ଫୁଲବାଣୀ: କନ୍ଧମାଳ ଜିଲ୍ଲାର ବିଭିନ୍ନ ୱାର୍ଡରେ ଶହ ଶହ ଲୋକଙ୍କ ଭୋଟର ଲିଷ୍ଟରେ ନାମ ନାହିଁ । ଯାହା ଫଳରେ ସରପଞ୍ଚ, ସମିତି ସଭ୍ୟ/ସଭ୍ୟା ଠାରୁ ଆରମ୍ଭ କରି ୱାର୍ଡ ମେମ୍ବର ପାଇଁ ଆଶାୟୀ ପ୍ରାର୍ଥୀମାନେ ନାମାଙ୍କନ ଦାଖଲ ପାରିନାହାନ୍ତି । ଯାହାକୁ ନେଇ ଅସନ୍ତୋଷ ବ୍ୟାପିବାରେ ଲାଗିଛି । ଆଜି ଆଉ ଏକ ଘଟଣା ଦେଖିବାକୁ ମିଳିଛି ଖଜୁରୀପଡ଼ା ବ୍ଲକ ଅର୍ନ୍ତଗତ ଟ୍ରୀଟାପଙ୍ଗା ପଞ୍ଚାୟତର ୪ ନଂ ୱାର୍ଡର ଗଣ୍ଡାକାଠୀ ଗ୍ରାମବାସୀଙ୍କ କ୍ଷେତ୍ରରେ ।
ଗାଁରେ ବାସ କରୁଥିବା ୯୦ ଜଣଙ୍କ ଭୋଟର ଲିଷ୍ଟରେ ନାମ ନାହିଁ । ଆଗାମୀ ତ୍ରିସ୍ତରୀୟ ନିର୍ବାଚନରେ ଗ୍ରାମର ସମସ୍ତ ଭୋଟର ଭୋଟ ଦେବାରୁ ବଞ୍ଚିତ ରହିବେ । ଏପରି କି ୱାଡ଼ ମେମ୍ବର ପାଇଁ ମଧ୍ୟ କେହି ନାମାଙ୍କନ ଭରି ପାରିନାହାନ୍ତି । ଯାହାକୁ ନେଇ ଉତ୍ୟକ୍ତ ଗ୍ରାମବାସୀ ଖଜୁରୀପଡ଼ା ବ୍ଲକ ଯାଇ ବ୍ଲକରେ ତାଲା ପକାଇଥିବାବେଳେ ପଞ୍ଚାୟତରେ ମଧ୍ୟ ମହିଳାମାନେ ତାଲା ପକାଇଥିଲେ । ପୋଲିସ ଖବର ପାଇ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାଇ ତାଲା ଖୋଲାଇଥିଲେ । ତେବେ ପଞ୍ଚାୟତ ଅଫିସ ସମ୍ମୁଖରେ ଗ୍ରାମବାସୀ ବସି ରହିଥିଲେ ।
କନ୍ଧମାଳରୁ ସଞ୍ଜୟ ପାତ୍ର, ଇଟିଭି ଭାରତ
