ଭବାନୀପାଟଣା: କଳାହାଣ୍ଡି ଜିଲ୍ଲା ଲାଞ୍ଜିଗଡ ବେଦାନ୍ତ କମ୍ପାନୀରେ ଘଟିଛି ଅଘଟଣ । କମ୍ପାନୀ ଭିତରେ ହାଇୱା ଚାପାରେ ୨ ଶ୍ରମିକଙ୍କ ମୃତ୍ୟୁ ହୋଇଥିବା ଜଣାପଡିଛି । ଶନିବାର ବିଳମ୍ବିତ ରାତିରେ ଏହି ଅଘଟଣ ଘଟିଥିବା ବେଳେ ମୃତ ଶ୍ରମିକ ଝାଡ଼ଖଣ୍ଡ ଅଞ୍ଚଳର ବୋଲି ଜଣାପଡ଼ିଛି ।
ସୂଚନା ଅନୁଯାୟୀ ବେଦାନ୍ତ ଲିମିଟେଡରେ ବକ୍ସାଇଟ ବୋଝେଇ ଓ ଖଲାସ କରିବା ପାଇଁ ଓଏସଏଲ କମ୍ପାନୀର ହାଇୱା ଶନିବାର ବିଳମ୍ବିତ ରାତିରେ ବକ୍ସାଇଟ ବୋଝେଇ କରି କମ୍ପାନୀର ବକ୍ସାଇଟ ୟାର୍ଡକୁ ଯାଉଥିବା ବେଳେ ରାସ୍ତାର ଏକ ଖାଲରେ ପଡି ଏହି ହାଇୱାଟି ଓଲଟି ପଡିଥିଲା । ଏହି ସମୟରେ ରାସ୍ତା କଡରେ ଠିଆ ହୋଇଥିବା ଏଲଏଣ୍ଡଟି କମ୍ପାନୀରେ କାମ କରୁଥିବା ଝାଡଖଣ୍ଡ ରାଜ୍ୟ ବୋକାରୋ ଅଞ୍ଚଳର ୨ ଜଣ ଶ୍ରମିକ ଅଭିମନ୍ୟୁ ଜେନା ଓ ମୁକେଶ ଟୁଡୁଙ୍କ ଉପରେ ହାଇୱାଟି ଓଲଟି ପଡିବାରୁ ଘଟଣାସ୍ଥଳରେ ହିଁ ଚାପି ହୋଇ ଉଭୟ ଶ୍ରମିକଙ୍କ ମୃତ୍ୟୁ ଘଟିଥିଲା ।
ତେବେ ରବିବାର ଶ୍ରମିକଙ୍କ ମୃତଦେହକୁ ଲାଞ୍ଜିଗଡ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଅଣାଯାଇ ବ୍ୟବଚ୍ଛେଦ କରାଯାଇଛି । ଲାଞ୍ଜିଗଡ ପୋଲିସ ପକ୍ଷରୁ ଏକ ମାମଲା ରୁଜୁ କରି ଦୁର୍ଘଟଣା ଘଟାଇଥିବା ହାଇୱାକୁ ଜବତ କରାଯାଇଥିବା ଲାଞ୍ଜିଗଡ ଥାନାଧିକାରୀ ସତ୍ୟାନନ୍ଦ ପାତ୍ର ସୂଚନା ଦେଇଛନ୍ତି । କମ୍ପାନୀ ପରିସରରେ ଅନେକ ସମୟରେ ଏଭଳି ଦୁର୍ଘଟଣା ଘଟି ଜୀବନ ହାନି ହେଉଥିବା ବେଳେ ଶ୍ରମିକ ସୁରକ୍ଷାକୁ ନେଇ ସୃଷ୍ଟି ହୋଇଛି ପ୍ରଶ୍ନବାଚୀ ।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
