ଫୁଲବାଣୀ: ପୁଣିଥରେ କନ୍ଧମାଳ ଜିଲ୍ଲା ତୁମୁଡିବନ୍ଧ ଥାନା ଅନ୍ତର୍ଗତ ଶିର୍ଲା ଜଙ୍ଗଲରେ ହୋଇଛି ପୋଲିସ ନକ୍ସଲ ଗୁଳିବିନିମୟ । ସୁରକ୍ଷାକର୍ମୀଙ୍କ ଗୁଳି ମାଡ଼ରେ ଆଉ ଜଣେ ନକ୍ସଲ ନିହତ ହୋଇଥିବା ସୂଚନା ମିଳିଛି । ତେବେ ଏହି ନକ୍ସଲ ବିଜିଏନ ଡିଭିଜନର ବୋଲି ଜଣାପଡିଥିଲେ ବି ପରିଚୟ ମିଳିନାହିଁ ବୋଲି କନ୍ଧମାଳ ଏସପି ସୂଚନା ଦେଇଛନ୍ତି ।
ଫୁଲବାଣୀ ପୋଲିସ ରିଜର୍ଭ ଠାରେ ଏସପି ପ୍ରତୀକ ସିଂ ଗଣମାଧ୍ୟମକୁ ମାଓ ଅପରେସନ ସମ୍ପର୍କରେ ବିସ୍ତୃତ ସୂଚନା ଦେଇଛନ୍ତି । ଗତକାଲି(ସୋମବାର) ରାତିରେ ପୁଣି କିଛି ନକ୍ସଲ ଏକତ୍ରିତ ହୋଇ ଲୋକଙ୍କୁ ଧମକ ଚମକ ଦେଉଥିଲେ ।
ଏବାବଦରେ ସୂଚନା ପାଇ ପୋଲିସବାହିନୀ ପୁଣି କୁମ୍ବିଙ୍ଗ କରିଥିଲା ଏବଂ ପରେ ସର୍ଚ୍ଚ ବେଳେ ଜଣେ ମାଓ କ୍ୟାଡ଼ରର ମୃତଦେହ ଜବତ କରିଛି । ପୂର୍ବରୁ ପରିଚୟ ମିଳିଥିବା ମୃତ ନକ୍ସଲ ନେତା ସୁକ୍ରୁ ଓରଫ କୋସା ସୋଡି ବିରୋଧରେ 20 ଲକ୍ଷ ଟଙ୍କା ସରକାର ଘୋଷଣା କରିଥିଲେ ବୋଲି ଏସପି କହିଛନ୍ତି ।
ସୁକ୍ରୁର ଘର ମାଲକାନଗିରି ଏବଂ ଅନ୍ୟ ଦୁଇ ମୃତ ନକ୍ସଲ ଇତେଶ ଓ ରିନାର ମୁଣ୍ଡ ଉପରେ 4 ଲକ୍ଷ ଲେଖାଏଁ ପୁରସ୍କାର ରାଶି ଘୋଷଣା କରାଯାଇଥିବାବେଳେ ଅନେକ ସଙ୍ଗୀନ ମାମଲା ରହିଥିଲା । ତେବେ ଏବେ ମଧ୍ୟ କୁମ୍ବିଙ୍ଗ ଅପରେସନ ଜାରି ରହିଥିବା ଏସପି ସୂଚନା ଦେଇଛନ୍ତି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
