ଫୁଲବାଣୀ: ବିଲୁପଦର ଗାଁରେ ଗୁଳିକାଣ୍ଡ ଘଟଣାରେ (firing case) ଚାରି ଜଣକୁ ଗିରଫ କରିଛି ଫିରିଙ୍ଗିଆ ପୋଲିସ । ଏହା ସହିତ ସେମାନଙ୍କ ପାଖରୁ ଗୋଟିଏ ଦେଶୀ ବନ୍ଧୁକ ଜବତ ହୋଇଛି । ଗିରଫ ଅଭିଯୁକ୍ତ ମାନେ ହେଲେ ଡିମିରିଗୁଡା ପଞ୍ଚାୟତର ସଞ୍ଜୟ ସାହାଣୀ, ସୁନ୍ଦରସିଂ ସାହାଣୀ, ସୁମନ କହଁର ଓ ନୂଆପଦର ପଞ୍ଚାୟତର ଅକ୍ଷୟ ବେହେରା । ତେବେ ଗୋରୁ ବ୍ୟବସାୟକୁ କେନ୍ଦ୍ର କରି ଏହି ଗୁଳିକାଣ୍ଡ ହୋଇଥିବା ପୋଲିସ ସୂଚନା ଦେଇଛି ।
ସୂଚନା ଅନୁଯାୟୀ କନ୍ଧମାଳ ଜିଲ୍ଲା ଫିରିଙ୍ଗିଆ ଥାନା ନୁଆଁପଦର ପଞ୍ଚାୟତ ବିଲୁପଦର ଗାଁରେ ସୋମବାର ସନ୍ଧ୍ୟା 5ଟା ବେଳେ ବିଲୁପଦର ଗାଁର ମହେଶ୍ୱର ସାହାଣୀ ନାମକ ଜଣେ ବ୍ୟକ୍ତିଙ୍କ ଭଉଣୀ ପ୍ରଭାସିନୀ ସାହାଣୀ (22) ଓ ତାଙ୍କ 10 ବର୍ଷର ପୁଅ ସଭାଜନ ସାହାଣୀ ଘର ବାରଣ୍ଡାରେ ବସିଥିଲେ । ହଠାତ୍ ଚାରିରୁ ପାଞ୍ଚ ଜଣ ବ୍ୟକ୍ତି ଆସି ମହେଶ୍ୱର ସାହାଣୀଙ୍କ ଉପରକୁ ଅତର୍କିତ ଗୁଳି ଚଳାଇ ଘଟଣା ସ୍ଥଳରୁ ଫେରାର ହୋଇ ଯାଇଥିଲେ । ତେବେ ଏହି ଗୁଳି ମହେଶ୍ବରଙ୍କୁ ନ ବାଜି ପାଖରେ ଥିବା ତାଙ୍କ ଭଉଣୀ ପ୍ରଭାସିନୀ ଓ ପୁଅ ସଭାଜନଙ୍କ ଦେହରେ ବାଜିଥିଲା । ଦୁର୍ବୃତ୍ତଙ୍କ ଗୁଳି ମାଡ଼ରେ ଉଭୟ ମାଆ ପୁଅ ଗୁରୁତର ଆହତ ହୋଇଥିଲେ ।
ପ୍ରଭାସିନୀଙ୍କ ଜଙ୍ଘରେ ଗୁଳି ବାଜିଥିବା ବେଳେ ସଭାଜନଙ୍କ ପେଟରେ ଗୁଳି ବାଜିଛି । ଖବରପାଇ ଘଟଣା ସ୍ଥଳରେ ଫିରିଙ୍ଗିଆ ଥାନା ଅଧିକାରୀ ପହଁଞ୍ଚିଥିଲେ । ପରେ ସେମାନଙ୍କୁ ନିକଟସ୍ଥ ଡାକ୍ତରଖାନାରା ଭର୍ତ୍ତି କରାଯାଇଥିଲା । ତେବେ ଆହତଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । ଫୁଲବାଣୀ ମେଡିକାଲରେ ଚିକିତ୍ସା ପରେ ଉଭୟଙ୍କୁ ବ୍ରହ୍ମପୁର ବଡ ମେଡିକାଲକୁ ପଠାଯାଇଥିବା ଜଣାପଡିଛି । ଏବେ ଉଭୟଙ୍କ ସ୍ବାସ୍ଥ୍ୟବସ୍ଥା ସ୍ଥିର ରହିଛି ।
ସେପଟେ ଘଟଣା ବାବଦରେ ମହେଶ୍ୱର ସାହାଣୀ କହିଛନ୍ତି ସୋମବାର ସକାଳୁ ଗୋରୁ ବ୍ୟବସାୟକୁ କେନ୍ଦ୍ର କରି କିଛି ଲୋକଙ୍କ ଗଣ୍ଡଗୋଳ ହୋଇଥିଲା । ସେହି ଘଟଣାକୁ ନେଇ ଏହି ଗୁଳିକାଣ୍ଡ ହୋଇଥିବା ଜଣାପଡିଛି । ଘଟଣାସ୍ଥଳରେ ଫିରିଙ୍ଗିଆ ପୋଲିସ ପହଞ୍ଚି ଅଧିକ ତଦନ୍ତ ଜାରି ରଖିବା ସହ ଗୁଳିକାଣ୍ଡ ଘଟାଇ ଥିବା ଦୁର୍ବୃତ୍ତମାନଙ୍କୁ ଧରିବାପାଇଁ ପ୍ରୟାସ କରିଥିଲା । ମଙ୍ଗଳବାର ଅଭିଯୁକ୍ତ ଚାରି ଜଣକୁ ଗିରଫ କରି କୋର୍ଟ ଚାଲାଣ କରିଥିବା କହିଛନ୍ତି ଫିରିଙ୍ଗିଆ ଥାନା ଅଧିକାରୀ ପି ଶ୍ୟାମସୁନ୍ଦର ରାଓ ।
ଇଟିଭି ଭାରତ, ଫୁଲବାଣୀ
