କନ୍ଧମାଳ: ଜିଲ୍ଲା କ.ନୂଆଗାଁ ଥାନା ପୁରୁଣା ନୂଆଗାଁରେ ଅଘଟଣ । ଏଠାରେ ଥିବା ଖଡ଼ଗ ନଦୀର ଚିଲିକାରେ ଗାଧୋଇବା ବେଳେ ପାଣିରେ ବୁଡ଼ି ଷଷ୍ଠ ଶ୍ରେଣୀ ଛାତ୍ରଙ୍କ ମୃତ୍ୟୁ ଘଟିଛି । ମୃତକ ନାଁ ଚନ୍ଦନ ପରିଚ୍ଛା (11) ।
ଦାରିଙ୍ଗବାଡି ବ୍ଲକ ବାଡାବାଙ୍ଗା ଅଞ୍ଚଳର ବିଦେଶୀ ପରିଚ୍ଛା ସ୍ତ୍ରୀ ଓ ପୁଅ ସହ ଗତ ତିନିଦିନ ହେବ କ.ନୁଆଗାଁର ପୁରୁଣା ନୂଆଗାଁସ୍ଥିତ ସମ୍ପର୍କୀୟ ବରୁଣ ବେହେରାଙ୍କ ଘରକୁ ବୁଲିବାକୁ ଆସିଥିଲେ । ତେବେ ଶୁକ୍ରବାର ସକାଳୁ ଗାଁର କିଛି ପିଲାଙ୍କ ସହ ମିଶି ଚନ୍ଦନ ନିକଟସ୍ଥ ଖଡ଼ଗନଦୀର ଚିଲିକାକୁ ଗାଧୋଇବାକୁ ଯାଇଥିଲା । ଏଠାରେ ସେ ବୁଡିଯାଇଥିଲେ । ପରେ ସେହି ସ୍ଥାନରେ ଗାଧୋଉଥିବା ଜଣେ ଯୁବକ ଚନ୍ଦନକୁ ଉଦ୍ଧାର କରିବା ପରେ ପରିବାର ଲୋକେ କ.ନୂଆଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇଥିଲେ ।
ସେଠାରେ ଡାକ୍ତର ଚନ୍ଦନକୁ ମୃତ ଘୋଷଣା କରିବା ସହ ବ୍ୟବଚ୍ଛେଦ ପାଇଁ ବାଲିଗୁଡା ଉପଖଣ୍ଡ ଚିକିତ୍ସାଳୟକୁ ପଠାଇଛନ୍ତି । ଅଘଟଣକୁ ନେଇ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
