ଫୁଲବାଣୀ: କନ୍ଧମାଳ ଜିଲ୍ଲା ତଥା ଫୁଲବାଣୀ ସହରର ଜୀବନର ରେଖା ହେଉଛି ସାଲୁଙ୍କି ନଦୀ । ହେଲେ ଏହି ନଦୀଜଳ ଦିନକୁ ଦିନ ପ୍ରଦୂଷିତ ହେବାରେ ଲାଗିଛି । ସହରର ଲୋକେ ଅଳିଆ, ଆବର୍ଜନା, ମଇଳା ପାଣି ସିଧାସଳଖ ନଦୀକୁ ଛାଡୁଛନ୍ତି । ଫୁଲବାଣୀ ପୌର ପରିଷଦ ଏହା ଉପରେ କିଛି ପଦକ୍ଷେପ ନେଉନାହିଁ । ଯାହାଫଳରେ ନଦୀ ପାଣି ଉପରେ ନିର୍ଭରଶୀଳ ଲୋକେ ନାନାଦି ରୋଗରେ ପଡୁଛନ୍ତି । ଫୁଲବାଣୀ ସ୍ଥାୟୀ ଲୋକ ଅଦାଲତରେ ଏ ସମ୍ପର୍କିତ ଏକ ମାମଲା ଦାଏର ହୋଇଥିବାବେଳେ, ଏହାର ବିଚାର ଶେଷ ହୋଇ ରାୟ ପ୍ରକାଶ ପାଇଛି । ସ୍ଥାୟୀ ଲୋକ ଅଦାଲତ ଅଧ୍ୟକ୍ଷ ସନ୍ତୋଷ କୁମାର ନାୟକ ୧୫ ଦିନ ମଧ୍ୟରେ ଦୂଷିତ ଜଳ ପ୍ରକ୍ରିୟାକରଣ ପ୍ରକଳ୍ପ/ ସ୍ବେୱେଜ ଟ୍ରିଟେମେଣ୍ଟ ପ୍ଲାଣ୍ଟ ପ୍ରତିଷ୍ଠା କରି ବିଶୁଦ୍ଧ ପାଣି ନଦୀରେ ଛାଡିବାକୁ ଫୁଲବାଣୀ ପୌର ପରିଷଦକୁ ନିର୍ଦ୍ଦେଶ ଦେଇଛନ୍ତି ।
ଏଥିସହ ସହରର ପିଅନପଡା ଦେଇ ସାଲୁଙ୍କି ନଦୀ ପାର୍ଶ୍ବରେ ଏକ ଡ୍ରେନ ନିର୍ମାଣ କରିବା, ସହରର ସମସ୍ତ ଡ୍ରେନ ପାଣି ଏହି ନୂତନ ଡ୍ରେନରେ ଛାଡି ବିଶୁଦ୍ଧ କରିବା ପରେ ତାକୁ ନଦୀରେ ମିଶାଇବାକୁ ନିର୍ଦ୍ଦେଶନାମା ଜାରି କରିଛନ୍ତି । ସେହିପରି ଘରର ଅଳିଆ, ଆବର୍ଜନା, ମଳ ଆଦି ଡ୍ରେନରେ ନ ଛାଡିବା ପାଇଁ ମାଇକ ଜରିଆରେ ଲୋକଙ୍କୁ ସଚେତନ କରିବାକୁ ପୌର ପରିଷଦ କର୍ତ୍ତୃପକ୍ଷଙ୍କୁ ସତର୍କ କରାଇଛନ୍ତି । ଯଦି କେହି ଏହାକୁ ନ ମାନନ୍ତି, ତାହାହେଲେ ଆଇନ ଅନୁସାରେ ସେମାନଙ୍କ ଠାରୁ ଫାଇନ ସଂଗ୍ରହ ସହ କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦେଇଛନ୍ତି ।
ସାଲୁଙ୍କି ନଦୀ ପ୍ରଦୂଷଣ ସମ୍ପର୍କରେ ସହରର ମାଷ୍ଟ୍ରପଡାରେ ରହୁଥିବା ଅଶୋକ ପରିଡା ସ୍ଥାୟୀ ଲୋକ ଅଦାଲତରେ ଏକ ମାମଲା ରୁଜୁ କରିଥିଲେ । ସେ ଏଥିରେ ଦର୍ଶାଇଥିଲେ ଯେ, ସହରରେ ବସବାସ କରୁଥିବା କିଛି ଲୋକେ ସିଧାସଳଖ ପାଇଖାନା ଏବଂ ଘରର ଦୂଷିତ ଜଳ ନଦୀକୁ ଛାଡୁଛନ୍ତି । ବର୍ଷା ଦିନେ ପୌର ପରିଷଦ ଡ୍ରେନର ଜଳ ଉଦବୃତ ହୋଇ ନଦୀରେ ମିଶୁଛି । ମଳ, ମୂତ୍ର ନଦୀରେ ସିଧାସଳଖ ମିଶୁଛି । ଯାହାଫଳରେ ନଦୀଜଳ ପ୍ରଦୂଷିତ ହେଉଛି । ନଦୀ କୂଳରେ ବସବାସ କରୁଥିବା ଗ୍ରାମରଲୋକେ ଏହାକୁ ପାନୀୟ ଜଳ ଭାବେ ବ୍ୟବହାର କରୁଛନ୍ତି । ଏହି ପାଣିରେ ବିଭିନ୍ନ ରାସାୟନିକ ପଦାର୍ଥ ଅପମିଶ୍ରଣ ସହ ବିଶାକ୍ତ ଦ୍ରବ୍ୟ ମଧ୍ୟ ମିଶୁଛି । ଯଦ୍ବାରା ପାଣିରେ ଫସଫରସ, ନାଇଟ୍ରୋଜେନର ପରିମାଣ ବୃଦ୍ଧି ପାଉଛି । ସମ୍ପୂର୍ଣ୍ଣ ଭାବେ ଏହି ଜଳ ଜୀବଜନ୍ତୁଙ୍କ ପାଇଁ ମଧ୍ୟ ବ୍ୟବହାରୀ ଉପଯୋଗୀ ହୋଇନାହିଁ । କିନ୍ତୁ କୌଣସି ବିକଳ୍ପ ନ ଥିବାରୁ ଲୋକେ ଏହାକୁ ବ୍ୟବହାର କରିବାକୁ ବାଧ୍ୟ ହେଉଛନ୍ତି । ଫଳରେ ବିଭିନ୍ନ ରୋଗର ଶିକାର ହୋଇ ମୃତ୍ୟୁମୁଖରେ ପଡୁଛନ୍ତି । ଏପରିକି ଗୋଟିଏ ବର୍ଷ ପର୍ଯ୍ୟନ୍ତ ଏହି ନଦୀ ଜଳରେ ହେପାଟାଇଟସ୍ ଭାଇରସ୍ ବଳବତ୍ତର ଥିଲା ।
ନର୍ମଦା ବଞ୍ଚାଅ ଆନ୍ଦୋଳନରେ ସ୍ବଚ୍ଛ ପାଣି ପାଇବା ସମସ୍ତଙ୍କ ମୌଳିକ ଅଧିକାର ବୋଲି ସମ୍ବିଧାନର ଧାରା ୨୧ରେ ଉଲ୍ଲେଖ ଥିବା ସୁପ୍ରିମକୋର୍ଟ ଦର୍ଶାଇଥିଲେ । ତେଣୁ ସାଲୁଙ୍କୀ ନଦୀକୁ ସ୍ବଚ୍ଛ କରିବା ପାଇଁ ଫୁଲବାଣୀ ସହରରେ ସ୍ବେରେଜ ଟ୍ରିଟେମେଣ୍ଟ ପ୍ଲାଣ୍ଟ ପ୍ରତିଷ୍ଠା କରିବାକୁ ଆବେଦନକାରୀ ଅଦାଲତକୁ ନିବେଦନ କରିଥିଲେ ।
ସୂଚନାଯୋଗ୍ୟ, ୨୦୧୨ ମସିହା ଜୁନ ୧୬ ତାରିଖରେ ଜିଲ୍ଲା ପ୍ରଶାସନ ପକ୍ଷରୁ ଅତିରିକ୍ତ ଜିଲ୍ଲାପାଳଙ୍କ ଅଧ୍ୟକ୍ଷତାରେ ନଦୀଜଳ ଦୂଷିତ ସଂକ୍ରାନ୍ତରେ ଏକ ବୈଠକ ବସିଥିଲା । ଏଥିରେ ଉପଜିଲ୍ଲାପାଳ, ଜନସ୍ବାସ୍ଥ୍ୟ ବିଭାଗ ସହକାରୀ ଯନ୍ତ୍ରୀ, ପୌର ନିର୍ବାହୀ ଅଧିକାରୀ, ଡାକପାଲା ଗ୍ରାମ କମିଟି ସମ୍ପାଦକ ବ୍ରହ୍ମା ବେହେରା(ଏବେ ମୃତ)ଙ୍କ ସମେତ ୧୨ ଜଣ ସଦସ୍ୟ ଉପସ୍ଥିତ ଥିଲେ । ସେହି ବୈଠକରେ ପୌର ପରିଷଦ ନିର୍ବାହୀ ଅଧିକାରୀ ପିଅନପଡା ଠାରୁ ଏକ ଡ୍ରେନ ସାଲୁଙ୍କି ନଦୀ ପାର୍ଶ୍ବରେ ନିର୍ମାଣ କରିବାକୁ କହିଥିଲେ । ଯେଉଁଥିରେ ସହରର ସବୁ ଆବର୍ଜନା, ଦୂଷିତ ପାଣି, ସହରର ଡ୍ରେନର ପାଣି ଆସି ମିଶିବ । ସେଠାରେ ବୈଜ୍ଞାନିକ ପ୍ରଣାଳୀରେ ପାଣି ବିଶୁଦ୍ଧକରଣ କରାଯାଇ ନଦୀରେ ମିଶା ଯିବାକୁ ପ୍ରତିଶ୍ରୁତି ଦେଇଥିଲେ । କିନ୍ତୁ ତାହା ଆଜି ପର୍ଯ୍ୟନ୍ତ ହୋଇପାରିନାହିଁ ।
ଇଟିଭି ଭାରତ, କନ୍ଧମାଳ
