କନ୍ଧମାଳ: ଚଳିତ ମାସ 18 ତାରିଖରେ ହେବାକୁ ଯାଉଛି 2019 ନିର୍ବାଚନର ଦ୍ବିତୀୟ ପର୍ଯ୍ୟାୟ ମଦଦାନ । ଏହି ଦିନ କନ୍ଧମାଳ ଲୋକସଭା ଆସନ ପାଇଁ ହେବ ଭୋଟଗ୍ରହଣ । ଗୋଟିଏ ପଟେ ନିର୍ବାଚନର ତାରିଖ ପାଖେଇ ଆସୁଥିବା ବେଳେ ଅନ୍ୟପଟେ ବିଭିନ୍ନ ଦଳର ଆଶାୟୀ ପ୍ରାର୍ଥୀ ନିର୍ବାଚନ ପ୍ରଚାରରେ ମାତି ଯାଇଛନ୍ତି । ଏଥର କନ୍ଧମାଳରେ ଏକ ହାଇଭୋଲଟେଜ ମୁକାବିଲା ଦେଖିବାକୁ ମିଳିପାରେ।
ଏହିକ୍ରମରେ ଏଠାରୁ କଂଗ୍ରେସରୁ ପ୍ରାର୍ଥୀ ହୋଇଥିବା ବାଲିଗୁଡା ନଗର କଂଗ୍ରେସ ସଭାପତି ମନୋଜ ଆଚାର୍ଯ୍ୟ ନିର୍ବାଚନ ପ୍ରଚାରକୁ ଜୋରଦାର କରିବା ସହ ଭୋଟରଙ୍କ ସମର୍ଥନ ହାତେଇବାରେ ଲାଗି ପଡିଛନ୍ତି । ଏଥିରେ ସେ ସଫଳ ହେଉଛନ୍ତି ନାଁ ନାହିଁ ତାହା ନିର୍ବାଚନୀ ଫଳାଫଳରୁ ସ୍ପଷ୍ଟ ହୋଇଯିବ।
'ଈଟିଭି ଭାରତ' ପକ୍ଷରୁ ପାଞ୍ଚଟି ପ୍ରଶ୍ନ ନେତାଙ୍କୁ କାର୍ଯ୍ୟକ୍ରମରେ ଆମେ ଭେଟିଥିଲୁ କନ୍ଧମାଳ ଲୋକସଭା ଆସନରୁ ପ୍ରାର୍ଥୀ କଂଗ୍ରେସରୁ ପ୍ରାର୍ଥୀ ହୋଇଥିବା ମନୋଜ ଆଚାର୍ଯ୍ୟଙ୍କୁ । ଅନ୍ୟ ଦଳ ଅପେକ୍ଷା ସେ ସ୍ଥାନୀୟ ଅଞ୍ଚଳର ହୋଇଥିବାରୁ ଏଠାକାର ସମସ୍ୟା ପ୍ରତି ତାଙ୍କର ପ୍ରତ୍ୟକ୍ଷ ଅନୁଭୂତି ରହିଛି । ନିର୍ବାଚନ ଲଢିବା ସମ୍ପର୍କରେ ପ୍ରତିକ୍ରିୟା ଦେଇ ସେ କହିଛନ୍ତି ପାନୀୟ ଜଳ,ଶିକ୍ଷା,ସ୍ବାସ୍ଥ୍ୟ ସମସ୍ୟା ସହିତ ଜଙ୍ଗଲ ଜମିପଟ୍ଟା ଓ ବେକାରୀ ସମସ୍ୟାର ସମାଧାନ ହେବ ମୋର ପ୍ରାଥମିକତା।
ଏଥରର ନିର୍ବାଚନରେ ତାଙ୍କର ସ୍ଲୋଗାନ ରହିଛି,'ଉଠିବ କଂଗ୍ରେସ ହସିବ ଓଡିଶା' । ସମଗ୍ର ଜିଲା ସହିତ ଏହି ସଂସଦୀୟ କ୍ଷେତ୍ରରେ ଗୋଟିଏ ହେଲେ ମଧ୍ୟ ଶୀତଳ ଭଣ୍ଡାର ନାହିଁ । ସେଥିପାଇଁ ଚାଷୀ ବିଭିନ୍ନ ସମସ୍ୟାର ସମ୍ମୁଖୀନ ହେଉଥିବା ବେଳେ ଚାଷ ଉଜୁଡି ଯିବା ଅବସ୍ଥାକୁ ଆସିଯାଇଛି ।
ଜିଲ୍ଲାରେ ଶୀତଳ ଭଣ୍ଡାର ନିର୍ମାଣ କରିବା ମୋର ଲକ୍ଷ୍ୟ । ଏହାକୁ ଛାଡି ଶିକ୍ଷା, ଜଳସେଚନ ଭଳି କ୍ଷେତ୍ରକୁ ଗୁରୁତ୍ବ ଦେବି । ଜଳସେଚନ ପାଇଁ ଥିବା ବିଭିନ୍ନ ପ୍ରକଳ୍ପ ଗୁଡିକ ଅଚଳ ହୋଇପଡିଛି । ଯଥାସମ୍ଭବ ଏହାର ପୁନରୁଦ୍ଧାର ହେବା ଆବଶ୍ୟକ । ଏଥିସହିତ ନୂଆ ପ୍ରକଳ୍ପ ନିର୍ମାଣ କରିବାକୁ ଯୋଜନା ରଖିଛନ୍ତି ମନୋଜ । ଏହାକୁ ଛାଡି ସାଂସଦ ପାଣ୍ଠିକୁ ସେ ଗ୍ରାମସଭା ମାଧ୍ୟମରେ ବିନିଯୋଗ କରିବାକୁ ଯୋଜନା କରିଛନ୍ତି । ପୂର୍ବରୁ ଏହି ସଂସଦୀୟ କ୍ଷେତ୍ରରୁ ନିର୍ବାଚିତ ହୋଇଥିବା ସାଂସଦ ସେମାନଙ୍କର ସାଂସଦ ପାଣ୍ଠିର ଦୂରୋପଯୋଗ କରିଛନ୍ତି ବୋଲି ଅଭିଯୋଗ ଆଣିଛନ୍ତି ସେ ।
