କେନ୍ଦ୍ରାପଡା: ଆକ୍ସନ ମୁଡ଼ରେ ପଟ୍ଟାମୁଣ୍ଡାଇ ପୋଲିସ । ଗତ ଦୁଇ ଦିନ ତଳେ ଏକ ଆନ୍ତଃଜିଲ୍ଲା ବାଇକ ଚୋର ରାକେଟକୁ ଧରିବାରେ ସଫଳ ହେବା ପରେ ବୁଧବାର ପୁଣିଥରେ ପଟ୍ଟାମୁଣ୍ଡାଇ ପୋଲିସକୁ ମିଳିଛି ଆଉ ଏକ ବଡ଼ ସଫଳତା । ପଟ୍ଟାମୁଣ୍ଡାଇ ବଜାରରେ ଥିବା ଜଣେ ଲୁଗା ବ୍ୟବସାୟୀଙ୍କୁ ଦାଦାବଟି ମାଗି ହତ୍ୟା ଧମକ ଦେବା ଅଭିଯୋଗରେ ବୁଧବାର ଅଭିଯୁକ୍ତକୁ ଗିରଫ କରିଥିବା ସୂଚନା ଦେଇଛନ୍ତି କେନ୍ଦ୍ରାପଡ଼ା ଆରକ୍ଷୀ ଅଧିକ୍ଷକ ନୀତିଶେଖର ।
ତେବେ ଆଜି(ବୁଧବାର) ମଧ୍ୟାହ୍ନରେ ଆରକ୍ଷୀ ଅଧିକ୍ଷକଙ୍କ ଦ୍ବାରା ଏକ ସାମ୍ବାଦିକ ସମ୍ମିଳନୀ କରାଯାଇ ନିଜ ପ୍ରତିକ୍ରିୟାରେ କହିଛନ୍ତିଯେ, କେନ୍ଦ୍ରାପଡ଼ା ସଦର ଥାନା ଅଞ୍ଚଳର ତିଳୋତ୍ତମାଦେଇପୁର ଗାଁର ଭରତ ଚୁଳି ପଟ୍ଟାମୁଣ୍ଡାଇ ଅଞ୍ଚଳର ଜନୈକ ବ୍ୟବସାୟୀଙ୍କୁ ଦାଦାବଟି ମାଗିବା ସହିତ ହତ୍ୟା ଧମକ ଦେଇଥିଲା । ଖାଲି ସେତିକି ନୁହଁ ଅଭିଯୁକ୍ତ ଜଣକ ବିଭିନ୍ନ ଗ୍ୟାଙ୍ଗଷ୍ଟାରଙ୍କ ନାମନେଇ ଏଭଳି ଧମକଚମକ ଦେଉଥିବା ବେଳେ ପୋଲିସ ପଞ୍ଝାରେ ଧରା ପଡିଥିଲା ।
ଘଟଣାରେ ଅଭିଯୁକ୍ତ ନିକଟରୁ ୮ଟି ମୋବାଇଲ ଫୋନ,ଏକ ଆପାଚି ବାଇକ,୧୧ଟି ସିମକାର୍ଡ ସହିତ ନଗଦ ୩୫୦୦ ଟଙ୍କା ଜବତ କରିଛି ପୋଲିସ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
