ଫୁଲବାଣୀ: ଉତ୍କଳ ଦିବସରେ ଆଉ ଏକ ଉପଲବ୍ଧି ହାସଲ କଲା ଓଡିଶା । ଦୀର୍ଘ ଦିନ ପରେ କନ୍ଧମାଳ ହଳଦୀକୁ ମିଳିଲା ଜିଆଇ ମାନ୍ୟତା । ଚେନ୍ନାଇରେ ଥିବା ଜିଆଇ କାର୍ଯ୍ୟାଳୟ କନ୍ଧମାଳ ହଳଦୀକୁ ଜିଆଇ(ଜୋଗ୍ରାଫିକାଲ ଇଣ୍ଡିକେସନ୍) ପ୍ରମାଣପତ୍ର ପ୍ରଦାନ କରିଛି । ଏହାଦ୍ବାରା କନ୍ଧମାଳ ଜିଲାର ପ୍ରାୟ ଷାଠିଏ ହଜାର ଚାଷୀ ପରିବାର ଏହା ଦ୍ବାରା ଉପକୃତ ହେବେ ।
ଗତବର୍ଷ ଜାନୁଆରୀରେ ‘କସମ’ ସଂସ୍ଥା ମାଧ୍ୟମରେ ଜିଆଇ ଟ୍ୟାଗ ପାଇଁ ଆବେଦନ କରିଥିଲା ଜିଲ୍ଲା ପ୍ରଶାସନ । ତେବେ କମ୍ ମୂଲ୍ୟରେ ବିକ୍ରି କରି କ୍ଷତି ସହୁଥିବା ହଳଦୀ ଚାଷୀଙ୍କ ପାଇଁ ଖୁସି ଖବର । ଜିଆଇ ମାନ୍ୟତା ପାଇବା ପରେ ହଳଦୀର ମୂଲ୍ୟବୃଦ୍ଧି ଯୋଗୁଁ ନିଶ୍ଚିତ ରୂପେ ଚାଷୀ ଉପକୃ୍ତ ହେବା ନେଇ କହିଛନ୍ତି କସମ ସଂସ୍ଥାର ସମ୍ପାଦକ ।
ଏହି ସଂସ୍ଥାରେ ପ୍ରାୟ ବାର ହଜାର ଚାଷୀ ପରିବାର ଅଛନ୍ତି । ବିଭିନ୍ନ ପର୍ଯ୍ୟାୟର ଯାଞ୍ଚ ପରେ କସମକୁ ଏହି ପ୍ରମାଣପତ୍ର ମିଳିଛି । ହଜାର ହଜାର ଚାଷୀ ପରିବାର ଏହାଦ୍ବାରା ଉପକୃତ ହେବେ ବୋଲି ଆଶା କରାଯାଉଛି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
