କଳାହାଣ୍ଡି: ଆଶା ଥିଲା କମ୍ପାନୀ ଆସିବ ଆମର ଅଞ୍ଚଳରେ ବିକାଶ ସହ ଲୋକଙ୍କ ସାମାଜିକ ଓ ଆର୍ଥିକ ବିକାଶ ହେବ । ନିଯୁକ୍ତି ବଢ଼ିବ ଏବଂ ଦାଦନ ହଟିବ । ଏଭଳି କିଛି ଆଶା ଓ ସ୍ବପ୍ନ ନେଇ କମ୍ପାନୀ ହାତରେ ନିଜର ଭିଟା ମାଟି ଟେକି ଦେଇଥିଲେ ଲୋକେ । କମ୍ପାନୀ ତ ଆସିଲା ହେଲେ କାଁ ଭାଁ କେଉଁଠି ନିଜର ପ୍ରତିଶୃତି ଅନୁଯାୟୀ ଲୋକଙ୍କୁ ନିଯୁକ୍ତି ମଧ୍ୟ ପ୍ରଦାନ କରିଥିଲା । ହେଲେ ସେହି ଶ୍ରମିକଙ୍କ ମୃତ୍ୟୁ ପରେ ସତେ ଯେମିତି ସେହି ଶ୍ରମିକମାନଙ୍କ ପରିବାରକୁ ଭୁଲି ଯାଇଛି କମ୍ପାନୀ । ଏଭଳି ଅଭିଯୋଗ ଆସିଛି ବିବାଦୀୟ ଏବଂ ପ୍ରସିଦ୍ଧ ବେଦାନ୍ତ କମ୍ପାନୀ ନାଁ ରେ । ଅଭିଯୋଗ ଅନୁଯାୟୀ କଳାହାଣ୍ଡି ଜିଲ୍ଲା ଲାଞ୍ଜିଗ଼ଡ ଠାରେ ଦୀର୍ଘ ୨୫ ବର୍ଷ ହେଲା ଗଢ଼ି ଉଠିଥିବା ବହୁ ରାଷ୍ଟ୍ରୀୟ କମ୍ପାନୀ ବେଦାନ୍ତ କମ୍ପାନୀ ପ୍ରତିଷ୍ଠା ହେବା ସମୟରେ ଲୋକଙ୍କ ଜମି ଅଧିଗ୍ରହଣ ବେଳେ ପ୍ରତିଶ୍ରୁତି ଦିଆଯାଇଥିଲା । ଜଗନ୍ନାଥପୁର, ବଳଭଦ୍ରପୁର, ରେଙ୍ଗୋପାଲ, ବସନ୍ତପଡ଼ା, ନଙ୍ଗଲବେଡା ଆଦି ଗାଁର କିଛି ଯୁବକଙ୍କୁ କମ୍ପାନୀରେ ସିଧା ସଳଖ ନିଯୁକ୍ତି ମଧ୍ୟ ଦେଇଥିଲା କମ୍ପାନୀ । ହେଲେ ସେହି ଶ୍ରମିକମାନଙ୍କ ମୃତ୍ୟୁ ପରେ ଏବେ ସେହି ଶ୍ରମିକଙ୍କ ପରିବାର ରାଜ ରାସ୍ତାରେ ।
ଏହା ମଧ୍ୟ ପଢନ୍ତୁ... ପ୍ରତିଶ୍ରୁତି ଦେଇ ଭୁଲିଗଲା ବେଦାନ୍ତ, ହିତାଧିକାରୀଙ୍କୁ ଦେଖାଉଛି ନାଲି ଆଖି !
ସୂଚନା ଅନୁଯାୟୀ ଗତ ୨୦୦୨ ମସିହାରେ ବେଦାନ୍ତ କମ୍ପାନୀରେ ପ୍ରାୟ ୬ଟି ଗାଁର ପ୍ରାୟ ଲୋକଙ୍କୁ ନିଯୁକ୍ତି ଦିଆଯାଇଥିଲା । ସେହି ଶ୍ରମିକମାନେ କମ୍ପାନୀରେ କାମ କରିବା ସମୟରେ ବିଭିନ୍ନ କାରଣରୁ ସେମାନଙ୍କ ମୃତ୍ୟୁ ହୋଇଥିଲା । ଆଉ ସେହି ସମୟରେ ମୃତ ଶ୍ରମିକଙ୍କ ପରିବାରର ଜଣକୁ କମ୍ପାନୀ ସିଧା ସଳଖ ନିଯୁକ୍ତି ଓ ପେନ୍ସନ୍ ଭୁକ୍ତ କରିବା ପାଇଁ ପ୍ରତିଶ୍ରୁତି ମଧ୍ୟ ମିଳିଥିଲା । ହେଲେ ଦୀର୍ଘ ବର୍ଷ ବିତି ଯାଇଥିଲେ ମଧ୍ୟ ସେହି ଦାବି ପୂରଣ ବର୍ତ୍ତମାନ ସୁଦ୍ଧା ହୋଇ ପାରି ନାହିଁ । ବାରମ୍ବାର ଏନେଇ କମ୍ପାନୀ କର୍ତ୍ତୃପକ୍ଷଙ୍କୁ ଅନୁରୋଧ କରିବା ପରେ ମଧ୍ୟ କେହି କର୍ଣ୍ଣପାତ କରି ନଥିବା ବେଳେ ଜିଲ୍ଲା ପ୍ରଶାସନ ନିକଟରେ ମଧ୍ୟ ଦାବି କରି କରି ନୟାନ୍ତ ହୋଇ ପଡ଼ିବା ପରେ ଆନ୍ଦୋଳନକୁ ଓହ୍ଲାଇଛନ୍ତି ମୃତ ଶ୍ରମିକଙ୍କ ପରିବାରବର୍ଗ । ଆଜିଠାରୁ ଦାବି ପୂରଣ ନହେବା ପର୍ଯ୍ୟନ୍ତ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଆମରଣ ଅନଶନରେ ବସି ରହିବେ ବୋଲି ମୃତ ଶ୍ରମିକଙ୍କ ପରିବାର ଲୋକେ ଚେତାବନୀ ଦେଇଛନ୍ତି । ତେବେ ଏନେଇ କମ୍ପାନୀ କିମ୍ବା ଜିଲ୍ଲା ପ୍ରଶାସନ ପକ୍ଷରୁ କୌଣସି ପ୍ରତିକ୍ରିୟା ମିଳି ପାରି ନାହିଁ ।
ଇଟିଭି ଭାରତ, କଳାହାଣ୍ଡି
