କେନ୍ଦ୍ରାପଡା: ଅଭାବ, ଦୁଃଖ ଓ ନିରାଶ୍ରିତ ହୋଇ କଟୁଛି ଜୀବନ । ରୋଜଗାରକ୍ଷମ ସ୍ବାମୀଙ୍କୁ ହରାଇବା ପରେ ଅଭାବ ଅସୁବିଧାର ଅମା ଅନ୍ଧକାର ଘୋଟି ଆସିଛି କବିତାଙ୍କ ଜୀବନରେ । ତିନିଟି ପିଲାଙ୍କ ଦାୟିତ୍ବ ଏବେ ତାଙ୍କ କାନ୍ଧରେ, କିପରି ଚଳିବ ପରିବାର କେମିତି ମଣିଷ ହେବେ ପିଲାମାନେ ସେହି ଚିନ୍ତାରେ କେନ୍ଦ୍ରାପଡା ଜିଲ୍ଲା ରାଜନଗର ବ୍ଲକ କଣ୍ଡିରା ଗ୍ରାମର କବିତା ଦାସ । ଅଭାବରୁ କିଛିଟା ମୁକ୍ତି ପାଇବା ପାଇଁ ସରକାରୀ ସହାୟତା ଅପେକ୍ଷାରେ ରହିଛନ୍ତି ସେ ।
କବିତାଙ୍କ ସ୍ବାମୀ ସହଦେବ ଦାସ ମଜୁରୀ ଲାଗି ଟଙ୍କା ଆଣିଲେ ଚଳୁଥିଲା ତେଲ ଲୁଣର ସଂସାର । କିନ୍ତୁ ଚାରିବର୍ଷ ତଳେ ହଠାତ ସହଦେବଙ୍କ ଦେହ ଅସୁସ୍ଥ ହୋଇପଡିଲା । ଅପରେସନ ହେଲା ଆଉ ତା ପରେ ଜଣାପଡିଲା ସହଦେବ କର୍କଟ ରୋଗରେ ପୀଡିତ । ସ୍ବାମୀଙ୍କୁ ସୁସ୍ଥ କରିବା ପାଇଁ ସୁନା ଗହଣା ଜମି ବାଡି ସବୁ ବିକ୍ରି କରିଦେଲେ କବିତା । କିନ୍ତୁ ଅର୍ଥାଭାବରୁ ସଠିକ ଚିକିତ୍ସା ନ ପାଇ ଆଖି ବୁଜିଦେଲେ ସହଦେବ । ପଡୋଶୀ ଓ ଗ୍ରାମବାସୀଙ୍କ ସାହାଯ୍ୟ ସହଯୋଗରେ ସହଦେବଙ୍କ ଶୁଦ୍ଧି କ୍ରିୟା ସରିଗଲା କିନ୍ତୁ ନିରାଶ୍ରା ପରିବାର ଚଳିବ କେମିତି ସେ ନେଇ ଚିନ୍ତାରେ ଭାଙ୍ଗି ପଡିଛନ୍ତି କବିତା । ଗ୍ରାମବାସୀଙ୍କ ଦୟା ହେଲେ ଏହି ଅଭାବୀ ପରିବାରରେ ଚୁଲି ଜଳେ ନଚେତ ଉପବାସରେ ଦିନ କଟେ । ତେବେ କବିତାଙ୍କ ପରିବାରକୁ ସାହାଯ୍ୟ କରିବା ପାଇଁ ପ୍ରଶାସନ ନିକଟରେ ଦାବି କରିଛନ୍ତି ଗ୍ରାମବାସୀ ।
କବିତାଙ୍କ ବିଧବା ଭତ୍ତା ହୋଇପାରି ନାହିଁ, ରାସନ କାର୍ଡରେ ମିଳୁଥିବା ଚାଉଳ ଗଣ୍ଡାଏ ତାଙ୍କ ଭରସା। କେମିତି ପରିବାର ଚଳାଇବେ ପିଲାମାନେ କିପରି ପାଠ ପଢିବେ ସେ ନେଇ ଚିନ୍ତାରେ ସେ। ନିର୍ବାଚନ ବେଳେ ପୁଳା ପୁଳି ପ୍ରତିଶୃତି ଦେଇଥିବା ନେତା ଓ ମନ୍ତ୍ରୀଙ୍କ ନଜର କେବେ ଏହି ପରିବାର ଉପରେ ପଡୁଛି ତାହା ଦେଖିବାକୁ ବାକି ରହିଲା ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
