ଭବାନୀପାଟଣା: କଳାହାଣ୍ଡି ଜିଲ୍ଲାରେ ବଢି ଚାଲିଛି କାଠ ମାଫିଆଙ୍କ ପ୍ରାର୍ଦୁଭାବ । ଜିଲ୍ଲାର ବିଭିନ୍ନ ସ୍ଥାନରେ କାଠ ମାଫିଆମାନେ ସେମାନଙ୍କ କଳାଧନ୍ଦା ଜାରି ରଖିଛନ୍ତି । ବିଭିନ୍ନ ଜଙ୍ଗଲରୁ ମୂଲ୍ୟବାନ କାଠ ଲୁଟି ଚାଲିଛନ୍ତି ମାଫିଆ । ବନ ବିଭାଗ ପକ୍ଷରୁ ଅନେକ ସମୟରେ ଚଢାଉ କରାଯାଇ ମାଫିଆମାନଙ୍କୁ କାବୁ କରିବା ସହିତ ମୂଲ୍ୟବାନ କାଠ ଜବତ ହୋଇଛି ।
ଅନେକ ସମୟରେ ବନ ବିଭାଗ ଆଖିରେ ଧୂଳି ଦେଉ ମାଫିଆ ଚମ୍ପଟ ମାରୁଥିବା ନଜରକୁ ଆସିଛି । ଜଙ୍ଗଲକୁ ଲୁଟି ଚାଲିଥିବା ବାଲସିଙ୍ଗା ଗାଁର ଏକ କାଠ ମାଫିଆ ଗୋଷ୍ଠୀ ଉପରେ ମିଳିତ ଚଢାଉ କରିଛି ନର୍ଲା ବନ ବିଭାଗ ଓ ମ.ରାମପୁର ବନ ବିଭାଗ । ଏହି ମିଳିତ ଅପରେସନରେ ୧୨୦ ଖଣ୍ଡ ମୂଲ୍ୟବାନ ଶାଳ କାଠ ଜବତ କରିବା ସହିତ ଜଣେ ଅଭିଯୁକ୍ତଙ୍କୁ ଗିରଫ କରାଯାଇଛି । ଅଭିଯୁକ୍ତ ବୈଷ୍ଣବ ବାହୁକଙ୍କ ବେଆଇନ କାଠ ଗୋଦାମ ଉପରେ ଚଢାଉ କରିଥିଲେ । ଏଥିରୁ ୧୨୦ ଖଣ୍ଡ ଶାଳକାଠ ଜବତ କରାଯାଇଥିଲା ।
ଜବତ କାଠର ଆନୁମାନିକ ମୂଲ୍ୟ ୨ ଲକ୍ଷ ଟଙ୍କା ହେବ ବୋଲି ବନ ବିଭାଗ ଅଧିକାରୀ ସୂଚନା ଦେଇଛନ୍ତି । ବନ ବିଭାଗ ଅଧିକାରୀଙ୍କ କହିବା ଅନୁଯାୟୀ କାଠମାଫିଆ ବୈଷ୍ଣବ ବାହୁକଙ୍କ ଦ୍ବାରା ସ୍ଥାନୀୟ ଜଙ୍ଗଲରୁ ଦୀର୍ଘ ଦିନରୁ ଚୋରା କାଠ କାରବାର ଚାଲି ଆସୁଥିଲା । କାରବାରକୁ ପଣ୍ଡ କରିଛି ବନ ବିଭାଗ ।
କଳାହାଣ୍ଡିରୁ ଅଜିତ କୁମାର ସିଂ,ଇଟିଭି ଭାରତ
