କଳାହାଣ୍ଡି: ଆଉ ଘରର ଚାରି କାନ୍ଥ ଭିତରେ ସୀମିତ ହୋଇ ରହିନାହିଁ ନାରୀ। ସମାଜରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିବାରେ ସକ୍ଷମ ହୋଇପାରିଛି ସେ । ବିଭିନ୍ନ ବାଧାବିଘ୍ନ ମଧ୍ୟରେ ବି ନିଜକୁ ପ୍ରତିଷ୍ଠା କରି ସେ ପାଲଟିଛି ଉଦାହରଣ । ତେବେ ସମସ୍ତ କାର୍ଯ୍ୟରେ ପାରଙ୍ଗମ ମହିଳାକୁ ପ୍ରତି ମାସରେ ସହିବାକୁ ହୁଏ ଋତୁସ୍ରାବର ଯନ୍ତ୍ରଣା । ଅସହ୍ୟ ପୀଡା ସତ୍ତ୍ବେ ମୁହଁରେ ହସ ନେଇ ଅନ୍ୟଙ୍କୁ ପ୍ରେରଣା ଯୋଗାଇବାରେ ପଛାଏ ନାହିଁ ମହିଳା ।
ମହିଳାଙ୍କ ଏହି ପ୍ରାକୃତିକ ପ୍ରକ୍ରିୟାରେ ଅସୁବିଧାକୁ ହୃଦବୋଧ କରି ମହିଳାଙ୍କୁ ସହାୟତାର ହାତ ବଢାଇବାକୁ ଆଗେଇ ଆସିଛି କଳାହାଣ୍ଡି ଜିଲ୍ଲାର ଭୁବନେଶ୍ବର ବେହେରା ଯୁବ ସଂସ୍ଥା । ଜାତୀୟ ସ୍ବାସ୍ଥ୍ୟ ସର୍ଭେ ଅନୁଯାୟୀ ଭାରତ ବର୍ଷରେ 62 ପ୍ରତିଶତ ମହିଳା ଋତୁସ୍ରାବ ସମୟରେ ସ୍ବଚ୍ଛତା ଅବଲମ୍ବନ କରିନଥାନ୍ତି । ବିଶେଷ କରି ସ୍କୁଲ ଓ କଲେଜରେ ପାଠ ପଢୁଥିବା ଛାତ୍ରୀ ସାନିଟାରୀ ନାପକିନ ବ୍ୟବହାର ଜାଣି ନଥିବାରୁ 52 ପ୍ରତିଶତ ଝିଅଙ୍କର ପାଠ ପଢାରେ ଲାଗିଯାଏ ଅଧାରୁ ଲଗାମ ।
ଏହି ପରିସଂଖ୍ୟାନ ଭୁବନେଶ୍ବର ବେହେରା ଯୁବ ସଂସ୍ଥାକୁ ପ୍ରେରଣା ଯୋଗାଇଥିଲା । ସଂସ୍ଥା ସହ ଜଡିତ ମହିଳା ଓ ଛାତ୍ରୀ ଆରମ୍ଭ କରିଥିଲେ ସାନିଟରୀ ନାପକିନ ପ୍ରସ୍ତୁତି । ଯାହାର ପ୍ରଥମ ଲକ୍ଷ୍ୟ ଥିଲା ଗ୍ରାମାଞ୍ଚଳ ମହିଳାଙ୍କ ସ୍ବଚ୍ଛତା ଓ ଦ୍ବିତୀୟରେ ମହିଳାଙ୍କୁ ଏହା ମାଧ୍ୟମରେ ରୋଜଗାର ଦେବା । ବର୍ତ୍ତମାନ ଏହି ସଂସ୍ଥା କେବଳ ଜିଲ୍ଲା ନୁହେଁ ବରଂ ସୁଦୂର କେରଳକୁ ମଧ୍ୟ ସାନିଟାରୀ ନାପକିନ ପଠାଉଛି ।
ତେବେ ସଂସ୍ଥାର ଯାତ୍ରା ଏତେ ସହଜ ନଥିଲେ ବି ଦୃଢ ଇଛାଶକ୍ତି ବଳରେ ଆଜି ଗ୍ରାମଞ୍ଚଳର ମହିଳାଙ୍କ ମଧ୍ୟରେ ସଚେତନତା ସୃଷ୍ଟି କରିବାରେ ସକ୍ଷମ ହୋଇଛି ସଂସ୍ଥା । ଏଥିସହ ଏହା ଅନେକ ମହିଳାଙ୍କୁ ଯୋଗାଇଛି ରୋଜଗାରର ନୂଆ ପନ୍ଥା । 2 ବର୍ଷ ତଳେ ସାନିଟାରି ନାପକିନର ଆବଶ୍ୟକତାକୁ ବୁଝିନଥିଲେ ଗ୍ରାମାଞ୍ଚଳର ମହିଳା । ହେଲେ ଏବେ ସଂସ୍ଥାର ସହଯୋଗରେ ଧୀରେ ଧୀରେ ଏହାକୁ ବେଶ ଭଲ ଭାବେ ବୁଝିଲେଣି ଗ୍ରାମାଞ୍ଚଳର ମହିଳା ଓ ଝିଅମାନେ ।
ବର୍ତ୍ତମାନ ସଂସ୍ଥାରେ 90 ଜଣ ସାମିଲ ହୋଇଛନ୍ତି । ଆଉ ଏମାନଙ୍କ ନିଷ୍ଠାପର କାର୍ଯ୍ୟଶୈଳୀ ଯୋଗୁଁ ଏହାକୁ ଦେଖି ସଂସ୍ଥାକୁ ନାବାର୍ଡ ଯୋଗାଇଛି ଟ୍ରେନିଂ ସହାୟତା । ତେବେ ଆଗକୁ ସାରା ଜିଲ୍ଲାରେ ଏଭଳି କାର୍ଯ୍ୟକ୍ରମ ଜାରି ରଖିବାକୁ ଲକ୍ଷ୍ୟ ରଖିଛି ସଂସ୍ଥା ।
କଳାହାଣ୍ଡିରୁ ଅଜିତ୍ ସିଂ, ଇଟିଭି ଭାରତ
