ଫୁଲବାଣୀ: ପ୍ରଥମେ ପ୍ରେମ ପରେ ଶାରିରୀକ ସମ୍ପର୍କ ଓ ଶେଷରେ ପ୍ରତାରଣା ଓ ଗର୍ଭପାତ । ଏହାର ଏକ ଦୃଶ୍ୟ ଜିଲ୍ଲାର ଦାରିଙ୍ଗବାଡି ଥାନା ଅଞ୍ଚଳରେ ଦେଖିବାକୁ ମିଳିଛି । ଯେଉଁଠାରେ ଜଣେ ଯୁବତୀଙ୍କୁ ବିବାହ ପ୍ରତିଶୃତି ଦେଇ ଶାରିରୀକ ସମ୍ପର୍କ ସ୍ଥାପନ କରିଥିଲେ ଗ୍ରୀନବାଡି ସମିତି ସଭ୍ୟଙ୍କ ପୁଅ ଆକାଶ ପ୍ରଧାନ । ହେଲେ ଯୁବତୀ ଜଣଙ୍କ ଗର୍ଭବତୀ ହେବା ପରେ ତାଙ୍କୁ ଏକ ନକଲି ଡାକ୍ତର ବା କ୍ବାକ ପାଖକୁ ନେଇ ଆକାଶ ଜବରଦସ୍ତି ଗର୍ଭପାତ କରାଇଥିଲେ । ଏନେଇ ଯୁବତୀ ଜଣଙ୍କ ଥାନାରେ ଅଭିଯୋଗ କରିବା ପରେ ଉଭୟ ପ୍ରେମିକ ଓ କ୍ବାକକୁ ଗିରଫ କରିଛି ଦାରିଙ୍ଗବାଡି ପୋଲିସ ।
ସୂଚନା ମୁତାବକ ସମ୍ପୃକ୍ତ ଯୁବତୀ ଜଣଙ୍କ ଭୁବନେଶ୍ବରର ଏକ କମ୍ପାନୀରେ ଚାକିରୀ କରୁଥିବା ବେଳେ ଲକଡାଉନ ଯୋଗୁଁ କାମ ବନ୍ଦ ହେବା ପରେ ସେ ଗତ ମାର୍ଚ୍ଚରେ ଗାଁକୁ ଫେରିଥିଲେ । ସେଠାରେ ଆକାଶଙ୍କ ସହ ତାଙ୍କର ପ୍ରେମ ସମ୍ପର୍କ ଗଢି ଉଠିଥିଲା । ଆଉ ବିବାହ ପ୍ରତିଶୃତି ଦେଇ ଆକାଶ ଯୁବତୀଙ୍କ ସହ ଶାରିରୀକ ସମ୍ପର୍କ ମଧ୍ୟ ରଖିଥିଲେ । ହେଲେ ଯୁବତୀ ଜଣଙ୍କ ଗର୍ଭବତୀ ହେବା ପରେ ଆକାଶ ବିବାହିତ ଓ ତାଙ୍କର ଗୋଟିଏ ସନ୍ତାନ ଥିବାରୁ ଯୁବତୀଙ୍କୁ ଗର୍ଭପାତ କରାଇବା ପାଇଁ ବାଧ୍ୟ କରିଥିଲେ । ଏଥିପାଇଁ ଯୁବତୀ ଜଣଙ୍କୁ ଦାରିଙ୍ଗବାଡି ନେଇ ଏକ କ୍ବାକ ଆଶୋକ ସାହୁ ଦ୍ବାରା ଗର୍ଭପାତ କରାଇଥିଲେ । ଏଥିସହ ଏସମ୍ପର୍କରେ ମୁହଁ ଖୋଲିଲେ ଯୁବତୀ ଜଣଙ୍କୁ ଜୀବନ ମାରି ଦେବା ପାଇଁ ଆକାଶ ଧମକ ଦେଇଥିଲା ।
ତେବେ ଏନେଇ ଯୁବତୀ ଜଣଙ୍କ ରବିବାର ଦାରିଙ୍ଗବାଡି ଥାନାରେ ଏକ ଲିଖିତ ଅଭିଯୋଗ କରିଥିଲେ । ମାମଲା ନଂ 81/20 ଅନୁଯାୟୀ ପୋଲିସ ଘଟଣାର ତଦନ୍ତ କରି ଅଭିଯୁକ୍ତ ଆକାଶ ଓ ଅଶୋକ ଗିରଫ କରି କୋର୍ଟ ଚାଲାଣ କରିଛି । ଏନେଇ ସୂଚନା ଦେଇଛନ୍ତି ଥାନା ଅଧିକାରୀ କୌଶିକ ମାଝୀ । ଗୋଟିଏ ପଟେ ଦାରିଙ୍ଗବାଡି କୋର୍ଟରେ ପୀଡିତାଙ୍କ ବୟାନ ରେକର୍ଡ ହୋଇଥିବା ବେଳେ ଅନ୍ୟପଟେ ଜାମିନ ଖାରଜ ହେବାରୁ ଜେଲ ଯାଇଛନ୍ତି ଦୁଇ ଅଭିଯୁକ୍ତ ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
