କନ୍ଧମାଳ: ସାଧାରଣ ନିର୍ବାଚନ ପାଇଁ ସାରା ରାଜ୍ୟର ରାଜନୀତି ପାରଦ ବେଶ ଉଚ୍ଚରେ ଥିବା ବେଳେ ନେତାଙ୍କ ଉତ୍କଣ୍ଠା ବଢିବାରେ ଲାଗିଛି । ଶାସକ ବିଜେଡି ଦଳ ପ୍ରଥମ ଦଫାରେ 54 ବିଧାନସଭା ସହ 9 ଗୋଟି ଲୋକସଭା ଆସନ ପାଇଁ ପ୍ରାର୍ଥୀ ଘୋଷଣା କରିଥିବା ବେଳେ କଂଗ୍ରେସ ବି 36 ବିଧାନସଭା ଓ 6 ଲୋକସଭା ପ୍ରାର୍ଥୀଙ୍କୁ ଟିକେଟ ଦେଇଛି । କିନ୍ତୁ ବିଜେପିର ଟିକେଟ ଅଙ୍କ ଏବେବି ଜଟିଳ ସ୍ଥିତିରେ ଅଛି । ବିଜେଡି ଓ କଂଗ୍ରେସର ଟିକେଟ ଘୋଷଣା ପରେ ଏବେ ଉଭୟ ଦଳରେ ଦେଖା ଦେଇଛି ବିଦ୍ରୋହ ।
ଶାସକ ବିଜେଡି ପ୍ରଥମ ପର୍ଯ୍ୟାୟରେ କିଛି ପୁରୁଖା ନେତାଙ୍କ ଟିକେଟ କାଟିଥିବାରୁ ଦଳରେ ଏବେ ଦେଖା ଦେଇଛି ବିଦ୍ରୋହ । ଟିକେଟ ତାଳିକାରୁ ବାଦ ପଡିଛନ୍ତି କନ୍ଧମାଳ ସାଂସଦ ପ୍ରତ୍ୟୁଷା ରାଜେଶ୍ବରୀ , ତାଙ୍କ ସ୍ଥାନରେ ରାଜ୍ୟସଭା ସାଂସଦ ଅଚ୍ୟୁତ ସାମନ୍ତଙ୍କୁ ଦଳ କନ୍ଧମାଳ ଲୋକସଭା ପାଇଁ ଦେଇଛି ଟିକେଟ । ସେପଟେ କଂଗ୍ରେସ ମଧ୍ୟ ଲୋକସଭା ପାଇଁ ଦଳୀୟ ପ୍ରାର୍ଥୀ ଭାବେ ସ୍ଥାନୀୟ ଯୁବନେତା ମନୋଜ ଆଚାର୍ଯ୍ୟଙ୍କୁ ଦେଇଛି ଟିକେଟ୍ କିନ୍ତୁ ଏପର୍ଯ୍ୟନ୍ତ ବିଜେପି କାହାକୁ ମଇଦାନକୁ ଓହ୍ଲାଇବ ସ୍ଥିର କରିପାରୁନାହିଁ ।
ଗତକିଛିଦିନ ଧରି ସ୍ଥାନୀୟ ଲୋକ କନ୍ଧମାଳ ଲୋକସଭା ପାଇଁ ସ୍ଥାନୀୟ ନେତାଙ୍କୁ ପ୍ରାର୍ଥୀ କରିବା ପାଇଁ ଦାବୀ କରିଆସୁଥିଲେ । ହେଲେ ବିଜେଡି ବାହାର ପ୍ରାର୍ଥୀଙ୍କୁ ଟିକେଟ ଦେଇଛି , ଏବେ ଅଚ୍ୟୁତଙ୍କ ନେଇ ଜିଲ୍ଲାରେ ଦେଖାଦେଇଛି ମିଶ୍ର ପ୍ରତିକ୍ରିୟା । କଂଗ୍ରେସ କିନ୍ତୁ ସ୍ଥାନୀୟ ନେତାଙ୍କୁ ପ୍ରାର୍ଥୀକରି ବିଜୟୀ ହେବାକୁ ଆଶା ବାନ୍ଧିଛି , ଏବେ ନଜର ବିଜେପି ଉପରେ ଦଳ ସ୍ଥାନାୟ ନେତାଙ୍କୁ ପ୍ରାଧାନ୍ୟ ଦେଉଛି ନା ବାହାର ପ୍ରାର୍ଥୀଙ୍କୁ ମଇଦାନକୁ ଆଣୁଛି ।
ଏହାରି ଭିତରେ ଟିକେଟରୁ ବାଦ ପଡିଥିବା ସାଂସଦ ପ୍ରତ୍ୟୁଷା ରାଜେଶ୍ବରୀ ଦଳରୁ ଇସ୍ତଫା ଦେଇଛନ୍ତି । ଏହାସହ ଆହୁରୀ ନେତା ଇସ୍ତଫା ଦେବାପାଇଁ ସଜବାଜ ହେଉଛନ୍ତି । ଏହି ଦଳ ଡିଆଁ ରାଜନୀତି କେଉଁ ଦଳକୁ କେତେ ସଫଳତା ଦେଉଛି ତାହାକୁ ଅପେକ୍ଷା ।
କନ୍ଧମାଳରୁ ସଦାଶିବ ପାତ୍ର , ଇଟିଭି ଭାରତ
