ଶୌଚ ପାଇଁ ଯାଇଥିବା ମହିଳାଙ୍କୁ ଦୁଷ୍କର୍ମ ଅଭିଯୋଗ, ଜଣେ ଗିରଫ

କନ୍ଧମାଳରେ ଶୌଚ ପାଇଁ ଯାଇଥିବା ମହିଳାଙ୍କୁ ଦୁଷ୍କର୍ମ ଅଭିଯୋଗ । ଜଣଙ୍କୁ ଗିରଫ କଲା ପୋଲିସ । ଅଧିକ ପଢନ୍ତୁ

ଫୁଲବାଣୀ: କନ୍ଧମାଳରେ ଲଜ୍ଜା । ରାତିରେ ବାହାରକୁ ଶୌଚ ପାଇଁ ଯାଇଥିବା ବେଳେ ମହିଳାଙ୍କୁ ଦୁଷ୍କର୍ମ । ଛୁରୀ ଦେଖାଇ ଅଭିଯୁକ୍ତ ବିବାହିତ ମହିଳାଙ୍କ ସହ ଦୁଷ୍କର୍ମ କରିଥିବା ଅଭିଯୋଗ ହୋଇଛି । କନ୍ଧମାଳ ଜିଲ୍ଲାର ଦୁର୍ଗମ କୋଟଗଡ଼ ଥାନା ଅଞ୍ଚଳରୁ ଏହି ଘଟଣା ସାମ୍ନାକୁ ଆସିଛି(Woman allegedly raped in Kandhamal) । ପୀଡିତାଙ୍କ ଅଭିଯୋଗ ଆଧାରରେ ପୋଲିସ ଜଣକୁ ଗିରଫ କରି ତଦନ୍ତ କରୁଛି ।

ସୂଚନା ମୁତାବକ, ଗତ ୧୯ ତାରିଖର ଦିନ ଏହି ଘଟଣା ଘଟିଥିଲା । ପୀଡିତା କିଛି ଦିନ ତଳେ ଶାଶୁଘରୁ କୋଟଗଡ଼ ଥାନା ଅଞ୍ଚଳର ନିଜର ବାପଘରକୁ ବୁଲିବାକୁ ଆସିଥିଲେ । ୧୯ ତାରିଖ ରାତି ୮ଟା ସମୟରେ ମହିଳା ଜଣକ ଘର ବାହାରକୁ ଶୌଚ ହେବାକୁ ଯାଇଥିଲେ । ସେତିକି ବେଳେ ସେହି ଅଞ୍ଚଳର ଦାମୋଦର ନାୟକ ନାମକ ଜଣେ ବ୍ୟକ୍ତି ସମ୍ପୃକ୍ତ ମହିଳାଙ୍କୁ ଛୁରୀ ଦେଖାଇ ଭୟଭୀତ କରାଇ ଦୁଷ୍କର୍ମ କରିଥିବା କୋଟଗଡ଼ ଥାନାରେ ଅଭିଯୋଗ ହୋଇଛି ।

ଅଭିଯୋଗ ପରେ କୋଟଗଡ଼ ଥାନା ଅଧିକାରୀ ଧୀରଜ କୁମାର ଲେଙ୍କା ତଦନ୍ତ ଆରମ୍ଭ କରି ସମ୍ପୃକ୍ତ ବ୍ୟକ୍ତିଙ୍କୁ ଗିରଫ କରିଥିବା ଜଣାପଡ଼ିଛି । ମହିଳା ଜଣକ ରାୟଗଡ଼ା ଜିଲ୍ଲାର ଚନ୍ଦ୍ରପୁର ଅଞ୍ଚଳରେ ବିବାହ କରିଥିବା ବେଳେ କିଛି ଦିନ ହେବ ନିଜ ବାପଘର କୋଟଗଡ଼ ଥାନା ଓରା ଅଞ୍ଚଳକୁ ଆସିଥିଲେ । ବାପଘର ଥିବାବେଳେ ତାଙ୍କ ସହ ଏପରି ପାଶବିକତା ଘଟିଥିବା ପୋଲିସ ପକ୍ଷରୁ ସୂଚନା ମିଳିଛି । ଏହି ଘଟଣାର କୋଟଗଡ଼ ପୋଲିସ୍ ଅଧିକ ତଦନ୍ତ ଜାରି ରଖିଛି ।

ଇଟିଭି ଭାରତ, ଫୁଲବାଣୀ