କେନ୍ଦ୍ରାପଡ଼ା: ପଟ୍ଟାମୁଣ୍ଡାଇରେ ସଡ଼କ ଦୁର୍ଘଟଣା । ଦୁର୍ଘଟଣାରେ ନବମ ଶ୍ରେଣୀ ଛାତ୍ରଙ୍କ ମୃତ୍ୟୁ । ମୃତ ଛାତ୍ର ଜଣଙ୍କ ହେଲେ ଆଳି ବ୍ଲକ କଅଁରପୁର ଗ୍ରାମର ଯୁଗଳ କିଶୋର ବେହେରାଙ୍କ ଏକମାତ୍ର ପୁଅ ଜିତେଶ କୁମାର ବେହେରା ।
ସୂଚନା ଅନୁସାରେ ଜିତେଶ ପତ୍ରପୁର ହାଇସ୍କୁଲରେ ନବମ ଶ୍ରେଣୀର ଛାତ୍ର ଥିଲେ । ଗ୍ରୀଷ୍ମକାଳୀନ ଛୁଟି ପରେ ସାରା ରାଜ୍ୟରେ ଆଜି ସ୍କୁଲ ଖୋଲିଥିଲା । ତେବେ ସ୍କୁଲ ଯିବା ସମୟରେ ପଟ୍ଟାମୁଣ୍ଡାଇ ନିକଟରେ ଏକ କାର ଆସି ଜିତେଶଙ୍କୁ ଧକ୍କା ଦେଇଥିଲା । ଗୁରୁତର ଅବସ୍ଥାରେ ତାଙ୍କୁ ପଟ୍ଟାମୁଣ୍ଡାଇ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତେବେ ଗ୍ରାମବାସୀ ଦୁର୍ଘଟଣା ଘଟାଇଥିବା କାରକୁ ଭାଙ୍ଗି ଦେଇଥିବା ବେଳେ ପୋଲିସ କାର ଚାଳକକୁ ଥାନାରେ ଅଟକ ରଖିଛି ।
ଉତ୍ତ୍ୟକ୍ତ ଲୋକେ ଟାୟାର ଜାଳି କଟକ-ଚାନ୍ଦବାଲି ରାସ୍ତାକୁ ଅବରୋଧ କରିଥିଲେ । ପରିବାରକୁ କ୍ଷତି ପୂରଣ ଦେବା ସହିତ ଅଞ୍ଚଳରେ ବାରମ୍ବାର ଦୁର୍ଘଟଣା ଘଟୁଥିବାରୁ ହମ୍ପସ୍ ନିର୍ମାଣ କରିବାକୁ ଦାବି ହୋଇଥିଲା । ମୁଖ୍ୟ ରାସ୍ତା ଦୀର୍ଘ ୫ ଘଣ୍ଚା ବନ୍ଦ ରହିବା ଫଳରେ ଯାତାୟତ ପ୍ରଭାବିତ ହୋଇଥିଲା । ଘଟଣାସ୍ଥଳରେ ପଟାମୁଣ୍ଡାଇ ଏସଡିପିଓ, ଆଳି ଥାନା ଆଇଆଇସି ଓ ତହସିଲଦାର ପହଞ୍ଚି ଲୋକମାନଙ୍କୁ ବୁଝାସୁଝା କରିବା ପରେ ଧାରଣା ପ୍ରତ୍ୟାହୃତ ହୋଇଥିଲା ।
ଇଟିଭି ଭାରତ, କେନ୍ଦ୍ରାପଡ଼ା
