ଫୁଲବାଣୀ:ସ୍ଥାନୀୟ ବାଲିଗୁଡା ଉପଖଣ୍ଡ ଚିକିତ୍ସାଳୟରେ ଆସିଛି ସଙ୍ଗୀନ ଅଭିଯୋଗ । ଡାକ୍ତରଙ୍କ ଚିକିତ୍ସା ଅବହେଳାକୁ ନେଇ ଯୁବକଙ୍କ ମୃତ୍ୟୁ ହୋଇଥିବା ଆସିଛି ଅଭିଯୋଗ । ସମ୍ପୃକ୍ତ ଡାକ୍ତରଙ୍କ ବହିଷ୍କାର ଦାବି ସହ ଯୁବକଙ୍କ ମୃତ୍ୟୁର ଉଚ୍ଚସ୍ତରୀୟ ତଦନ୍ତ ଦାବିରେ ପ୍ରତିବାଦସ୍ବରୂପ ସ୍ଥାନୀୟବାସୀ 59 ନଂ ଜାତୀୟ ରାଜପଥ ଅବରୋଧ କରିଥିଲେ ।
ସୂଚନା ଅନୁଯାୟୀ ବାଲିଗୁଡା ନୂଆସାହିର ବିଜୟ କୁମାର ସାହୁଙ୍କ ସ୍ବାସ୍ଥ୍ୟ ଖରାପ ନେଇ ସେ ବାଲିଗୁଡା ମେଡିକାଲକୁ ପରୀକ୍ଷା ପାଇଁ ଆସିଥିଲେ । କୋଭିଡ-19 ପାଇଁ ଡାକ୍ତର ସୁନୀଲ କୁମାର ବେହେରା ତାଙ୍କୁ ବିନା ସ୍ପର୍ଶରେ ଚିକିତ୍ସା କରିଥିଲେ l ଥଣ୍ଡା ଓ କାଶ ହେଉଥିବା କହିବା ସତ୍ତ୍ବେ ଡାକ୍ତର ତାଙ୍କୁ କୋଭିଡ ପରୀକ୍ଷା ପାଇଁ ନ କହି କେବଳ ଥଣ୍ଡା ମେଡ଼ିସିନ ଦେଇ ଫେରାଇ ଦେଇଥିଲେ l ଏନେଇ ଶୁକ୍ରବାର ସମ୍ପୃକ୍ତ ଯୁବକଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ବାଲିଗୁଡା ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ଏସ. ଡି. ନାୟକ ତାଙ୍କୁ ମୃତ ଘୋଷଣା କରିବା ପରେ ପରିବାର ଓ ସ୍ଥାନୀୟ ବାସିନ୍ଦା ଉତ୍ତେଜିତ ହୋଇ ପ୍ରତିବାଦ ଆରମ୍ଭ କରିଥିଲେ ।
ପ୍ରତିବାଦ ସ୍ବରୂପ ସେମାନେ ଡାକ୍ତର ସୁନୀଲ କୁମାର ବେହେରାଙ୍କୁ ବହିଷ୍କାର ଓ ମୃତକଙ୍କ ପରିବାରକୁ ଉପଯୁକ୍ତ କ୍ଷତି ପୂରଣ ଦାବି କରିଥିଲେ । ଖବର ପାଇ ଘଟଣାସ୍ଥଳରେ ବାଲିଗୁଡା ଉପଜିଲ୍ଲାପାଳ ଶୁଭଙ୍କର ମହାପାତ୍ର ପହଞ୍ଚି ଉତ୍ତ୍ୟକ୍ତ ଲୋକଙ୍କ ବୁଝାସୁଝା କରିବା ପରେ ରାସ୍ତାରୋକ ଅସ୍ଥାୟୀ ରୂପେ ବନ୍ଦ କରାଯାଇଥିଲା । ହେଲେ ଏଠି ପ୍ରଶ୍ନ ଉଠୁଛି ସରକାରୀ ଡାକ୍ତର କାହା ପାଇଁ କାର୍ଯ୍ୟ କରୁଛନ୍ତି ? ରୋଗୀଙ୍କୁ ବିନା ସ୍ପର୍ଶରେ ଚିକିତ୍ସା କରିବା ପାଇଁ ମୋଟା ଅଙ୍କର ଦରମା ନେଇ କାହା ସ୍ବାର୍ଥରେ ନିଯୁକ୍ତି ପାଇଛନ୍ତି ଓ ପ୍ରଶାସନ ସବୁ ଜାଣି ବି କାହିଁକି ନିରୀହ ଲୋକଙ୍କ ଜୀବନକୁ ଅଣଦେଖା କରୁଛନ୍ତି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
