ଫୁଲବାଣୀ: କନ୍ଧମାଳ ଜିଲ୍ଲାରେ କୋଭିଡ୍ ଡ୍ୟୁଟିରେ ଅବହେଳା କରିବା ଏବଂ ସରକାରୀ ନିୟମ ଅବମାନନା କରିଥିବାରୁ ଘୁ.ଉଦୟଗିରି ଥାନାର ଏଏସଆଇ ଜହରଲାଲ ନାୟକଙ୍କୁ ଚାକିରିରୁ ସସପେଣ୍ଡ କରିଛନ୍ତି ଏସପି ପ୍ରତୀକ ସିଂ ।
ଭୂବନେଶ୍ବରରୁ ଫେରିଥିବା ଜଣେ ବ୍ୟାଙ୍କ ଅଧିକାରୀଙ୍କୁ ଅନୁକମ୍ପା ଦେଖାଇ ଜିଲ୍ଲା ମଧ୍ୟରେ ପ୍ରବେଶ କରିଥିବାରୁ କାର୍ଯ୍ୟାନୁଷ୍ଠାନ ନେଇଛନ୍ତି ଏସପି । ଘୁ.ଉଦୟଗିରିରେ ଥିବା ଏକ ବ୍ୟାଙ୍କ ଶାଖାର ମ୍ୟାନେଜର ଭୂବନେଶ୍ବର ଯାଇଥିଲେ । 10 ଦିନ ରହି ଫେରିବା ବେଳେ ଜିଲ୍ଲାର ପ୍ରବେଶ ପଥ କଳିଙ୍ଗା ନାକା ଚେକଗେଟରେ ତାଙ୍କୁ ଛାଡି ଦିଆଯାଇଥିଲା । ଏହି ପୋଷ୍ଟର ଦାୟିତ୍ବରେ ଥିଲେ ଏଏସଆଇ ଜହରଲାଲ ନାୟକ । ପରେ ସ୍ଥାନୀୟ ଲୋକ ପ୍ରଶାସନକୁ ଅଭିଯୋଗ କରିଥିଲେ ବ୍ୟାଙ୍କ ଅଧିକାରୀଙ୍କ ସମ୍ପର୍କରେ ।
ଏନେଇ ଏସପି ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ସସପେଣ୍ଡ କରିବା ସହିତ ଜିଲ୍ଲା ହେଡକ୍ବାଟରରେ ରିପୋର୍ଟ କରିବାକୁ ନିର୍ଦ୍ଦେଶ ଦେଇଛନ୍ତି । ଜିଲ୍ଲାର ସମସ୍ତ ପ୍ରବେଶ ପଥ ସିଲ୍ କରାଯାଇଥିବା ବେଳେ ଜିଲ୍ଲା ଭିତରକୁ କିମ୍ବା ବାହାରକୁ କାହାକୁ ଛଡାଯିବାକୁ ନିଷିଦ୍ଧ କରିଛନ୍ତି ଜିଲ୍ଲାପାଳ । ଏହା ସହିତ ଜିଲ୍ଲାରେ 144 ଧାରା ବଳବତ୍ତର ରହିଛି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
