ଫୁଲବାଣୀ: କନ୍ଧମାଳ ଜିଲ୍ଲା ଗସ୍ତରେ ଆସିଥିଲେ କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁ । ଏହି ଅବସରରେ ସେ ଜିଲ୍ଲାରେ ବିଭିନ୍ନ କାର୍ଯ୍ୟକ୍ରମରେ ଯୋଗ ଦେଇ ପ୍ରକଳ୍ପ ଉଦଘାଟନ ଓ ଶିଳାନ୍ୟାସ କରିଛନ୍ତି । ସକାଳ ୧୦ଟାରେ ମାନସିଂ ଭୈରବୀ ମିନି ଷ୍ଟାଡିୟମରେ ପହଞ୍ଚିଥିଲେ କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁ । ଆଦିବାସୀ ପାରମ୍ପରିକ ନୃତ୍ୟ ସହ ବାଦ୍ୟ ବଜାଇ ମନ୍ତ୍ରୀଙ୍କ ସ୍ବାଗତ କରାଯାଇଥିଲା ।
ଏହାପରେ କେନ୍ଦ୍ରମନ୍ତ୍ରୀ ମୁଣ୍ଡିଗଡ଼ର ତୁତୁଲମାହାରେ ପହଞ୍ଚି ୩୦ କୋଟି ଟଙ୍କାର ଏକଲବ୍ୟ ମଡେଲ ସ୍କୁଲର ଶିଳାନ୍ୟାସ କରିଛନ୍ତି । କନ୍ଧମାଳ ଜିଲ୍ଲାରେ ତୁମୁଡ଼ିବନ୍ଧ ସମେତ ଆଉ ୮ଟି ଏକଲବ୍ୟ ମଡେଲ ସ୍କୁଲ ପାଇଁ କେନ୍ଦ୍ର ସରକାର ଅନୁମୋଦନ କରିଛନ୍ତି । ଶିଳାନ୍ୟାସ ପରେ ମିଶ୍ରଣ ପର୍ବ ଆରମ୍ଭ ହୋଇଥିଲା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆଦର୍ଶରେ ଅନୁପ୍ରାଣିତ ହୋଇ ତୁମୁଡ଼ିବନ୍ଧ ବ୍ଲକର ଅନ୍ୟ ଦଳରୁ ଅଧିକାଂଶ କର୍ମୀ ବିଜେପିରେ ମିଶିଥିଲେ l ପରେ ବ୍ରହ୍ମଲୀନ ବେଦାନ୍ତ କେଶରୀ ସ୍ୱାମୀ ଲକ୍ଷ୍ମଣlନନ୍ଦ ସରସ୍ବତୀଙ୍କ ସଂସ୍କୃତ ଆଶ୍ରମ ପରିଦର୍ଶନ ଯାଇ ମନ୍ତ୍ରୀ ଅନ୍ତେବାସୀଙ୍କୁ ଭେଟିଥିଲେ ।
ଏହାପରେ ତୁମୁଡ଼ିବନ୍ଧ ବ୍ଲକ ସଭାଗୃହରେ ବେଲଘରରେ କାର୍ଯ୍ୟ କରୁଥିବା କୁଟିଆ କନ୍ଧ ଉନ୍ନୟନ ସଂସ୍ଥାର କାର୍ଯ୍ୟର ସମୀକ୍ଷା ବୈଠକରେ ଯୋଗ ଦେଇଥିଲେ । ଏଥିରେ ଅତିରିକ୍ତ ଜିଲ୍ଲାପାଳ ବସନ୍ତ କୁମାର ସାହୁ, ତୁମୁଡ଼ିବନ୍ଧ ବିଡିଓ ଏମ ଅନୁରାଧା, ବାଲିଗୁଡା ତହସିଲଦାର ଶଶାଙ୍କ ଶେଖର ପାତ୍ର, ବାଲିଗୁଡା ବିଡିଓ ଡ଼ ଜଗଦୀଶ ଷଡ଼ଙ୍ଗୀ, କେ କେଡିଏ ପ୍ରକଳ୍ପ ଅଧିକାରୀ ସମେତ ସରକାରୀ ଅଧିକାରୀ ଯୋଗ ଦେଇଥିଲେ । ବିଭିନ୍ନ ପ୍ରକଳ୍ପ ଉପରେ ପୁନଃ ତଦାରଖ କରିବାକୁ ପରାମର୍ଶ ଦେଇଛନ୍ତି କେନ୍ଦ୍ରମନ୍ତ୍ରୀ ।
କନ୍ଧମାଳରୁ ସଞ୍ଜୟ ପାତ୍ର, ଇଟିଭି ଭାରତ
