ଫୁଲବାଣୀ: କନ୍ଧମାଳ ଜିଲ୍ଲାରେ ଲଗାଣ ବର୍ଷା ପ୍ରଭାବରେ ବ୍ୟାପକ କ୍ଷୟକ୍ଷତି ଘଟିଛି । ଜିଲ୍ଲାର ବିଭିନ୍ନ ବ୍ଲକରେ ମୋଟ ୯୩ଟି କଚ୍ଚା ଘର ଭାଙ୍ଗିଛି । ପ୍ରଶାସନ ପକ୍ଷରୁ ମୋଟ ୯୮ ପରିବାରକୁ ପଲିଥିନ ଦିଆଯାଇଥିବା ବେଳେ ଅନ୍ୟାନ୍ୟ ଆନୁସଙ୍ଗିକ ସୁବିଧା ଯୋଗାଇ ଦେଇଛି ।
ଫୁଲବାଣୀ ସହର ନାରାୟଣୀ ମନ୍ଦିର ପାଖ ତ୍ରିଦେବ ନଗରରେ ବସବାସ କରୁଥିବା ମୋଟ ୨୦୮ ଜଣଙ୍କୁ ଜିଲ୍ଲା ପ୍ରଶାସନ ପକ୍ଷରୁ ସଂସ୍କୃତି ଭବନ ସଭାଗୃହରେ ରଖାଯାଇ ସେମାନଙ୍କ ଖାଇବା ପିଇବା ବନ୍ଦୋବସ୍ତ କରାଯାଇଥିଲା । ସୋମବାର ବର୍ଷା ନ ହେବାରୁ ସେମାନଙ୍କୁ ତାଙ୍କ ଘରକୁ ଛାଡି ଦିଆଯାଇଛି । ପ୍ରବଳ ବର୍ଷା ସତ୍ତ୍ବେ ଜିଲ୍ଲାକୁ ସଂଯୋଗ କରୁଥିବା ମୁଖ୍ୟ ରାସ୍ତା, ପୋଲ ଆଦିର କିଛି କ୍ଷୟକ୍ଷତି ହୋଇ ନ ଥିବା ଅତିରିକ୍ତ ଜିଲାପାଳ ବସନ୍ତ କୁମାର ସାହୁ ପ୍ରକାଶ କରିଛନ୍ତି ।
ଜିଲ୍ଲା ପ୍ରଶାସନର ସୂଚନା ଅନୁସାରେ ଜି. ଉଦୟଗିରି ବ୍ଲକରେ ସର୍ବାଧିକ ୨୦, ଫୁଲବାଣୀ ୧୭, ଖଜୁରୀପଡା ୧୪, ରାଇକିଆ ୧୦, କ. ନୂଆଗାାଁ ୬, ଫିରିଙ୍ଗିଆ ୩, ଚକାପାଦ ୯, କୋଟଗଡ ୨, ଦାରିଙ୍ଗିବାଡି ୮, ଟିକାବାଲି ୬ ଏବଂ ତୁମୁଡିବନ୍ଧ ବ୍ଲକ ଅଞ୍ଚଳରେ ୩ଟି ଘର ଭାଙ୍ଗି ଯାଇଛି । ଗତ ଶନିବାର ରାତିରେ ପ୍ରବଳ ବର୍ଷା ଯୋଗୁଁ ଜିଲ୍ଲାରେ ଏଭଳି ପରିସ୍ଥିତି ସୃଷ୍ଟି ହୋଇଛି । ଖାଲି ଫୁଲବାଣୀରେ ସର୍ବାଧିକ ୧୮୩.୪ ମିମି ବର୍ଷା ରେକର୍ଡ କରାଯାଇଥିଲା । ଲଗାଣ ବର୍ଷା ଯୋଗୁ ସହରର ଅନେକ ସାହିର ଲୋକଙ୍କ ଘରେ ପାଣି ବସି ଯାଇଥିଲା । ଲୋକେ ନାହିଁ ନ ଥିବା ହଇରାଣ ହୋଇଛନ୍ତି । ଏବେ ବର୍ଷା ବନ୍ଦ ହେବାରୁ ପରିସ୍ଥିତି ସ୍ବାଭାବିକ ହେବାରେ ଲାଗିଛି ।
ଇଟିଭି ଭାରତ, କନ୍ଧମାଳ
