କେନ୍ଦ୍ରାପଡା: ବାଜିଲା ଖବର, ପଡିଲା ପ୍ରଶାସନର ନଜର । ୧୮ ଲକ୍ଷ ବ୍ୟୟରେ ନିର୍ମିତ ଭେଣ୍ଡିଂଜୋନ୍ ଖତ ଖାଉଥିବା ଖବର 'ଇଟିଭି ଭାରତ'ରେ ପ୍ରସାରିତ ହେବାପରେ ଏଗୁଡ଼ିକର ମରାମତି ଆରମ୍ଭ କରିଛି ପୌର ପ୍ରଶାସନ । ୨୦୧୭ ମସିହା ଅଗଷ୍ଟ ୩୧ ତାରିଖରେ ରାଜ୍ୟର ସର୍ବ ପୁରାତନ ମ୍ୟୁନିସିପାଲିଟି କେନ୍ଦ୍ରାପଡ଼ାର ତିନିମୁହାଣୀରେ ବସୁଥିବା ଉଠାଦୋକାନୀଙ୍କୁ ସ୍ଥାୟୀ ଘର ପ୍ରଦାନ ପାଇଁ ଭେଣ୍ଡିଂ ଜୋନର ଭିତ୍ତିପ୍ରସ୍ତର କରାଯାଇଥିଲା । ମାତ୍ର ଏସବୁ ବ୍ୟବସାୟୀଙ୍କ କାମରେ ଆସୁନଥିଲା ।
ତେବେ ଇତିମଧ୍ୟରେ ଜୋନ ନିର୍ମାଣକୁ ୩ ବର୍ଷ ପୁରିଯାଇ ଥିବାବେଳେ ୪୮ଟି ଭେଣ୍ଡିଂ କ୍ୟାବିନ ବ୍ୟବସାୟୀଙ୍କୁ ପ୍ରଦାନ କରାଯାଇନଥିଲା । ତିଆରି ହେବାର ଦୀର୍ଘଦିନ ପର୍ଯ୍ୟନ୍ତ ଏଗୁଡିକ ଅବ୍ୟବହୃତ ହୋଇ ପଡି ରହିଥିବାରୁ କ୍ୟାବିନଗୁଡିକ ଉପରେ ଗଛଲତା ମାଡିଯାଇ ଟିଣ ଚାଦରଗୁଡିକ ନଷ୍ଟ ହୋଇଯାଉଥିବା ଖବର ଚଳିତବର୍ଷ ଫେବୃଆରୀ ମାସରେ 'ଇଟିଭି ଭାରତ'ରେ ଖବର ପ୍ରସାରଣ ପରେ ସ୍ଥାନୀୟ ପୌର ଓ ଜିଲ୍ଲା ପ୍ରଶାସନର ଚେତା ପଶିବା ପରେ ମରାମତି ପାଇଁ ନିର୍ଦ୍ଦେଶ ଦେଇଥିବା ଜଣାପଡଛି । ତେବେ ମୋଟ ୧୮ଲକ୍ଷ ବ୍ୟୟରେ ୪୮ଟି କ୍ୟାବିନ ବିଶିଷ୍ଟ ନିର୍ମାଣ କରାଯାଇଥିବା ଭେଣ୍ଡିଂ ଜୋନର କ୍ୟାବିନଗୁଡିକ ଆବଶ୍ୟକତା ଠାରୁ ଛୋଟ ନିର୍ମାଣ କରାଯାଇଥିବାର ଅଭିଯୋଗ ହେବାରୁ ଏଗୁଡିକର ମରାମତି ସମୟରେ ଏହାକୁ ୨୨ କ୍ୟାବିନ କରାଯାଇଥିଲା ।
ସେହିପରି ଏଠାରେ ପାର୍କିଂ ମୁଖ୍ୟ ସମସ୍ୟା ଥିବାବେଳେ ଟିକିଏ ବର୍ଷା ହେଲେ ଏଠାରେ ପାଣି ଜମିବାର ସମ୍ଭାବନା ରହିଛି । ୧୮ଲକ୍ଷ ଟଙ୍କା ବ୍ୟୟରେ ପ୍ରଥମେ କିଏ ଏହି କ୍ୟାବିନଗୁଡିକ ନିର୍ମାଣ କରିଥିଲା ଓ ଏବେ ଏହାର ମରାମତି କିଏ କରୁଛି ଓ କେତେ ଅଧିକ ଟଙ୍କା ବ୍ୟୟ କରାଯିବ ସେନେଇ ପ୍ରଶ୍ନ ଉଠାଇଛନ୍ତି ନଗର ବିଜେପି ସଭାପତି । ପ୍ରଶାସନ ଚେତିଛି ହେଲେ ଦୁର୍ନୀତି ଆଶଙ୍କା ବଢିଥିବା ସଭାପତି ଅଭିଯୋଗ କରିଛନ୍ତି । ତେବେ ପୌର ନିର୍ବାହୀ ଅଧିକାରୀ କାମ ଠିକ ଭାବେ କରାଯାଇଛି, ବ୍ୟୟ ଅଟକଳ ସେହି ୧୮ ଲକ୍ଷରେ ସୀମିତ ରହିଛି ଏବଂ ଆସନ୍ତା ସପ୍ତାହରେ ଏହି କ୍ୟାବିନଗୁଡିକ ବ୍ୟବସାୟୀମାନଙ୍କୁ ହସ୍ତାନ୍ତର କରାଯିବ ବୋଲି କହିଛନ୍ତି ।
ଗୋଟିଏ ପଟେ ବ୍ୟୟ ଅଟକଳ ଓ ଦୀର୍ଘ ୪ ବର୍ଷର ସମୟକୁ ନେଇ ପ୍ରଶ୍ନ ଉଠି ଥିବାବେଳେ ଆସନ୍ତା ସପ୍ତାହରେ ବ୍ୟବସାୟୀଙ୍କୁ ହସ୍ତାନ୍ତର କରିବା ପାଇଁ ପ୍ରତିଶ୍ରୁତିକୁ ପୌର ପ୍ରଶାସନ କିପରି ପୂରଣ କରୁଛି ତାହା ଦେଖିବାକୁ ବାକି ରହିଲା ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
