ଭବାନୀପାଟଣା: କଳାହାଣ୍ଡି ଜିଲ୍ଲା ଭବାନୀପାଟଣା ବ୍ଲକର ୧୭୧ଜଣ ଶିକ୍ଷକଙ୍କ ଦରମାରେ ଜାଲିଆତି ଘଟଣା । ବିଇଓଙ୍କ କାର୍ଯ୍ୟାଳୟର ମହିଳା ଆକାଉଣ୍ଟାଣ୍ଟଙ୍କ କେଳେଙ୍କାରୀ ଅଭିଯୋଗ ନେଇ କଳାହାଣ୍ଡି ଭିଜିଲାନ୍ସ ପକ୍ଷରୁ ତଦନ୍ତ ଆରମ୍ଭ ହୋଇଛି । ଦରମାକୁ ଶିକ୍ଷକଙ୍କ ଆକାଉଣ୍ଟକୁ ପଠାନଯାଇ ଦରମା ପ୍ରଦାନ କରିବା ଦାୟିତ୍ବରେ ଥିବା ମହିଳା ଆକାଉଣ୍ଟାଣ୍ଟ ଏହାକୁ ନିଜ ଆକାଉଣ୍ଟକୁ ଟ୍ରାନ୍ସଫର କରିଥିବା ନେଇ ଅଭିଯୋଗ ହୋଇଥିଲା ।
ଭିଜିଲାନ୍ସ ବିଭାଗର ଏକ ସ୍ୱତନ୍ତ୍ର ଟିମ ବିଇଓଙ୍କ କାର୍ଯ୍ୟାଳୟକୁ ଯାଇ ସେଠାରେ କାଗଜପତ୍ର ଯାଞ୍ଚ କରିଥିବା ବେଳେ ଆକାଉଣ୍ଟାଣ୍ଟ ସୁଚିସ୍ମିତା ସୁଆର ନିଜ କାର୍ଯ୍ୟାଳୟରେ ଥିବା ଆଲମାରିରେ ତାଲା ମାରି ଫେରାର ମାରିଥିବାରୁ ତଦନ୍ତ ବାଧାପ୍ରାପ୍ତ ହୋଇଛି । ସେପଟେ ସୁଚିସ୍ମିତାଙ୍କ ବିରୁଦ୍ଧରେ ବିଇଓ ଥାନାରେ ଲିଖିତ ଅଭିଯୋଗ କରିଥିବା ୨୪ ଘଣ୍ଟାରୁ ଊର୍ଦ୍ଧ୍ବ ସମୟ ବିତି ଯାଇଥିଲେ ମଧ୍ୟ ବର୍ତ୍ତମାନ ସୁଦ୍ଧା ସୁଚିସ୍ମିତାଙ୍କୁ ଧରିବାରେ ବିଫଳ ହୋଇଛି ପୋଲିସ ।
ତେବେ କିଭଳି ସୁଚିସ୍ମିତା ଶିକ୍ଷକଙ୍କ ଦରମା ନିଜ ବ୍ୟକ୍ତିଗତ ଆକାଉଣ୍ଟକୁ ଟ୍ରାନ୍ସଫର କଲେ ତାହା ଏବେ ତଦନ୍ତ ସାପେକ୍ଷ । ତୁରନ୍ତ ଦରମା ପ୍ରଦାନ ଦାବିରେ ବ୍ଲକର ଏକ୍ସ କ୍ୟାଡ଼ର ଶିକ୍ଷକ ସଂଘ ପକ୍ଷରୁ ବିଇଓଙ୍କୁ ସାକ୍ଷାତ କରି ଦାବିପତ୍ର ପ୍ରଦାନ କରିଛନ୍ତି । ଏନେଇ ଏକ୍ସ କ୍ୟାଡର ଶିକ୍ଷକ କହିଛନ୍ତି," ଅଭିଯୋଗ ହୋଇଥିଲେ ମଧ୍ୟ ଜାଲିଆତିରେ ସମ୍ପୃକ୍ତ ଥିବା ମହିଳାଙ୍କୁ ଧରିବାରେ ପୋଲିସ ସଫଳ ହୋଇନାହିଁ । ତଦନ୍ତରେ ବିଳମ୍ବ ହେଉଥିବାରୁ ଅନେକ ସନ୍ଦେହ ସୃଷ୍ଟି ହେଉଛି ।" ଯଥାଶୀଘ୍ର ଦରମା ପ୍ରଦାନ କରାନଗଲେ ଆଗାମୀ ଦିନରେ ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି ଶିକ୍ଷକ ସଂଘ ।
ଏହା ମଧ୍ୟ ପଢ଼ନ୍ତୁ: କଳାହାଣ୍ଡିରେ ଶିକ୍ଷକଙ୍କ ଦରମା ହଡ଼ପ, ମହିଳା ଆକାଉଣ୍ଟାଣ୍ଟଙ୍କ ବିରୋଧରେ ଅଭିଯୋଗ
ଦିନକୁ ଦିନ ଗୋଟିଏ ପରେ ଗୋଟିଏ ତଥ୍ୟ ସମ୍ନାକୁ ଆସୁଥିବା ବେଳେ ଏବେ ପୁଣି ଆକ୍ସିସ ବ୍ୟାଙ୍କକୁ ନେଇ ଆସିଛି ଚାଞ୍ଚଲ୍ୟ କର ତଥ୍ୟ ଆସିଛି । ୧୭୧ ଜଣ ଏକ୍ସ କ୍ୟାଡ଼ର ଶିକ୍ଷକଙ୍କ ମଧ୍ୟରୁ ୯ ଜଣ ଶିକ୍ଷକଙ୍କ ଦରମା ଟଙ୍କା ଅକ୍ଟୋବର ୧ ତାରିଖ ଦିନ ଆକ୍ସିସ ବ୍ୟାଙ୍କରୁ ଏକ ଚେକ ଯୋଗେ ଉଠାଣ ହୋଇଥିବା ଦେଖିବାକୁ ମିଳିଛି । ୩ ଲକ୍ଷ ୧ହଜାର ୨୨୪ ଟଙ୍କା ଚେକ ମାଧ୍ୟମରେ ଉଠାଣ ହୋଇଥିବା ବେଳେ ତଦନ୍ତ କଲେ ଆହୁରି ତଥ୍ୟ ସାମ୍ନାକୁ ଆସିବ ବୋଲି ଶିକ୍ଷକ ସଂଘ ଦାବି କରିଛି ।
ଇଟିଭି ଭାରତ, କଳାହାଣ୍ଡି
