ଫୁଲବାଣୀ: ଭାରତୀୟ ଜନତା ପାର୍ଟି(BJP)ର କନ୍ଧମାଳ ଜିଲ୍ଲା ପ୍ରଭାରୀ ତଥା ରାଜ୍ୟ BJP ପ୍ରବକ୍ତା ବିରଞ୍ଚି ନାରାୟଣ ତ୍ରିପାଠୀଙ୍କ ଗାଡି ଉପରେ ହୋଇଛି ଆକ୍ରମଣ । ସେ ଫୁଲବାଣୀରେ ପୌରପରିଷଦ ପ୍ରଚାର କରି ରାତିରେ ୬ ନମ୍ବର ୱାର୍ଡରେ ଦଳୀୟ ନେତାଙ୍କ ଘରେ ରାତ୍ରୀ ଯାପନ କରିଥିଲେ । ଘର ପାଖରେ ଗାଡ଼ି ରହିଥିବା ବେଳେ ଦୁର୍ବୃତ୍ତମାନେ ତାଙ୍କ ଗାଡ଼ିକୁ ପଥର ମାରି ଭାଙ୍ଗିଥିବା ଅଭିଯୋଗ ହୋଇଛି ।
ତ୍ରିପାଠୀ କନ୍ଧମାଳ ଜିଲା ଫୁଲବାଣୀରେ ପୌରପରିଷଦ ପ୍ରଚାର କରି ରାତିରେ ୬ ନଂ ୱାର୍ଡରେ ବିଜେପି ରାଜ୍ୟ କାର୍ଯ୍ୟକାରିଣୀ ସଦସ୍ୟ ଭଗବାନ ମହାନ୍ତିଙ୍କ ଘରେ ରାତ୍ରୀ ଯାପନ କରିଥିଲେ । ତାଙ୍କ ମାରୁତି ୱାଗନର ଗାଡିଟି ଘର ପାଖରେ ରଖିଥିଲେ । ତେବେ ରାତିରେ କେହି ଦୁର୍ବୃତ୍ତ ପଥର ମାରି ତାଙ୍କ ଗାଡ଼ିକୁ ଭାଙ୍ଗି ଦେଇଥିବା ଜଣାପଡିଛି । ଏହା ସହିତ କିଛି ବିଜେପି ବ୍ୟାନରକୁ ମଧ୍ୟ ଚିରି ଫୋପାଡ଼ି ଦେଇଛନ୍ତି ।
ଏହା ଆଗରୁ ମଧ୍ୟ ବିଜେଡି ପୋଷ୍ଟରକୁ ଚିରିବା ସହିତ ବିଜେଡି କର୍ମୀଙ୍କୁ ମାଡ ମାରିଥିବା ଥାନାରେ ଅଭିଯୋଗ ହୋଇଥିଲା । ସେପଟେ ଘଟଣାରେ ପୋଲିସ କୌଣସି କାର୍ଯ୍ୟାନୁଷ୍ଠାନ ନେଉ ନାହିଁ ବୋଲି ବିଜେପି ରାଜ୍ୟ କାର୍ଯ୍ୟକାରିଣୀ ସଦସ୍ୟ ଭଗବାନ ମହାନ୍ତି ଅଭିଯୋଗ କରିଛନ୍ତି ।
କନ୍ଧମାଳରୁ ସଞ୍ଜୟ ପାତ୍ର, ଇଟିଭି ଭାରତ
