ଫୁଲବାଣୀ: ବାତ୍ୟା 'ଫନି'କୁ ନେଇ ରାଜ୍ୟ ସାରା ଭୟ ସୃଷ୍ଟି ହୋଇଥିବା ବେଳେ ଅନ୍ୟପଟେ ବେଫିକର ଗଞ୍ଜେଇ ଚୋରା ଚାଲାଣକାରୀ । ଅଭିନବ ଉପାୟରେ ଗଞ୍ଜେଇ ଚୋରା ଚାଲାଣ କରୁଛନ୍ତି । ପୋଲିସ ଆଖିରେ ଧୂଳିଦେଇ ବୋଲେରୋ ପିକଅପରେ ଗଞ୍ଜେଇ ଭର୍ତିକରି ନେଉଥିବାବେଳେ 2ଜଣ ଆନ୍ତଃରାଜ୍ୟ ଚାଲାଣକାରୀକୁ ଗିରଫ କରିଛି ଫିରିଙ୍ଗିଆ ପୋଲିସ ।
କନ୍ଧମାଳ ଜିଲ୍ଲାରୁ ଛତିଶଗଡ ଚାଲାଣ ହେଉଥିଲା ଗଞ୍ଜେଇ । ଗୁଇନ୍ଦାରୁ ସୂଚନା ପାଇ ଫିରିଙ୍ଗିଆ ଥାନାର ଜାଜେସପାଙ୍ଗାରେ ପୋଲିସ ଚଢାଉ କରିଥିଲା । ଏକ ବୋଲେରୋ ପିକଅପରେ 20 ଟି ପ୍ୟାକେଟରେ ଗଞ୍ଜେଇ ନେଉଥିବା ବେଳେ ପୋଲିସ ଧରିଥିଲା ଚାଲାଣକାରୀଙ୍କୁ । ଏହା ସହିତ ଏହି ବୋଲେରୋକୁ ପାଇଲଟିଙ୍ଗ କରି ନେଉଥିବା ଏକ ବାଇକକୁ ମଧ୍ୟ ଜବତ କରିଛି ପୋଲିସ ।
ବଲାଙ୍ଗିର ଜିଲାର ବିବେକ କଥାର ଓ ସୁବାସ କୁମ୍ଭାରକୁ ଗିରଫ କରାଯାଇଛି । 20ଟି ପ୍ୟାକେଟରେ ଥିବା 90 କିଲୋଗ୍ରାମ ଗଞ୍ଜେଇ ଜବତ କରାଯିବା ସହିତ ସେମାନଙ୍କୁ କୋର୍ଟ ଚାଲାଣ କରାଯାଇଛି ବୋଲି ସୂଚନା ଦେଇଛନ୍ତି ଥାନା ଅଧିକାରୀ ପି.ଶ୍ଯାମସୁନ୍ଦର ରାଓ । ତେବେ ଅଧିକାରୀଙ୍କ ସୂଚନା ଅନୁସାରେ କନ୍ଧମାଳରୁ ବୌଦ୍ଧ ବଲାଙ୍ଗିର ଦେଇ ଛତିଶଗଡକୁ ଅପରାଧିମାନେ ଗଞ୍ଜେଇ ଚାଲାଣ କରୁଥିଲେ ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
