ଫୁଲବାଣୀ: କଳି ଯୁଗରେ ବି ମରିନି ମଣିଷପଣିଆ । ଜଣେ ଅତି ଗରିବ ପରିବାରର ଯୁବତୀଙ୍କ ମୃତ୍ୟୁ ପରେ କିଛି ଉତ୍ସାହୀ ସ୍ବେଚ୍ଛାସେବୀ ସମସ୍ତ ଖର୍ଚ୍ଚ ବହନ କରି ଶେଷକୃତ୍ୟ ସମ୍ପନ୍ନ କରିଛନ୍ତି । ଗରିବ ପରିବାର ଲକଡାଉନ ଯୋଗୁଁ ଜୀବିକା ହରେଇ ବସିଥିବା ବେଳେ ଶେଷକୃତ୍ୟ କରିବାକୁ ମୁଣ୍ଡରେ ହାତ ଦେଇ ଅପେକ୍ଷା କରିଥିଲେ । ଏପରି ସମୟରେ ଆସି ମଣିଷ ପଣିଆର ପରିଚୟ ଦେଇଛନ୍ତି ଫୁଲବାଣୀ ଟିମ ହ୍ୟୁମାନିଟିର ସ୍ବେଚ୍ଛାସେବୀ ।
କନ୍ଧମାଳ ଜିଲ୍ଲା ଟିକାବାଲି ପାତ୍ର ସାହିର ମୁନା ସାହୁଙ୍କ ଭଉଣୀ ମମି ସାହୁ ଆତ୍ମହତ୍ୟା କରିଥିଲେ । ଅତି ଗରିବ ଏହି ପରିବାରଟି ମୂଲ କାମ କରି ଚଳନ୍ତି । ଲକଡାଉନ ଯୋଗୁଁ କିଛି କାମ ମିଳୁ ନଥିବାରୁ ଏପରି ସ୍ଥିତିରେ ମମି ଆତ୍ମହତ୍ୟା କରିବା ପରେ ପୋଲିସ ମୃତଦେହ ଜବତ କରି ଫୁଲବାଣୀରେ ବ୍ୟବଚ୍ଛଦ ପାଇଁ ଆଣିଥିଲେ । ପରେ ମୃତଦେହ ପରିବାରକୁ ହସ୍ତାନ୍ତର କରିଥିଲେ । ତେବେ ମୃତଦେହକୁ ଟିକାବାଲି ନେଇ ସତ୍କାର କରିବା ପରିବାର ପକ୍ଷରେ ଅସମ୍ଭବ ହୋଇଥିଲା ।
ଖବର ପାଇ ଫୁଲବାଣୀର ସ୍ବେଚ୍ଛାସେବୀ ଦଳ ଟିମ ହ୍ୟୁମାନିଟିର ସଦସ୍ୟ ଆସି ପହଞ୍ଚିଥିଲେ। ଶୁକ୍ରବାର ରାତିରେ ପବନ ସତ୍ତ୍ବେ କାଠ ଓ ସମସ୍ତ ଦ୍ରବ୍ୟ ଯୋଗାଡ କରି ନାରାୟଣୀ ମନ୍ଦିର ନିକଟସ୍ଥ ଶ୍ମଶାନରେ ହିନ୍ଦୁ ରୀତିନୀତିରେ ଶେଷକୃତ୍ୟ ସମ୍ପନ୍ନ ହୋଇଥିଲା । ତେବେ ବିପଦ ତ ବିପଦ, ଶ୍ମଶାନରେ ଶେଷ ବିଦାୟରେ ବନ୍ଧୁ ସାଜି ନିଚ୍ଛକ ମାନବିକତାର ଉଦାହରଣ ଦେଇଛନ୍ତି ଏହି ଯୁବକ ଗୋଷ୍ଠୀ ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
