ତା ଅବରୋଧ ହୋଇଥିଲା । ଏହାପରେ ରାଜକନିକା ଅଗ୍ନିଶମ ବିଭାଗ ଦ୍ଵାରା ଗଛ କଟାଯାଇ ଅଗ୍ନିଶମ ଗାଡ଼ିରେ ସଂଗୀତାଙ୍କୁ ରାଜକନିକା ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା ।
ସେହିପରି ରାଜନଗର ତାଳଚୁଆକୁ ସଂଯୋଗ କରୁଥିବା ରାସ୍ତାରେ ଗଛପଡି ଅବରୋଧ ହୋଇଥିବା ବେଳେ ମେରାଇନ ଥାନା ଅଧିକାରୀ ଶ୍ରୀକାନ୍ତ ବାରିକ ଓ ମେରାଇନ ପୋଲିସ ଗଛ ଗୁଡିକୁ କାଟି ରାସ୍ତା ସଫା କରିଥିବା ଦୃଶ୍ୟ ଦେଖିବାକୁ ମିଳିଛି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
