କେନ୍ଦ୍ରାପଡା: ଚଳିତ ବର୍ଷ ପ୍ରଭୁ ଶ୍ରୀ ବଳଦେବଜୀଉଙ୍କ ରଥଯାତ୍ରା ହେବ କି ନାହିଁ ସେନେଇ ଦ୍ଵନ୍ଦ ଲାଗି ରହିଛି। ରଥଯାତ୍ରା ସମ୍ପର୍କିତ ଏକ ଉଚ୍ଚ ସ୍ତରୀୟ ବୈଠକ ସୋମବାର ସନ୍ଧ୍ୟାରେ ମନ୍ଦିର ନିକଟରେ ଥିବା ଅତିଥି ନିବାସରେ ଅନୁଷ୍ଠିତ ହୋଇଯାଇଛି l ପ୍ରଭୁ ବଳଦେବଜୀଉଙ୍କ ରଥଯାତ୍ରା ନେଇ ବୈଠକରେ ବିଭିନ୍ନ ପ୍ରସଙ୍ଗରେ ଆଲୋଚନା କରାଯାଇଥିଲା। ତେବେ ରଥଯାତ୍ରା ହେବା ନେଇ ବୈଠକରେ କୌଣସି ସ୍ପଷ୍ଟ ନିଷ୍ପତ୍ତି ନିଆଯାଇପାରି ନାହିଁ l
ରଥଯାତ୍ରା ହେବା ନେଇ ଏଯାଏଁ ଚିତ୍ର ସ୍ପଷ୍ଟ ହୋଇ ପାରିନଥିବାବେଳେ ସରକାରଙ୍କ ନିର୍ଦ୍ଦେଶକୁ ଅପେକ୍ଷା କରିଛନ୍ତି ମନ୍ଦିର ପରିଚାଳନା କମିଟି l ସେହିପରି ଯଦି ରଥଯାତ୍ରା ନହୁଏ ତାର ବିକଳ୍ପ ନୀତି କଣ ଅଛି ସେ ନେଇ କୂଳ ଗୁରୁଙ୍କ ପରାମର୍ଶ ଗୁରୁତ୍ୱପୂର୍ଣ୍ଣ ବୋଲି ସେବକ ପ୍ରତିନିଧି ପ୍ରକାଶ କରିଛନ୍ତି l ଏହି ବୈଠକରେ ମନ୍ଦିର ପରିଚାଳନା କମିଟିର ସଭାପତି ତଥା ଉପଜିଲ୍ଲାପାଳ ଜ୍ୟୋତି ଶଙ୍କର ମହାପାତ୍ର,ଦେବୋତ୍ତର ବିଭାଗର କାର୍ଯ୍ୟନିର୍ବାହୀ ଅଧିକାରୀ ଏବଂ ସମସ୍ତ ସେବକ ଯୋଗ ଦେଇଥିଲେ। ଅନ୍ୟପକ୍ଷରେ ରଥ ନିର୍ମାଣ କାର୍ଯ୍ୟ ଦ୍ରୁତ ଗତିରେ ଆଗେଇ ଚାଲିଛି l
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
