ଫୁଲବାଣୀ: କନ୍ଧମାଳ ଜିଲ୍ଲାର ଅନ୍ୟତମ ଶକ୍ତି ପୀଠ ତଥା ପର୍ଯ୍ୟଟନ ସ୍ଥଳୀ ଫୁଲବାଣୀର ମା’ ନାରାୟଣୀ ପୀଠ । ଏହି ଅଞ୍ଚଳ ଏବେ ଅସାମାଜିକଙ୍କ ଚରାଭୁଇଁ ପାଲଟିଛି। ବିଭିନ୍ନ ସମୟରେ ବେଆଇନ କାମରେ ଲିପ୍ତ ରହୁଛନ୍ତି ଅସାମାଜିକ ଯୁବକ। ରୀତିମତ ଏଠି ଚୋରି ଓ ଅନ୍ୟ ଅସାମାଜିକ କାର୍ଯ୍ୟ ଚାଲୁଛି। ତେବେ ଏଥିପ୍ରତି ଆଦର୍ଶ ଟାଉନ ଥାନା ପୋଲିସ ନିରବଦ୍ରଷ୍ଟା ସାଜିଛି ।
ପୁଣି ମା’ ନାରାୟଣୀ ପୀଠକୁ ଲାଗିଥିବା ଦୋକାନରୁ ଚୋରି ହୋଇଛି । ଦୋକାନର ଆଜବେଷ୍ଟସ ଛାତ ଭାଙ୍ଗି ଚୋରି କରିଛନ୍ତି ଚୋର। ତେବେ ଲୋକେ ଚୋରଙ୍କ ସମ୍ପର୍କରେ ଗତ ରାତିରେ ସୂଚନା ଦେଇଥିଲେ ହେଁ ପୋଲିସ ଆସିନଥିଲା। ସେପଟେ ପାଟିତୁଣ୍ଡରୁ ଭୟଭୀତ ହୋଇ ଚୋର ନିଜ ଗାଡି ଛାଡି ଯାଇଥିଲେ । ଉକ୍ତ ଗାଡିକୁ ଗାଁ ଲୋକେ ଜବତ କରି ଥାନାରେ ଦେଇଛନ୍ତି ।
ଚୋରଙ୍କ ସମ୍ପର୍କରେ ତଦନ୍ତ ଚାଲିଛି ବୋଲି ସୁଚନା ଦେଇଛି ପୋଲିସ। ସେପଟେ ଦୋକାନୀଙ୍କ ସବୁ ଟଙ୍କା ଓ ଜିନିଷ ଚୋରି ହୋଇଛି ବୋଲି ଥାନାରେ ଅଭିଯୋଗ କରିଛନ୍ତି ଦୋକାନୀ । ଏହି ଅଞ୍ଚଳରେ ଅସାମାଜିକ ଯୁବକଙ୍କ ଦୌରାତ୍ମ୍ୟ ବଢିଚାଲିଛି । ଏହି ଶକ୍ତି ପୀଠକୁ ବିଭିନ୍ନ ଜିଲ୍ଲାରୁ ଶ୍ରଦ୍ଧାଳୁ ଓ ପର୍ଯ୍ୟଟକ ବହୁ ସଂଖ୍ୟାରେ ଆସୁଥିବା ବେଳେ ସୁରକ୍ଷାକୁ ନେଇ ସମସ୍ତେ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
