ଫୁଲବାଣୀ: କନ୍ଧମାଳରେ ଲାଲ ବାହିନୀର ବର୍ବର କାଣ୍ଡ । ପୋଲିସ ଇନଫର୍ମର ସନ୍ଦେହରେ ଦୁଇ ଯୁବକଙ୍କୁ ନିର୍ମମ ଭାବେ ହତ୍ୟା କରିଛନ୍ତି ମାଓବାଦୀ । ବେଲଘର ଥାନା ଗୋଛାଗୁଡା ଗାଁରେ ବିଳମ୍ବିତ ରାତିରେ ଘରୁ ଡାକି ନେଇ ଦୁଇ ଯୁବକଙ୍କୁ ହତ୍ୟା କରିଥିବା ସୂଚନା ମିଳିଛି l
ଭଣ୍ଡାରଙ୍ଗୀ ପଞ୍ଚାୟତର ସରପଞ୍ଚଙ୍କ ପୁଅ ଭବାନୀ ଶଙ୍କର ପାତ୍ର ଓ ଗୋଛାଗୁଡା ଗାଁର ହେମନ୍ତ ପାତ୍ରକୁ ନିର୍ମମ ଭାବେ ମାଓବାଦୀ ହତ୍ୟା କରିଛନ୍ତି । ଭବାନୀଙ୍କ ମୃତଦେହ ପଞ୍ଚାୟତ ଅଫିସ୍ ସମ୍ମୁଖରେ ପଡ଼ିରହିଛି । ସେହିପରି ଗାଁର ଅନ୍ୟ ଏକ ସ୍ଥାନରେ ହେମନ୍ତଙ୍କ ମୃତଦେହ ପଡିଛି । ଏହାପରେ ଅଞ୍ଚଳରେ ଆତଙ୍କର ବାତାବରଣ ସୃଷ୍ଟି ହୋଇଛି । ଏପରି ଘଟଣା ପ୍ରଥମ ହୋଇଥିବାରୁ ଆତଙ୍କିତ ହୋଇଯାଇଛନ୍ତି ଲୋକେ ।
ତେବେ ହତ୍ୟା କରିବା ପରେ ଘଟଣାସ୍ଥଳରେ ହାତଲେଖା ମାଓ ପୋଷ୍ଟର ଛାଡ଼ିଛି ଲାଲ ବାହିନୀ । ଏଥିରେ ସିପିଆଇ ମାଓବାଦୀ ବାଶଦାରା ଘୁମୁସର ନାଗାବଳୀ( ବା.ଘୁ.ନା ) ଡ଼ିଭିଜନ ଏହି ଦଣ୍ଡ ଦେଇଥିବା ଉଲ୍ଲେଖ ରହିଛି । ସିର୍କି ଏନକାଉଣ୍ଟରରେ ମୃତ 5 ମାଓବାଦୀଙ୍କୁ ଚିହ୍ନଟ ସହ ପୋଲିସକୁ ମାଓ କ୍ୟାମ୍ପ ଏମାନେ ଦେଖାଇଥିଲେ ବୋଲି କହିଛି ମାଓ ସଙ୍ଗଠନ ।
ଏହା ସହିତ ଆଦିବାସୀ ଗୋଣ୍ଡ ସମାଜକୁ ମଧ୍ୟ ପୋଲିସକୁ ସହାୟତା ନଦେବାକୁ ଏଥିରେ ଉଲ୍ଲେଖ ରହିଛି । ତେବେ ଶେଷ ଖବର ସୁଦ୍ଧା ପୋଲିସ ଘଟଣାସ୍ଥଳକୁ ଯାଇପାରିନଥିବା ଜଣାପଡିଛି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
